Salmos 2 - Biblia Dc en Mixe de Quetzaltepec

Salmo 2 Mijts n'u'unk'ajtyp

¹ ¿Wi'ix ko myuktë xyu'umtë ja ja'ayëty mëti'ipë ka'ap ja Dios t'ëwtatën? ¿Wi'ix ko t'ëëwmuk tkajpxmuktë ka'apë tyuunëtyën?

² Yë yajkutujkpëtëjkëty ets mëj ënä'ämpëtëjkëty tëë tkäjpxykyumëtoownaxtë yë Wintsën, tu'ukmukyë të tkäjpxy'atë wi'ix tyaj'atëkoya'antën ja Wintsën ets y'ënä'ämpë mëti'ipë të twin'ixyën.

³ Jëtu'un ya'axtë jyoktë: Tsojk nnätyuknikäjtutëm ja pyujxn ntejpxy. Tsojk nnäkyäjëmë ma tsumy matsy xyaj'ijtëmën.

⁴ Ja Wintsën mëti'ipë ënä'ämpën jam tsajpjotm, je'eyë tyukxi'ikëtë.

⁵ Ko jyoot'anpëky, nëkooyë jyänty tsyë'ëkëtë, ets ajoot'an y'ënë'ëmxëtë:

⁶ Tëës nkënu'kxy mëti'ipës nyaj'ënä'ämäämpyën ma Sión kajpnën, ma Sión kopkën wa'atspë.

⁷ Yë'ëjës nikajpxäämpy nimëtya'akäämpy mëti'ipë yë Wintsën të tuknipëjktaakën; yë'ëjës të xy'ënëëmë: Mijts n'U'unk'ajtyp, ëjts yë njot ne'pny mmëët'ajtyp.

⁸ Ëjts amëtoowk mëti'ipë kajpn mtsojkën'ajtypën ets ntukumayëty; pën mtsojktääpy mapaat yë naaxwiinyëtë y'ëwtityën, tyam nmo'ojëty ets xyjyä'ä'atëty.

⁹ Mëët yë mpujxn ntajk nëjkx xyajkutëkoy ja yajkutujkpëtëjk mëti'ipë y'ënä'ämtëpën ja naax kajpn. Piw nuuk xytyuna'any jëtu'un tä naaxtu'ts jyätyën ko pyu'uy.

¹⁰ Miitsëty ënä'ämpëtëjkëty wintsëntëjkëty naaxwiinypë, ja'akyukëtë ya'atë. Jatë nijawëtë mëti'ipës yam nkäjpxypën.

^11-12 Ëwtatë ets wiinkoxtänëtë ja Wintsën mëët ja xoontakën ets ja wintsë'kën. Winta'ak naaxkowtë ma yë'ëjën mëët yë winkutsë'kën, këtiipë jyoot'anpëkëty ets këtiipë muum tu'u'aay m'ooktëty, jä'ä ko yë'ë pojën jyoot'anpëky. Jotkujk ets xoontä'äky yë ja'ay yajpaaty mëti'ipë y'ixtääpyën yë näkyëwent'atë ma yë'ëjën.