Salmos 29 - Biblia Dc en Mixe de Quetzaltepec

Salmo 29 Ja Wintsën ja y'aaw y'ayuk mëti'ipë maaytyääyëpën winë

¹ Mëjpëjkta'aktë yë Wintsën, miitsëty ninu'un m'itën tsajpjotm, mëjpëjkta'aktë ko myëët'ajtyp yë mëj'ajtën oyajtën yë Wintsën,

² Mëjpëjkta'aktë yë Wintsën yë xyëëw mëti'ipë myëët'ajtypyën mëj'ajt oyajtën, ëwtatë yë Wintsën ma tsyajptëjkën mëti'ipë oy tsujën.

³ Yë Wintsën yë y'aaw y'ayuk yajmëtoowëp näjyëtu'un mëjnëë wiinkëjxy, yë Dios mëti'ipë myëët'ajtypyën mëj'ajt oyajtën, yë'ë ënääw yaj'ënäämpy, Yë Wintsën tam näjyëtu'un yajpaaty mëjnëë wiinkëjxy.

⁴ Yë Wintsën yë y'aaw y'ayuk mëk tyukwanë; yë Wintsën yë y'aaw y'ayuk myëët'ajtyp yë mëk'ajtën;

⁵ yë Wintsën yë y'aaw y'ayuk yajkë'ëtswä'kxyp yë oyëtypë aay kepy. Yë Wintsën yajtëjpy yajwejxpy yë ajë kepy mëti'ipë jamën Líbano.

⁶ Yajyu'kxyp yë tun kopk mëti'ipë jamën Líbano ets Sirión; jëtu'un tyajnëpëkaxy tyajyujkpëkaxy tä yë mëjtsajpkaajën ets tä yë tsajpkaa u'unkën.

⁷ Yë Wintsën yë y'aaw jëënmëëtpën pyëtsimy;

⁸ yë Wintsën yë y'aaw y'ayuk yaj'yu'kxyp yë naaxwiinyëtë jam ma y'anë'ëk tyëëtsë'ëkëtyën; yaj'yu'kxyp yë naaxwiinyëtë jam ma Cadés itjotmën, anë'ëkpë tëtsë'ëkpë.

⁹ Yë Wintsën yë y'aaw y'ayuk xyijt yu'kxp yë xoj kepy ëyätyëtypë, ets yukjot jëtu'unyë tyajwë'ëmy winwa'ats naax. Ma tsyajptëjkën, tëkokyë ja'ayëty aakyë'ë wintsë'këyëp.

¹⁰ Yë Wintsën yë'ë y'ëne'empy yë nëë tuu; yë Wintsën yë'ë tu'uk ënä'ämpë, mëti'ipë yajkutujkpën winë xëëw winë jëmëjt.

¹¹ Yë Wintsën myëkmoopy myëjaawmoopy yë nyaax kyajpn; yë Wintsën kyënu'kxyp yë nyaax kyajpn mëët yë akujkajtën jotkujk'ajtën.