Salmos 31 - Biblia Dc en Mixe de Quetzaltepec

Salmo 31 Tu'uk yë mëj jotkujk'ajtën ko Tios ntuk'ijxpäjtmëty

¹ Wintsën, jam ma mijtsën jamës n'ixta'ay yë kuwa'anën; këtiis xyajnipäxëtëkëty nijëna'a. Pëjktakës ëwaatsëtuuy jä'ä ko mijts oy winë xynyipaye'ey.

² Mëtoow'ijtkës. Tsojkës yaj'ëwaatsëpëtsëëmk. Jëtu'un mnäyajnaxëtëty tä mëjtsaajën mëti'ipës xy'akëëytyujkpën, tä tu'uk yë mëjpotsyën maas ntso'okëtyën.

³ Mijts jëtu'un nyajnaxy tä tu'uk yë mëjtsaakopkën ëkë tä tu'uk yë mëjpotsyën. Tu'uwinye'eykyës ets kuwaankës; yajmëjnax mxëëw.

⁴ Yajpëtsëëmkës ma ja o'ktaknën yu'utsypë mëti'ipës të njayajtuknipëjktaakën, jä'ä ko mijts xykyuwaanpës.

⁵ Mijts nkë'ëmoopy yë njot nja'awënës; Yaj'ëwaatsëpëtsëëmkës, Wintsën, mëtëypyë Tios'atyën.

⁶ N'ëxëëk'ijxypyës yë ja'ay mëti'ipë awinax y'ëwtajtëpën ka'apë tii mëj'ajtën tmëëtëtyën. Yi'iyë tu'uk yë Wintsën ntuk'ijxpejtypyës.

⁷ Yë mtsojkën mja'awën jotkujkës xyajnäjyawëty. Tëë xy'ixy wi'ixës nmony ntukyën, mnija'ap wi'ixës ëyo'on jotmay nmënaxy nyajnaxyën.

⁸ Ka'apës të xykyë'ëyäky maas ja nmëtsiptëjkën; jamës të xyajnaaxwä'äky maas jotkujk ntänëtyën.

⁹ Wintsën, pa'ëyoowkës, atsë'ëkëtuuyës nyajpaaty. Moonëpës yë n'ijxën mëët yë pëjkën ets njot nini'kxës tëë y'ënu'kxëtyääynyë, näjyëtu'un yë njot nja'awënës.

¹⁰ Yë pëjkën ijxën ets jë'ëyën yaxën yë'ë ënät jyaak mëmëta'akëp yë njuukyajtënës. Yë monyëtukyë yë'ë yajkëxäämpy yë njot nmëjaawës; ets nwaay npajkës jëtu'unyë y'ënu'kxëtyääynyë.

¹¹ Yë nmëtsiptëjkës je'eyës xynyëxi'ik xytyukxi'iktë, jëtu'unës xy'ixtë yajja'ayxyikpës yowë je'eyë, xytsyë'këpës ja mëti'ipës mëët oy näjyawëtyën. Xykyukäktëpës je'eyë koos muum xy'ixtë tu'ujoty.

¹² Jëtu'unës të xyjyä'äytyëkooynyëtë tëës yowë n'o'knë. Jëtu'unës ëjtsnë tä tu'uk yë tu'tsën tëëpë tyukpu'ujëtyääynyën.

¹³ Wa'atsës nmëtoy ko yë ja'ay ame'tsyë myëtya'aktë: kutsë'ëkë yajpaaty oymyaajëty. Tu'ukyë të nyäkyajpxëtë etsës xyaj'ooka'antë.

¹⁴ E ëjts, Wintsën, mijtsyë tu'ukyë ntuk'ijxpejtyp; ëjts jëtu'unës të n'ëna'any: Mijtsyë tu'ukyë nTios'ajtyp.

¹⁵ Yë njuukyajtënës mijts yë mkë'ë'am'ajtyp; yaj'ëwaatsëpëtsëëmkës maas yë nmëtsiptëjk xy'ixjëtit xypyajëtitën.

¹⁶ Ni''ijxkëta'ak ya'atë mtuunpë mëët yë oyjyot oywyinma'any, ets yajnitsokës mëët yë mtsojkën mja'awën.

¹⁷ Mijts yam nmëkäjpxyp, Wintsën; këtiis xyajwë'ëmëty tsëtyu'unmëët. Yë'ë tsëtyu'unmëët yajwë'ëm yë ja'ay mëti'ipë ëxëëk ja'ay'ajtëpën ets kutijnax ni'ikyë jap o'kpëjutjoty ma ijxtëkoy ja'atyëkoy xëmë y'itëtyën.

¹⁸ Wä'än amonyë t'itë mëti'ipë antaktëpën, mëti'ipë je'eyë nëxik tukxiktëpën ets tëkatsy tnimëtya'aktë ja'ay mëti'ipë oy juukyajtpën.

¹⁹ Janty mëj yë m'oyjot m'oywyinma'any xyajnikëxë'ëky ma ja'ayëtyën mëti'ipë mtukxoontakëtëpën. Jëtu'un xypyëjkë'ëky tä yë wit meenyën, ets wa'ats xytyuk'ixy xytyuknijawë ko xyajwä'kxy yë m'oyajtën ma ja'ayëtyën mëti'ipë ëmuumtu'ukjot mtuk'ijxpäjtëpën.

²⁰ Mëët ko mijts xypyëjk'ity xymyajts'ity, ka'ap nitii jyätyë oy wi'ix yë ëxëëkja'aytyëjk jyanimay jyanitajëty; jap xykëwent'aty, ma mtëjkën oy myëtsiptëjk jyatukyä'äxy jyatukjokyë.

²¹ Nkënu'kxyjya'apës yë Wintsën ets ja tsyojkën jya'awën, mëët ko winë të tuny mëj këjää mëët ëjtskyëjxm maas ënety mon tuk nyajpaatyën.

²² Maas ënety ka'ap jotkujk näjyawëtyën, ënätës ojts nmay ntajy ko tëëjëntij xyjyä'äytyëkooynyës; e ko ojts n'amëtoy ja näypyutëkë, ojts ënätyë xy'ëtsoyës.

²³ Tsoktë jawëtë yë Wintsën, miitsëty ninu'un oy mtuntën. Yë Wintsën Kyëwent'ajtyp yë ja'ay mëti'ipë mëtëy winë kyäjpxypën, e ja mëti'ipë amëj akëjxm ja'ay'ajtpën tsyääty tyuunpy ijxtëm pyäätyën.

²⁴ Yajotkujk'atë yë mjot mwinma'anyëty miitsëty ninu'un yë Wintsën xytyuk'ijxpätën.