Salmos 125 - Biblia Dc en Mixe de Quetzaltepec

Salmo 125 Tios kyuwäämpy yë jyä'äy

¹ Tëkokyë ja'ayëty pënjaty yë Wintsën tyuk'ijxpäjtëpën, ka'ap nijëna'a yu'kxa'antë, jëtu'un yë'ëjëty tä yë Sión kopkën mëti'ipë xëmë ijtëëpën.

² Jëtu'un tä kopk na'ëwtitën yë Jerusalén kajpn, jëtu'un yë Wintsën na'ëwtity yë nyaax kyajpn tyimtso'ontä'äky tyam ets kë'ëyxyëëw kë'ëyjyëmëjt jëtu'un y'ity.

³ Tu'uk yë yajkutujkpë mëti'ipë ka'ap tukjatyën oy y'ënä'ämëty, ka'ap tjëkyepy jeky yajkutukëty ma naaxwiinyëtën mëti'ipë ja Dios të tmo'oyën ja nyaax kyajpn, jä'ä ko pën jëtu'un, tsojk ja'ay tii tuntëkoytyëty.

⁴ Wintsën, mijts m'oyjyawëp yë ja'ay mëti'ipë oyjyä'äyën, mëti'ipë oyjyot oywyinma'any myëët'ajtypyën.

⁵ Mëti'ipë ja në'ë tu'u ëxëëkpë kyuuynyëjkxtëpën, wä'än ëxëëk tjatë tä ja ëxëëkja'ayëtyën. Wä'än tjam'aty ja jotkujk'ajtën ma Israel kajpnën.