Salmos 28 - Biblia Dc en Mixe de Quetzaltepec

Salmo 28 Yë Wintsën y'amëtoow'ijtyp yë nnu'kxtakën

¹ Wintsën mëti'ipës xykyuwaanp xynyixajpën, tyam nmëpëjktsoy. Këtii xytyukmëj'aty yë m'ëtsoowinpijtën. Koos xykya'ëtsowëty, o'këntujp ënety nyajpaatyës.

² Mëtoow'it wi'ixës nyä'äxy njoky ko n'amëtoy yë näypyutëkë, koos yë nkë'ë jam nastijë ma wa'atspë mtsajptëjkën.

³ Këtii xy'a'ixëty etsës jëtu'un njatëty tä yë ëxëëkja'ayëtyën, ka'apës mëpaat näjyëtu'un yë xëëw jëmëjt xytyukminy xytyukkëtä'äky ëxëëk tä jyatën mëti'ipë ëxëëk ëtëtstëp ënantëpën, mëti'ipë wiinkë'ëy akë'ëy oyjyä'äy näpyëjktakëtëpën e jyootjoty wyinma'anyjoty tëkatsy jap myäytyë tyajtë.

⁴ Tukëpät ijxtëm pyaatëtën, jëtu'un ijxtëm ëxëëk y'ëtë'ëtstën y'ëna'antën; tukëpät ja ëxëëkpë mëti'ipë mëët ja kyë'ë y'aaw të tuntën.

⁵ Jä'ä ko yë'ëjëty ka'ap tmëj'ix tmëjpëjkta'aktë mëti'ipë ja Wintsën të tyajkojyën. Nëjkxëp yajkutëkoyëtë ets ka'ap nëjkx nijëna'a y'ëkpëtë'knëtë.

⁶ Mëj'äämpy yë Wintsën mpëjktä'äkyës, ko tëë tmëtoow'ity yë nu'kxtakënës.

⁷ Yë Wintsën yë'ëjës mëk xykyuwaanp, yë'ëjës të ntuk'ijxpety etsës të xypyutëkë. Jotkujkës näjyawëty; Ëwaanpës ko ënety ja Wintsën nkukajpxës.

⁸ Yë Wintsën yë'ë nyaax kyajpn mëjaaw'ajtëp. Näyjyëtu'un ja yajkutujkpë mëti'ipë të twin'ixyën, jam yë näypyutëkë ets tsoktakn tpaaty ma yë'ëjën.

⁹ Wintsën yajtso'ok mnaax mkajpn; kënu'kxy mëti'ipë mjä'ä'ajtypyën. Kwent'at jëtu'un tä ja'ay yë kupixyny këwent'atyën. Jam xëmë xymyëët'atëty ma mkë'ëjotmën.