Salmos 143 - Biblia Dc en Mixe de Quetzaltepec

Salmo 143 Ma mijtsën, jamës të npëjktä'äky yë njot nwinma'anyës

¹ Wintsën, mëtoow'it yë ntsajpkäjpxyës; ja'akyukë yë njëëytyak nnu'kxtakënës. Ëtsoowkës, jä'ä ko mijts mwa'ats yë'ë, ets aak tëyajtën winë xytyuny xykyäjpxy.

² Këtii yë mtuunpë xyajtëwëty tii tyuunpy oy ka'oy, jä'ä ko mijts mwintuuy ni pën kyawa'atsëty.

³ Yë nmëtsiptëjkës jëtu'un xyjyänty'ixjëtit xyjyäntypyajëtitës, yajxonës naaxkëjxy xynyaaxkutijëtë; yë'ë tsyojktëp etsës ëxëëk njuuky'atëty, jëtu'un ijxtëm ojts jyuuky'atën mëti'ipë të y'o'knëtën.

⁴ Janty mon janty tukës nyajpaaty, ets janty tsë'këpës njootjoty nwinma'anyjoty.

⁵ Nja'amyejtsypës wi'ix ijty tëëyëpën, nmëmääpy nmëtäjpyës wi'ix ojts winë xytyunyën.

⁶ Jamës yë nkë'ë nnajtsxajë ma mijtsën koos nkajpxtä'äky, jä'ä ko nyajmëyäjtypyës yë mputëjk mpupäjtën jëtu'un tä yë naaxwiinyëtë nëë tyajmëyätyën.

⁷ Wintsën, ëtsoowinpijtkës pojën, ëjts xejykyukëjxëpës. Këtiis yë mputëjkën xytyukwintuk'ookëty këtiipës n'ookëty ntëkoyëty.

⁸ Ko jyopyëp'atëty, tuknija'awëkës yë mtsojkën mja'awën, mijtsyë tu'ukyë ntuk'ijxpejtyp. Tuknija'awëkës wi'ixës nja'ay'atëtyën, jä'ä ko yë ntsojkënës jamës npëjktä'äky ma mijtsën.

⁹ Wintsën, yajtsokës maas nmëtsiptëjkën, ma mijtsën jamës npaaty yë tsoktakn.

¹⁰ Tukni''ijxëkës wi'ixës mëpaat ntunyën mëti'ipë mijts myajkutujkpyën, jä'ä ko mijts nTios'ajtyp, yë mmëkajtën m'oyajtën yë'ëjës xytyu'uwinwoop xytyu'uwinwijtsp ma ja në'ë tu'ujën mëtëypyë.

¹¹ Mëët mijts ja mxëëw, Wintsën, yajjuuky'ajtkës. Jä'ä ko mijts mwa'ats yë'ë, yajpëtsëëmkës ma monyë tukyën.

¹² Jä'ä ko mijts Wintsën, aak'oy winë xytyuny xykyäjpxy, yajkutëkooytya'a yë nmëtsipës, jä'ä ko mijtsës xytyuunpë'ajtp.