Salmos 24 - Biblia Dc en Mixe de Quetzaltepec

Salmo 24 Ja yajkutujkpë ja myëj'ajt y'oyajtën

¹ Yë naaxwiinyëtë, Wintsën yë jyä'ä, aakyë'ë jyä'ä'ajtääpy tu'kë'ëyë jënu'un winë y'ityën naaxwiiny ets jënu'un jyuuky'ätyën ma yë'ëjën.

² Jä'ä ko yë Wintsën yë'ë ojts tpëjktä'äky ma naaxwiinyëtë nyäkyumatsëtëtyën, ets tyajta'tspëjky nëëwinkëjxy.

³ ¿Pën jyëkyejpy pyätëty ma ja Wintsën ja kyopkën ¿Pën jyëkyejpy jap yajpaatëty ma ja tsyajptëjkën?

⁴ Yë'ë mëti'ipë wa'ats yë jyot wyinma'anyën ets wa'ats ja kyë'ë y'aaw, ka'apë tmëëtëtyën ja nëë poky. Mëti'ipë ka'ap t'ëwtatyën tsaa ets kepy, oynatii, ets ka'ap nëkoo Dios tukajpxpety ko tii tyajtëytyëkëja'any.

⁵ Yë Wintsën mëti'ipë Tios'ajtypyën mëti'ipë yajnitsokpën, yë'ë kënu'kxanëp ets nyipaye'eyä'änyë.

⁶ Jëtu'un ja ja'ay jyä'äy'atë mëti'ipë y'ijxtaaytyëpën ja Wintsën, mëti'ipë y'ijxtaaytyëpën ja Dios, mëti'ipë Jacob Tiosajtën.

⁷ Ëwa'ats itë mijts tëjk'aaw xëmëkyëjxm. Jëtu'un wë'ëmtë ëwa'ats nitu'ukjaty, ets tyëkëty ja yajkutujkpë mëti'ipë myëët'ajtypyën ja mëj'ajt oyajtën.

⁸ ¿Pën jëtu'un tääpë mëjyajkutujkpë'ajtp mëët ja mëj'ajtën oyajtën? Yë'ë ja Wintsën mëti'ipë amëk jotmëkën. Yë'ë mëti'ipë ka'ap tsyë'ëkën tsipjoty.

⁹ Ëwa'ats itë tëjk'aaw xëmëkyëjxm. Jëtu'un wë'ëmtë ëwa'ats nitu'ukjaty, ets tyëkëty ja yajkutujkpë mëti'ipë myëët'ajtypyën ja mëj'ajt oyajtën.

¹⁰ ¿Pën tääpë yajkutujkpë mëti'ipë myëët'ajtypyën mëj'ajt oyajtën? Yë'ë ja Wintsën mëti'ipë winë maaytyääyëpën, yë'ë ja yajkutujkpë mëti'ipë myëët'ajtypyën ja mëj'ajt oyajtën.