Salmos 16 - Biblia Dc en Mixe de Quetzaltepec

Salmo 16 Ja oypyë kuma'ayën

¹ Wintsën, këwent'ajtkës. Jä'ä ko jam ma mijtsën n'ixta'ayës ja kuwa'anën.

² Tëë n'ënëëmë: Ko mijts nWintsën'ajtyp ets mijts ntuk'oy'äjtyp, nitii kyajëtu'unëty ijxtëm mijtsën.

³ Jëtu'un y'ëna'antë mëti'ipë y'ëwtajtëpën yë awinax: ko këjää mëj'ajtën tmëëtëty,

⁴ ni'ikyë tyajmayëtë y'awinax ets t'ëwtatë. Ëjts nijëna'ajës jam nkayajpaata'any ma jëyujk ne'pyny tämtë tjä'ätstën. Nijëna'ajës nkaxëëwkuuykyajpxa'any.

⁵ Mijts, Wintsën, mijts ntukjotkujk'ajtyp; mijts xykyënu'kxp xyjyëkyäjpës, ets mijts yë njuukyajtënës mkë'ë'am'ajtyp.

⁶ Janty oy ja ijtakn të xytyukka'ayës maas oy njuuky'atëtyën, ets janty'oy janty tsuj ja kuma'ayën mëti'ipës të xynyikääkën.

⁷ Nkënu'kxyjyawëjäämpyës yë Wintsën, jä'ä ko yë'ëjës xytyu'uwinwoop xytyu'uwinwijtsp, ets yë'ë yaj'o'oyëtyääpy yë njot nwinma'anyës koos nma'ay npo'kxy.

⁸ Yë Wintsën yë'ëjës xëmë ntukjotkujk'ajtyp; ko yajpaaty mëët ëjts maas n'a'oykyë'ëjën ni pënës xykyatsuu'ixëty.

⁹ Paatykyëjxm jotkujk näjyawëtyës. Jotkujk yë njot nwinma'anyës yajpaaty.

¹⁰ Jä'ä ko mijts ka'apës o'këntuuy xyajwë'ëma'any, ka'ap tjëkyepy jap jutjoty tu'uk yë wa'ats ja'ay xy'ëxmatsëty.

¹¹ Xytyuk'ixëpës ja në'ë tu'u mëti'ipë ja juukyajtën myëët'ajtypyën. Jam ma mijtsën tam yajpaaty xoontakën. Jotkujk jam xëmë mijts mwintuuy.