Salmos 150 - Biblia Dc en Mixe de Quetzaltepec

Salmo 150 Ma ja Tios yajmëjpëjktä'äkyën naaxwiinyëtë apëtsëmy

¹ Tukxoontä'äky mëjjawë Dios yë xyëëw nyaxëty. Mmëjpëjkta'aktë yë Dios jap tsajptëkoty. Mmëjpëjkta'aktë ma mëj y'ëwtityën ja nyiwits nyijuux.

² Mmëjpëjkta'aktë ko winë mëj këjää të tuny. Mmëjpëjkta'aktë ko myëjwiin kyëjääjëty.

³ Mmëjpëjkta'aktë mëët yë xuxn. Mmëjpëjkta'aktë yë Dios mëët yë kow ets xijn.

⁴ Mmëjpëjkta'aktë ets win'ätstë mëët yë xijn. Mmëjpëjkta'aktë yë Dios mëët yë xuxn ets kow.

⁵ Mmëjpëjkta'aktë mëët yë pujxn mëti'ipë ayaxpën ko yaj'awojpmuky. Mmëjpëjkta'aktë mëët yë pujxn mëti'ipë këwiipën.

⁶ Tu'kë'ëyë mëti'ipë juukyajtpën, wä'än tmëjpëjkta'aktë yë Wintsën. Tukxoontä'äky mëjjawë Dios yë xyëëw nyaxëty.