Salmos 133 - Biblia Dc en Mixe de Quetzaltepec

Salmo 133 Ja nyi'ëy wi'ix mëpaat ja ja'ay nyätsyoky nyäjyawëtën.

¹ Ëk'ixtë wi'ixpëm jyänty oyëty ko jëëky mëku'uk tu'kmukyë yajpaatë.

² Jëtu'un nyäxy tä oypyë onën mëti'ipë pa'akxu'kpën, mëti'ipë ijty yë teetyëjk nätyukuku'tsëtëpën, ets pya'akxuuky ma kyëpajkën, ma wyiin y'aawën ets tyimkëtä'äky jëtu'un ma wyitëtyën.

³ Jëtu'un tä maanik jam kyä'äyën ma ja Hermón kopkën, jyënäky jëtu'un ma Sión kopkën ets jam ja Wintsën ja juukyajtën winë xëëw winë jëmëjtpë tyajkëtä'äky.