Salmos 130 - Biblia Dc en Mixe de Quetzaltepec

Salmo 130 Ko ja Wintsën yi'iyë tu'ukyë ntukjotkujk'ajtmëty

¹ Maas ëjts yajxon mon tuk nyajpaatyën, jää mijts nmëkäjpxy Wintsën.

² Wintsën, mëtoow'ijtkës yë n'aaw n'ayuk. Tuk'akon yë mtatsk maas nyä'äxy njokyën ets ma npa'tmëkäjpxyën.

³ Wintsën, Wintsën, ko jeexyë mijts xy'ëkmëjpëjktä'äky yë nëë poky, ni pën jeexyë kyajuuky'äty

⁴ E mëët yë'ë ko jam ma mijtsën npaatës yë pokymyä'kxën ets myajmëjjawë.

⁵ Yajxon ëmuumtu'ukjot n'ëwxityës yë Wintsën, n'ëwxityës jëtu'un yë nWintsënës, ets y'aaw y'ayuk yë'ëjës ntuk'ijxpejtyp.

⁶ Ëjts n'a'ijxyp njëjp'ijxypyës yë Wintsën jëtu'un tä y'a'ix jyëjp'ixtën yë këwent'ajtpëtëjkëty mëti'ipë yë naax kajpn y'ijx'ijt kyëwent'ajtëpën jopyëp.

⁷ Mijts Israel, ëwxit yë mWintsën, ma yë'ëjën jam yajpaaty yë tsojkën ja'awën ets ëwaatsë'ajtën.

⁸ Yë'ë yajpokynyiwa'atsäämpy yë Israel kajpn oy ëxëëk të y'ëtë'ëtstë y'ëna'antë.