Salmos 142 - Biblia Dc en Mixe de Quetzaltepec

Salmo 142 Mijts ntsoktakn'ajtyp

¹ Mëkës yë Wintsën nmëkäjpxy, mëktä'äkyës n'amëtoy ets tmëët'atëty yë pa'ëyo'ow najts'ëyo'owën maas ëjtsën.

² Ma yë'ëjën jamës nnikäjpxy mëti'ipës nka'oyjya'apën, ma yë'ëjën jamës näjyëtu'un npëjktä'äky yë nmonyë ntukyës

³ koos nyajpaaty jë'ë ya'ax, Wintsën, mijts wa'ats xynyijawë yë nnë'ë ntu'ujës. Ma ja në'ë tu'u mëti'ipës npanëjkxypyën, jam të tpëjkta'aktë tu'uk yë o'ktakn yu'utsypë.

⁴ Koos nja'ijxwinpity ni pën maa nka'ixyës mëti'ipës jeexyë xypyutëjkëpën. Ni pën maa kyakëxë'ëky mëti'ipës jeexyë xynyiwaantutpën. Ka'ap maa kyëxë'ëky pën mëti'ipës xymyëmääpy xymyëtajpën.

⁵ Wintsën, jëtu'un n'ënëëmë: Mijts ntsoktakn'ajtyp, mijtsyë tu'ukyë ntukjotkujk'ajtyp maas yaa ja juukyajtën nyajtu'uye'eyën.

⁶ Mijts mmëtoow'itëp yë nyaxënës njojkënës, ëjts tëës yë njot nmëjaaw kyëjxnë. Mijtsës xyjyëwowëp maas yë nmëtsiptëjk xy'ixjëtit xypyajëtitën, yë'ëjëty kumëjaaw ni'ikëty këtiinëm jëtu'un ëjts.

⁷ Ju'tkës maas tsumy matsy nyajpaatyën, jëtu'un tjëkyäpëty ets mijts nwin'ëw nwinya'axëty. Yë oyjyä'äytyëjkëty nëjkxëpës xynyimintë ko nijawëtëty ko oy tsuj xyajjuuky'ätyës.