Salmos 20 - Biblia Dc en Mixe de Quetzaltepec

Salmo 20 Tsajpkäjpxy ma mëtakën yaj'amëtoyën

¹ Wintsën myëtowëp yë m'aaw m'ayuk ko ënety mon tuk myajpaaty; Dios mkuwa'anëtëp mëti'ipë Jacob y'ëwtajtën.

² Yë'ë kyäxëp jam Sión, yë näypyutëkë.

³ Wä'än tja'amyäjtsta'ay mëti'ipë të xyyoxyën, ets oy tkupëkëty ja wintsë'kën mëti'ipë mo'ojäämpyën.

⁴ Wä'än tkuuytyuny yë mtsojkën, ets oy wyimpëtsëm jyëjpëtsëmëty mëti'ipë të xytyuknipëjktaakën.

⁵ Jëtu'un nixëëwtu'unmëty ko të mëtä'äky, ets nyajwa'kujkëmëty yë wit wintëy, mëët yë Dios yë xyëëw mëti'ipë n'ëwtajtëmën. Dios mo'ojëtëp mëti'ipë të xy'amëtoyën.

⁶ Nija'apës ko yë Wintsën yë'ë yajmëta'akäämpy yë yajkutujkpë mëti'ipë kë'ëm të twin'ixyën; jam tsajpjotm y'ëtsoowinpita'any ets tyajmëta'aka'any tsipjotm.

⁷ Tää mëti'ipë yë'ë tyuk'ijxpäjtëp ko tmëët'atë kepy wintëkäämpë mëti'ipë myëtsiptuuntëpën, ets tä wiinkëtypë mëti'ipë yë'ë tyuk'ijxpäjtëpën ko tmëët'atë kwaay, e ëëtsajtëm yë'ë ntuk'ijxpäjtëm ko yajpaaty yë Wintsën mëët ëëtsajtëm.

⁸ Yë'ëjëty, wäänë muum tyä'äntsi'ita'antë tääts y'ojtskëta'aka'antë, e ëëtsajtëm ta'tspëky ntänëja'anëmë.

⁹ Wintsën, mijts myajmëta'akëp yë yajkutujkpë. Xy'ëtsowtëpës ko ënety nmëkajpxtë.