Salmos 139 - Biblia Dc en Mixe de Quetzaltepec

Salmo 139 Tios yë'ë nyija'awëtyääpy tëkokyë winë

¹ Wintsën, tëës mijts xy'ixy ets wa'atsës xynyijawë.

² Wa'ats xynyijawë tiijës ntuunpy nkäjpxypën, ets jëkämpaat xynyijawë wi'ixës nmay ntajyën.

³ Wa'ats xynyijawë wi'ixës nye'ey nnaxyën, ets mnija'ap wa'ats tiijës ntuunpyën.

⁴ Ka'anëmës ëjts nkajpxpëtsëmnyëm tii ayuk, ko mijts Wintsën, tëë xynyanija'awënë.

⁵ Oy tyimmaajëty mijtsës xykyëwent'ajtp ets mmëkajtën mtimyaj'ijtyp maas ëjtsën.

⁶ Ja wijyajtën mëti'ipë yajtsojkën'ajtpën tsip oy etsës npaatëty, yë wijyajtën mëj winma'any oy etsës nwinja'awëtya'ajëty.

⁷ ¿Wi'ixës n'ëkmëjëkämkä'äkëty ja mmëkajtën m'oyajtën, maatsow n'ëkkukä'äkëty?

⁸ Koos ëjts njanëjkxëty jam tsajpjotm, mijts tam myajpaaty; ets koos jeexyë jap naaxpa'tkë'p njajëjptakpë, mijts nän tap myajpaaty.

⁹ Koos jeexyë ëjts n'ëkkääkë'ëky etsës jeexyë jam nnëjkxy matsow yë xëëw pyëtsimyën, etsës jam njuuky'atëty ma nëëpa'a nyäxyën maatsow ja xëëw kyëtä'äkyën ja tu'k naaxwiinypë yajpaatyën,

¹⁰ jampaat, xypyanëjkxpës je'eyëm ets xypyutëkëtyës.

¹¹ Koos njamay njatajëty nnäwyinkuyu'utsëtëtyës akootstuuy, ëkë ajotkumonë nkukootsëtyës ma ënety xyiiny'ätyën.

¹² Mëët ja kootsajtën ka'ap yë'ëkyëjxm mijts ka'ap xy'ixëtyës, yë kootsajtën jëtu'un xy'ixy tä xëëny'ajtënën. Yë kootsajtën ets xëënyajtën tu'knax yë xyjyawë.

¹³ Mijts ojts tëkokyë yë njot nini'kxës xyajkojy ets mijts ojts näjyëtu'un jap xy'oytyunyës ntaakës jyootjoty.

¹⁴ Wintsën, nmëjja'ap njaantyjya'ap mijts, jä'ä ko mëj këjääjës yë jotkujk'ajtën nmëëtëty ets janty mëj këjää mijts winë të xytyuny. Mëët yë'ë nmëpëjkpyës yajxon ko jyëtu'unëty.

¹⁵ Koos ojts yë njot nini'kx yeeky pyety ka'ap ojts yu'utsy y'ity ma mijtsën, maas ënety nyaj'oytyunyën ayu'utsytyuuy, maas ënety nyaj'oytyunyën jap këkpaat, jap naaxpa'tkë'p.

¹⁶ Yë mwiin wa'ats ojts t'ixy koos ja njot nini'kx nyämyäkxyë; tëkokyë ya'atë mëti'ipë tuunëpën jajtëpën jap myiinta'ay këxja'ay ma ja mnokyën. Tëë ënety mijts xynya''awijtsnë jënu'unës njuuky'ata'anyën maanëmës ënety ka'ap njuuky'ajt tsoonyëmën.

¹⁷ Mijts Dios, janty tsip nja'akyukëtyës yë mjot mwinma'any. Tsip yajwinjawëty yë mjot mwinma'any kanaakpëkpyë.

¹⁸ Kooxyëp jeexyë n'ëkmëtyoyës, ni'ik mayxyëp yë pyëtsimy këtiinëm jyëtu'unëty yë nëë ajin ets oyxyëp njamëtyoowtääpyës, ëjts je'eyëmës jeexyë nyajpaaty mëët mijts.

¹⁹ Mijts Dios, pëjkë yë jyuuky'ajtënëty yë ëxëëkja'aytyëjk ets tukmëjëkämkäkës yë yajja'ay'o'kpëtëjk,

²⁰ mëti'ipë ëxëëkjaty mnikajpx mnimëtyakëpën ets nanëkoo mnipëtë'ëkyë, ka'ap tii poky xymyëëtëty.

²¹ Wintsën, ¿wi'ixës ko ka'ap n'ëxëëk'ixëty ja mëti'ipë m'ëxëëk'ijxëpën, etsës jëkäm jëxkë'ëm nkapëjkta'akëty mëti'ipë nëkoo myajjoot'anpëjkëpën ëkë mnipëtë'këpën?

²² Ëxëëkës njanty'ixy ëmuumtu'ukjot. Aak nmëtsipës npëjktä'äky.

²³ Mijts Dios, ijxkës ets xynyijawëty yë njot nwinma'anyës. Ëkwinma'any'ijxkës ets xynyijawëty wi'ixës nmay ntajyën.

²⁴ Ijxkës pën ëxëëk tu'ujës npanëjkxyp, nëëwinwow tu'uwinwoowkës jam ma ja në'ë tu'ujën mëti'ipë nëjkxpën ma juukyajtën winë xëëw winë jëmëjtpë.