Salmos 132 - Biblia Dc en Mixe de Quetzaltepec

Salmo 132 Mëti'ipë yë Tios tyukwinwa'anëpën yë David

^1-2 Wintsën, ja'amyäts yë David, ets ijxë wi'ix tmënaxy tyajnaxyën yë ëxëëkpë tsaatsypë. Ja'amyäts ko yë'ë ojts tnikäjpxy ko tukkajpxpejty yë Dios yë xyëëw, ets ko ojts tukmëtoy ja y'aaw y'ayuk ja Dios mëti'ipë Jacob y'ëwtajtypyën.

³ Ka'apës tëkoty ntëkëja'any ets ni nkama'aja'any nkapo'kxa'anyës jap,

⁴ ka'apës yë nwiin nyajpi'itsa'any ets ka'apës nmaanaxa'any nitu'uk nu'unën,

⁵ pën ka'apës yë Wintsën yë tyëjk npatë, mëti'ipë Jacob y'ëwtajtën.

⁶ Jam Efrata ojts yajnikäjpxy y'ity ja kaaxë mëti'ipë ja käjpxytyu'unën myë'ijtypyën, ets tyam jam yajpaaty winwa'atstum ma ja Jaar y'itjotmën.

⁷ Tsojk nja'amëmë ma Wintsën yë tsyajptëjkën; wä'än nnäkyoxtënaaytyakëmë ma yajpaatyën.

⁸ Pëtë'ëk, Wintsën, mëët ja mkaaxë mëti'ipë myë'ijtypyën ja käjpxytyu'unën, ets mminëty ma kopkën ma mpo'kxtakn yajpaatyën.

⁹ Wä'än ja teetytyëjkëty tmëmay tmëtajtë ja mëtëypyë ja nipaye'eyën; wä'än jotkujk t'itë ja'ayëty mëti'ipë mmëtuunëpën.

¹⁰ Mëët yë'ë ko yajkutujkpë David xynyi''ijxkëtä'äky mëti'ipë mëtuunëpën oy. Këtii xyjyä'äytyëkoyëty ja yajkutujkpë David mëti'ipë ojts kë'ëm xywyin'ixyën.

¹¹ Yë Wintsën ojts yë waantakën tuny mëët yë David, ma y'ënänyën ko tääpë waantakën ka'ap tjëkyepy tyëkoyëty.

¹² Nëjkxëpës npëjktä'äky tu'uk yë m'u'unk m'ok mëti'ipë yajkutukëpën. Pën yë m'u'unk m'ok tyuuntëp ijxtëm ja n'aaw n'ayukës y'ënä'änyën, ets pën pyatuuntëp ja ënä'ämën tëyajtën mëti'ipës nmo'ojantëpën, näjyëtu'un ja y'u'unk y'ok nëjkx yajkutuktë xëmëkyëjxm.

¹³ Yë Wintsën tëë twin'ixy yë Sión kopk. Yë'ë kë'ëm të twin'ixy ets jam tsyëënëja'any.

¹⁴ Jam ma tääpë kopkën, jamës n'ita'any; ma yë'ëjën xëmë njuuky'ata'anyës, jä'ä ko jamës jotkujk nnäjyawëty.

¹⁵ Mëj këjääjës nkënu'kxa'any yë jyi'kxy pyiky, ets ku'uxyës nyaj'ita'any yë jyä'äyëty mëti'ipë ëyoow jotëkooytyëpën.

¹⁶ Nkënu'kxäämpyës yë teetyëjk mëti'ipë jap tuuntëpën tsajptëkoty, ëjts nyajkutukäämpy ets xyi'iktëty xyontëty mëët ja xoontakën mëti'ipë oy mmëtuunëpën.

¹⁷ Ëjts n'ëwa'atsäämpy ets ja David ja y'ënä'ämën kyutujkën jam jatëkok tsyo'onta'akëty, tëës tu'uk ja kutë'kxn nnipëjktaakë mëti'ipë kutë'kx kujajëtëpën ja nyajkutujkpës.

¹⁸ Tëkokyë ja myëtsiptëjk tsëtyu'unmëëtës nyajwë'ëma'any e yë'ë mëj'äämpy y'ita'any.