Salmos 23 - Biblia Dc en Mixe de Quetzaltepec

Salmo 23 Yë Wintsën yë'ëjës xykyëwent'ajtp, tä ja'ay tsajppax tkëwent'atyën

¹ Yë Wintsën yë'ëjës xykyëwent'ajtp, ka'ap nitii nyajtëkoy'ätyës.

² Akujk jotkujkës xyajpo'kxy ma jë'kxy pëky ka'ap y'ëmaaytyä'äkyën, yë'ëjës xytyu'uwinwoop xytyu'uwinwijtsp maas yë wa'ats nëë npaatëtyën.

³ Xymyoopyës yë oyajtën mëk'ajtën jempyë etsës xyajnëjkxy ma ja mëtëypyë në'ë tu'ujën, jëtu'un'äämpy yë xyëëw myëjnaxy.

⁴ Oyës muum naxëty akootstuuy, ka'apës ntsë'ëkëja'any, jä'ä ko mijts Wintsën mijts myajpatp ma ëjtsën, ja mkepy mtajk yë'ëjës xytyuk'ateenytyujkp xytyuk'axajtujkp, paaty akujk jotkujk ntuk'ijxpetyës.

⁵ Mijts të xynyipëjktaakë ja nka'ayënës n'ukënës ma t'ixtëtyën yë nmëtsiptëjkës; tëës yë waaytsyooy xytyukkujaaxy mëti'ipë pa'akxu'kpën, etsës yë n'a'ukën të xyaj'ujtsë mëët yë tsatym nyëë.

⁶ Ja m'oyajtën ets ja mtsojkën mja'awën xëmë yajpaaty ma ëjtsën ets jëtu'un y'ita'any mapaatës njuuky'äty; ets ma mijts m'ityën, Wintsën, jamës n'ita'any winë xëëw winë jëmëjt.