Biblia Todo Logo
Bìoball air-loidhne

- Sanasan -

Salmos 30 - Biblia Dc en Mixe de Quetzaltepec


Salmo 30 Yë nyi'ëy ma Wintsën yajkukajpxën

1 Wintsën tyam mijts nkuuy'iy nkuuyä'äxy, jä'ä ko mijtsës të xyajtso'oky ets ka'ap të xy'ëwa'atsy etsës yë nmëtsiptëjk xynyëxi'ik xytyukxi'iktëty.

2 Wintsën mëti'ipës nTios'ajtypyën, tëë yë putëjkën n'amëtoy npëjktsoy, e tëë xyajtso'okyës;

3 mijts Wintsën, mijtsës të xyajpëtsëmy o'kpë akujky; tëës xymyo'oy yë juukyajtën, ets tëës ntso'oky o'kënjëjp'am.

4 Miitsëty, ninu'un yë Wintsën oy xymyëtuntën, win'ëw winya'axtë, mëjpëjkta'aktë wa'atspë xyëëwën.

5 Yë'ë tsojk'am yë tsyip y'äkë tmëët'aty, yë'ë y'oyjyot ijtëëp xëmë maapaat njuuky'ajtëmën. Pën jë'ëyëm yaxëm koots, komjëpom jotkujk nyajpaata'anëmë.

6 Ëjts jotkujkës të näjyawëty, ets të nmay të ntajyës: Ni pënës ëjts ëxaty xykyatun xykya'ënëëmëty.

7 Mijts, Wintsën, mëët ko ja oyjyot oywyinma'any xymyëëtëty tëës mijts kë'ëm xy'ënëëmë koos jotkujk n'itëty. E mijts ka'ap ja mputëjkën të xy'ëkyajnikëxë'knë ma ëjtsën, ja tsë'kën ja'awën jä'äs të xyajkumon të xyajkutukë.

8 Mijts Wintsën, mijts nmëyäxy nmëjojkpy, mijts nmëpëjktsoopy:

9 koos n'ookëty tii mnapaat mna'ixëp, koos ënety nyajmënëjkxnë jutjoty? Yë naaxway ka'ap tjëkyepy mtukxoonta'akëtëty, ni yë'ë mëpaat tkanikäjpxy wi'ix tii oy xytyunyën.

10 Wintsën, mëtoow'ijtkës yë n'aaw n'ayuk, ets pa'ëyoow najts'ëyo'owëkës; Wintsën, putëjkëkës.

11 Jä'ä ko tëë xyaj'awinpity yë një'ëyënës nyaxënës äjtsën pujtën; tëës yë nwit xytyuknijääntu'uty mëti'ipë kuumpën u'kxpën etsës të xtyukxoxy mëti'ipë ja'ay myëxëëw'ijxypyën.

12 Paatyës n'ëna'any Wintsën, ko ka'apës njëkyepy amonyë n'itëty: mijts nkuuy'ëëwäämpy ets nmëjpëjkta'aka'any, xëmë nkukajpxëja'any winë.

Biblia Dc en Mixe de Quetzaltepec, Oaxaca México © Sociedad Bíblica de México, A.C.

Bible Society of Mexico
Lean sinn:



Sanasan