Salmos 21 - Biblia Dc en Mixe de Quetzaltepec

Salmo 21 Yë ëy mëti'ipë yajtukuuy'ëëpën ko pën myëtä'äky tsipjoty

¹ Wintsën, yë yajkutujkpë jotkujk nyäjyawëty ko të xymyo'oy yë mëjaaw mëk'ajtën. Jotkujk nyäjyawëty ko të xyajmëtä'äky tsipjoty.

² Tëë xykyuuytyuunë ja mëti'ipë ënety tsyojkën'ajtypyën; ets ka'ap të xytyukwintuk'ooky mëti'ipë yë'ë të t'amëtoyën.

³ Tëë xy'ëxajë mëët yë mëj kënu'kxën, ets të xypyëjktakë pu'ts pujxn kujän.

⁴ Tëë m'amëtoyë juukyajtën, ets yenyjuukyajtën të xymyo'oy, mëti'ipë jäjkpën.

⁵ Mëët yë'ë ko të xypyutëkë. Këjää tmëëtëty yë kuttujkën. Tëë xymyo'oy yë mëk'ajtën ets kuttujkën.

⁶ Tëë xykyënu'kxy xëmëkyëjxm. Ko mëët myajpaaty, jotkujk nyäjyawëty.

⁷ Mijts yajkutujkpë ka'ap nijëna'a mka'ajëty, jä'ä ko mijts mtukjotkujk'ajtyp yë Wintsën ets mtukjotkujk'ajtyp yë tsyojkën jya'awën yë Ni'ik Këjxmëpë.

⁸ Yë mkutujkën myëmëtakta'ajäämpy yë mëtsiptëjk; ets mëët ja m'ënä'ämën mkutujkën xyajkutëkoyä'äny tëkokyë mëti'ipë m'ëxëëk'ijxëpën,

⁹ ets jap xypyëjkta'aka'any jëënjoty ko ënety xynyipaye'ey ja nëë poky. Yë Wintsën mëët yë tsyip y'äkë, yë'ë nyino'okäämpy mëët yë jëën mëti'ipë yaj'o'k yajtëkoopyën.

¹⁰ Mjo'tsäämpy yë y'u'unk y'ëna'k yaa naaxwiiny ma naaxwiinyëtë ja'ay yajpaatën.

¹¹ Oy tjatuknipëjktaakëtëty myaj'ooka'anëtë ets tjaniwinmayëtëty ëxëëk mjatëty mkëpätëty, yë'ë ka'ap nitii tuntëty,

¹² jä'ä ko mijts jëtu'unyë xyajkä'äka'any xyajputa'any, ets mti'pxn aakjam kya'ataja'any ma yë'ëjëtyën.

¹³ Paaty mijts Wintsën, amëjaaw pëtë'ëk mëët yë mëk'ajtën. Tsojk nixëëwtu'unëm mëët yë ëy yä'äxy ko mijts të mëtä'äky.