Salmos 148 - Biblia Dc en Mixe de Quetzaltepec

Salmo 148 Tëkokyë mëti'ipë Tios të tyajkojyën aakyë'ë mëjpëjktakëp

¹ Tukxoontä'äky mëjjawë Dios yë xyëëw nyaxëty. Mmëjpëjkta'aktë yë Wintsën jam tsajpjotm. Mmëjpëjkta'aktë jap ni'ik këjxy.

² Mmëjpëjkta'aktë yë Wintsën, miitsëty Dios kyukäjpxy. Mmëjpëjkta'aktë yë Wintsën, ninu'un tsajpjotm Dios xymyëtuntë.

³ Mmëjpëjkta'aktë yë Wintsën, miitsës xëëw, po'o. Mmëjpëjkta'aktë yë Wintsën, ninu'un mtë'kxtën mjajtën.

⁴ Mmëjpëjkta'ak mijts tsajp ni'ik këjxmëpë yë Wintsën; mijts, nëë mëti'ipë jap tsajpnëkëjxy yajpatpën.

⁵ Mmëjpëjkta'aktë Wintsën yë xyëëw, jä'ä ko yë'ë ojts t'ënä'ämta'ay tu'kë'ëyë winë ets ojts kyojtë.

⁶ Yë'ë ojts tyajta'tspëky winë ets y'itëty xëmëkyëjxm, ojts tyajwë'ëmy tu'uk ja ënä'ämën këtiipë pën tyajma'atëty.

⁷ Mmëjpëjkta'aktë yë Wintsën yaa naaxwiiny, jëyujk mëjpë mëti'ipë mejyjoty yajpatëpën, jap këknëëjoty.

⁸ Xëëw'an, tëtsn tuu, tip ets yoots. Tuupoj mëti'ipë pyatuumpyën ijxtëm të yatuk'ëne'emyën.

⁹ Tun, kopk. Aay kepy, mëti'ipë tëëm'ajtpën ets mëti'ipë ka'apën.

¹⁰ Jëyujk tsajpkaa mëti'ipë ma jëën tëjkën ijtëpën, yë ëwa'anëtypë jëyujk mëti'ipë yuukjoty kopkjoty yajpatëpën, yë joonëty, tsa'anyëty.

¹¹ Ënä'ämpëtëjk yajkutujkpëtëjk naaxwiinypë apëtsëmy. Kopktëjkëty, wintsëntëjkëty, naaxwiinyëtë naaxkëjxypyë yajpaatën.

¹² Ye'eytyëjk to'oxytyëjk, mëjja'ay mutskja'ay.

¹³ Mmëjpëjkta'aktë ni'ëmukë Wintsën yë xyëëw, jä'ä ko yi'iyë tu'uk ijtp mëj'äämpy. Yë y'oyajtën ets xyoontakën jam yajpaaty tsajpkëjxm ets naaxwiiny.

¹⁴ Yë'ë të tjotmëkmo'oy yë nyaax kyajpn. Yë'ë jëtu'un ja wa'ats ja'aytyëjk tyukxoonta'aktëp ets myëjjawëtëp, mëti'ipë yajpatëpën jam Israel, mëti'ipë Dios kyajpn'ajtypyën, ja nyaax kyajpn mëti'ipë oy tsyojkpy jya'apën. Tukxoontä'äky mëjjawë Dios yë xyëëw nyaxëty.