Salmos 128 - Biblia Dc en Mixe de Quetzaltepec

Salmo 128 Ja näkyënu'kxën mëti'ipë ja Wintsën yäjkpyën

¹ Janty jotkujk mijts myajpaaty mëët ko ja Wintsën xytsyoky xyjyawë ets ko xymyëmëtoy.

² Yë'ë mjë'kxëp mëti'ipë myajnimëjaawtäkpyën, janty jotkujk myajpaatëty ets oy tsuj mjuuky'atëty.

³ Jap ma ja mjëën mtëjkën yë mto'oxytyëjk jëtu'un jap y'ity tä tu'uk yë tsatym kyepyën mëët yë tyëëm; yë m'u'unk m'ëna'k ko nyaaxwäätstëty kaaypyäjn wintuuy jëtu'un jam myäy nyu'knëtëty tä yë kepyjyi'tskën mëti'ipë yajtijpën olivë.

⁴ Jëtu'un yë Wintsën tkënu'kxa'any ja ja'ay mëti'ipë ënety tukxoontakëpën ets oyjya'awëyëpën.

⁵ Yë Wintsën yë'ë mkënu'kxëtëp jam Sión, m'ixëp ko ënety ja Jerusalén kajpn akujk jotkujk yajpaaty mapaat mjuuky'ätyën.

⁶ Nëjkxëp xy'ixy ja m'ok u'unk m'ok ëna'k. Wä'än tjam'aty ja jotkujk'ajtën ma Israel ja'ayëtyën.