Salmos 17 - Biblia Dc en Mixe de Quetzaltepec

Salmo 17 Tsajpkäjpxy ma Tios nänyipaye'eyë yaj'amëtoyën

¹ Wintsën, ëjts yë'ëjës n'amëtoopy ja mëtëypyë nipaye'eyë. Kwentëpëk maas yam ya'atë tsajpkäjpxy nyajnaxyën, ëjts mëtëyës yam nkäjpxy, ka'apës n'antä'äky.

² Mijts m'ëna'anëp wi'ixës ja mpoky nkumëtoy, jä'ä ko mijts tu'kë'ëyë tii mnipaye'eytyääpy.

³ Mijts mnija'ap wi'ixës nmay ntajyën; oy kyootsëty wa'atsës xy'ixy, jëtu'unës mijts xyajtooywyä'ätsy tä ja'ay pu'ts pujxn tyajtooywyä'ätsyën ets ka'ap tii ëxëëkpë të xypyääty ma ëjtsën. Ka'apës nijëna'a tii të nikäjpxy mëti'ipë ka'ap nyimëtyaknëtyën.

⁴ Jëtu'un tä yë ja'ay y'ëtë'ëtstën ma je'eyë tsyiptun tyipkajpxtën, ëjts tim näjyëpëjkëpës jam ijxtëm yë mtëyajtën y'ënä'änyën.

⁵ Ëjts oyës të nnë'ëye'ey të ntu'uye'ey ma mnë'ë mtu'ujën; ka'apës nijëna'a të njëjpye'eytyu'uty.

⁶ Dios, mijts yam npa'tmëkäjpxyp; jä'ä ko mijts xy'ëtsoopës; ja'akyujkëkës, mëtoow'ijtkës yë n'aaw n'ayuk.

⁷ Tuk'ijxkës ko mijts mtsoky mjawë, mijts myajtsokpy yë ja'ay ma myëtsipën mëti'ipë y'ijxtaaytyëpën ja putëjkën ma mkutujkënën.

⁸ Këwent'ajtkës ijxtëm yë mwiin xykyëwent'atyën; ets tuknikëëykyës yë mkäkn

⁹ Maas yë nmëtsiptëjkën mëti'ipës të xyajnatuktën etsës xyaj'ooka'antë.

¹⁰ Je'eyë nyämyëjawëtë, amëj akëjxm kyajpxtë myëtya'aktë.

¹¹ Janty wiinkonës nnäjyawëty xy'ixjëtit xypyajëtitë, tyimnitajëjantëp yë njot nini'kxës.

¹² Jëtu'un yë'ëjëty tä kaajën, mëti'ipë ëwa'anëtyën, jäpyë t'ëwxity ma y'aankën, jëna'a jap ja jëyujk y'ëkwiinkuja'tëty ets tmatsa'any.

¹³ Pëtë'ëk, Wintsën, mijts mëët näwyinkuwa'akët. Yajtëj yaj'ojtsë yë kyë'ëkox tyekykyox. Tukuwaankës yë mtëypyujxn ma ëxëëk ja'ayën.

¹⁴ Mëët yë mëk'ajtën, Wintsën, yajpëtsëëmkës jap ma yë'ëjëtyën. Wä'än yaa tyajpaatë naaxwiiny ma kyuma'ayën të yajmo'otën. Wä'än näyajkumeenytya'akëtë ets wä'än yë y'u'unk tkaytyë t'uuktë ku'uxyë koonëm pyëjwa'kxtëty ets jyaak natëkëty mëti'ipë y'ok'u'unk y'ok'ëna'k tyukjë'kxëpën.

¹⁵ E ëjts, yë'ëjës xykyu'uxaanp, ko mijts n'ixëty wiinxë jëjpxë, koos jam näy'ixëtëty ma mijtsën koos ënety nma'awyijy.