Salmos 144 - Biblia Dc en Mixe de Quetzaltepec

Salmo 144 Ma tu'uk yë yajkutujkpë tyajnaxyën kukajpxën ja'awëkyëtakën ma Tiosën

¹ Mëjjaw kënu'kxyjyawë yë Dios yë xyëëw y'ity mëti'ipës xykyuwaanpën. Yë'ëjës xytyukjajtp wi'ixës ntsiptunëtyën.

² Yë'ë tu'uk oy myëku'uk, ma yë'ëjën jamës kuwa'anën npaaty, maas nkäktso'okyën, mëti'ipës mëët näkyuwa'anyën; yë'ëjës xynyikëëpy xynyixajp. Yë'ë tëkokyë të tpëjktä'äky yë naax kajpn maas yë ntekpya'tkën.

³ Wintsën, tii yë naaxwiinyëtë ja'ay kyëjxm'ajtyp ko xymyëmay xymyëtajy? ¿Tii mëj'ajtën yë naaxwiinyëtë ja'ay myëët'ajtyp ets xytsyokëty xyjyawëty?

⁴ Yë naaxwiinyëtë ja'ay jëtu'un yë'ë tä yë ja'ay myëkxejy y'o'kxejyën; ets jyuukyajtën jëtu'un nyäxy tä yë äpkën.

⁵ Wintsën tyam n'amëtoy npëjktsoy ets mnäy'awijtstu'utëtëty jam tsajpjotm ets mjënakëty, ton yë tun kopk wä'än yë jok jam tpëtsëmy;

⁶ najtsmatsë yë mti'pxn, yaj'ëtë'ëts yaj'ëna'an yë ënääw wëtsuk ets xyajkä'äkëty yë mmëtsiptëjk.

⁷ Xajë'ëk jam këjxm, yajpëtsëëmkës yap nëëmejyjoty. Yajpëtsëëmkës ma ya'atë ja'ayëtyën mëti'ipë ënä'ämtëpën ka'apës n'ixy'ätyën,

⁸ mëti'ipë antaktëpën, mëti'ipë y'a'oykyë'ë xyajjë'ktëpën awin'ëënë ko käjpxytyu'unën tuntë.

⁹ Wintsën, tyam tu'uk yë ëy jemypyë ntukwin'ëwa'any, yë'ë mëët yë kow ntukpakowa'anyës ya'atë ëy.

^10-11 Mijts myajmëtäkpy yë yajkutujkpëtëjk jam tsipjotm; tëë xyajtso'oky yë mtuunpë David, mijtsës xyajtso'okëp ma ja'ayëtyën mëti'ipës xyaj'ookantëpën, kuwaankës ma ja'ayëtyën ka'apës n'ixy'ätyën, mëti'ipë win'ë'ëntëpën, mëti'ipë y'a'oykyë'ë xyajjë'ktëpën awin'ëënë ko waantakën tuntë.

¹² Yë nmaank'ajtëmë janty'oy yääktë pyätë jëtu'un tä aay ujtsën jam pëjykyamjotm, yë nnëëx'ajtëmë jëtu'un nyaxtë tä tu'uk yë xenyën ma tsajptëjk kyëxmëtä'äkyën.

¹³ Ma tëjkën, ma nyaj'ijtëmën pëjkë'ëky yë jë'kxy pëky, ujts yajpaaty; yë ntsajppax'ajtëmë ets nkupixyny'ajtëmë ni'ikyë nyimayëtë mëjwiin këjää.

¹⁴ Yë ntsajpkaa'ajtëmë janty oyëty y'u'unk'ixtë, ets aak jää myëxu'unk'atë ma tnixëëwëtyën, ka'ap nijëna'a yajmëtoy pën jyi'iy yä'äxy ma ntu'u'ajtëm nyäxyën.

¹⁵ Janty jotkujk yë naax kajpn yajpaaty mëti'ipë tu'kë'ëyë ya'atë myëët'ajtypyën. Janty jotkujk yë naax kajpn yajpaaty mëti'ipë Tyios'ajtypyën yë Wintsën.