Salmos 135 - Biblia Dc en Mixe de Quetzaltepec

Salmo 135 Mëjwiinpë këjääpë Tios yë tyuunk

¹ Tukxoontä'äky mëjjawë Dios yë xyëëw nyaxëty. Yajmëjnaxtë yë Wintsën yë xyëëw. Yajmëjnaxtë ninu'un xymyëtuntën,

² jënu'un jap yajpaatën ma Wintsën yë jyëën tyëjkën, ets ma tsajptëjkwiin tsajptëjkpa'ajën, ma nTios'ajtëm jyëën tyëjkën.

³ Mmëjpëjkta'aktë Wintsën, jä'ä ko yë'ë oy jot winma'any tmëëtëty; win'ëw winya'axtë xyëëw, jä'ä ko oy Tyios'aty.

⁴ Yë'ë ojts twin'ixy yë Jacob mëti'ipë yajtijpën Israel, ets yë'ë jëtu'un tjawëja'any tä kyë'ëm wit kyë'ëm meenyën.

⁵ Ëjts wa'atsës nnijawë ko yë Wintsën mëti'ipë nTios'ajtëmën, ni'ik yë myëjëty këtiinëm yë wiinkëtypë tios mëti'ipë jää muum yajpatpën.

⁶ Yë Wintsën tyuuntääpy tëkokyë tii tyimtuknipëjktakëp. Jëtu'un ijxtëm winë tunyën tsajpjotm näjyëtu'un yaa naaxkëjxy winë tuny; jëtu'un ijxtëm nëëwiinkëjxy winë tunyën; näjyëtu'un jap nëëpa'tkë'p winë tuny.

⁷ Yë'ë yajpëtë'kpy muum jëkäm yë yoots nëëma'a ma naaxwiinyëtë jyëjpkëxyën; yë'ë näjyëtu'un yaj'ëtëtsyp yaj'ënäämpy yë ënääw wëtsuk ko tyu'uja'any pyoja'any ets jap ma pëjkë'ëky tyaj'ityën yë poj jap tyajpëtsëmy ets ënät tyajpojy.

⁸ Yë'ë ojts tyaj'o'kta'ay ja kä'äxkopktëjk ma ja Egiptë ja'ay ja y'u'unk y'ëna'këtyën, ets näjyëtu'un ojts tyaj'o'ktaay ja jëyujk tsajpkaa ja kyä'äxkopk mëti'ipë ënety yë'ë jyä'ä'ajtëpën.

⁹ Jap Egiptë itkujky ojts jap mëj këjää yë ëyo'on tyajkëtä'äky ets tyajkëxë'ky ja myëj'ajtën ma ja Egiptë ja'ay kyutujkpën ets ma nitëkokyë ja tyuunpëtëjkën.

¹⁰ Ojts kanaak tyaj'ity yë o'kën tëko'oyën ma naax kajpnën mëjëtypë, ojts tyaj'ooky yë ënä'ämpëtëjk mëj'äämpyë:

¹¹ Ja Sihón, mëti'ipë ënety ënä'ämpën ma Amor ja'ayëtyën; ja Og, mëti'ipë ënety ënä'ämpën jam Basán ets tëkokyë ja yajkutujkpëtëjk mëti'ipë ënety jam ënä'ämtëpën Canaán.

¹² Tëkokyë ja it naaxwiinyëtë mëti'ipë ënety tääpë yajkutujkpëtëjk nyitënaaytyëpën, yë'ë ojts tukumaaytyä'äy ja nyaax kyajpn, ja Israel kajpn.

¹³ Wintsën, yë mxëëw xëmëkyëjxm yë y'ity, kë'ëyxyëëw kë'ëyjyëmëjt mijts myajja'amyätsëty.

¹⁴ Yë Wintsën, yë'ë kë'ëm nyipaye'epy yë nyaax kyajpn; pya'ëyoopy nyajts'ëyo'owëp yë tyuunpëtëjk.

¹⁵ Yë awinax mëti'ipë tsuuja'aytyëjk y'ëwtajtëpën, yë'ë mëët y'oytyunyëty yë pu'ts pujxn ets poop pujxn mëti'ipë yë naaxwiinyëtë ja'ay kë'ëm yajkojpyën mëët yë kyë'ë y'aaw.

¹⁶ Jyamëët'ajtyp yë y'aaw, ka'ap kyäjpxy; jyamëët'ajtyp yë wyiin, ka'ap y'ixy;

¹⁷ Jyamëët'ajtyp yë tyatsk, ka'ap myëtoy ets ka'ap jyuukyëty.

¹⁸ Yë ja'ayëty mëti'ipë tääpë awinax yajkojtëpën ets mëti'ipë y'ëwtajtëpë jëtu'un jyä'äy'atë tä y'awinaxëtyën.

¹⁹ Miitsëty Israel ja'ayëty, mëjjaw kënu'kxyjyawëtë yë Wintsën; miitsëty teetytyëjkëty, mëjjaw kënu'kxyjyawëtë yë Wintsën.

²⁰ Miitsëty Leví ja'ayëty mëjjaw kënu'kxyjyawëtë yë Wintsën ets tëkokyë miitsëty ninu'un xymyëmëtowtën ets xywyinkutsë'ëkëtën yë Wintsën.

²¹ Mmëjjaw kënu'kxyjyawë yë Wintsën jam ma Sión kopkën, mëti'ipë jam Jerusalén juukyajtpën. Tukxoontä'äky mëjjawë Dios yë xyëëw nyaxëty.