Salmos 14 - Biblia Dc en Mixe de Quetzaltepec

Salmo 14 Ko yë naaxwiinyëtë ja'ay të wyinma'anytyëkoy

¹ Ja'ay mëti'ipë winma'anytyukën ënaanp ko ka'ap ma Dios, tëë wyinma'any tyëkooytya'atë, aakyë'ë të tuntë ëxëëkpë. Ka'ap ma pën mëti'ipë oypyë tyunëpën.

² Jam tsajpjotm y'ijxyp yë Wintsën yë naaxwiinyëtë ja'ay, yë'ë jyapaatäämpy pën jää ja'ay winma'anymyëëtpë ëkë mëti'ipë Dios y'ëwtajtypyën.

³ Aakyë'ë ja'ay ëxëëk tu'u pyanëjkxtëp, tëë wyinma'any tyëkooytya'atë. Ka'ap ma pën mëti'ipë oypyë tyuunpyën. Nitu'uk kyaka'ty.

⁴ Yë ëxëëk tuunpë ëxëëk kajpxpëty nijënu'un kyaja'akyukëtë, yë'ë nyijë'kx nyipëjktëp yë nnaax nkajpnës ijxtëm ja'ay tsajpkääky tkayën. Tääpë ja'ayëty ka'ap yë Dios t'ëwtatë.

⁵ Tsë'ëkëjantëp yë'ëjëty, jä'ä ko yë Dios yë'ë mëët yajpaaty mëti'ipë mëmëtoowëpën.

⁶ Nyëxik tyukxiktëp mëti'ipë yë ëyoopëja'ay jyatsojkpyën, e yë Wintsën yë'ë nikëëy nixajëp.

⁷ Jääpëk jeexyë Israel ja'ay nitsokën tpaatë mëti'ipë jam tso'onpën ma Sión kopkën. Ko ja Wintsën tyaj'oyëty ja nyaax kyajpn ja jyuukyajtën, ënät xyoonta'aka'antë ja Jacob ja y'u'unk y'ok, ets tëkokyë yë Israel kajpn.