Salmos 3 - Biblia Dc en Mixe de Quetzaltepec

Salmo 3 Tsajpkäjpxy ma Tios näypyutëkë yaj'amëtoyën

¹ Wintsën, nimay ja nmëtsipës, nimay nyäpyaatëtë mëti'ipës xynyipëtë'ktëpën,

² mayës ja'ay xynyikajpx xynyimëtya'aktë. Ka'ap nitsokën tpaata'any ma Tiosën.

³ E mijts, Wintsën, mijtsës xy'akëëytyujkp xy'axajtujkp; mijtsës xytyukpatp ja mëj'ajt oyajtën ets mijtsës jatëkok xyajjotkujktakp.

⁴ Nmëyäxy nmëjojkpyës yë Wintsën koos yë näypyutëkë n'amëtoy etsës xy'ëtsoy ma jam yajpaatyën wa'ats kopkkëjxm.

⁵ Jotkujk näkyo'okyës, nmaanaxyës, etsës njootwijy, jä'ä ko Wintsën yë'ëjës xypyutëjkëp.

⁶ Ka'apës ja'ay xy'ëtsë'ëkëty oy jënu'un nyimayëty, mëti'ipës të xyajnatuktën etsës xynyipëtë'ëka'antë.

⁷ Kuwaankës Wintsën. Yajtsokës ma mijts nTios'atyën. Mijts myajtsëtyutäämpy yë nmëtsipës wyiinkëjxy jyëjpkëjxy; yë y'aaw tyëts jëtu'unyë xymyo'taja'any.

⁸ Mijts Wintsën mijts myajtsokp; kënu'kx yë mnaax mkajpn.