Salmos 122 - Biblia Dc en Mixe de Quetzaltepec

Salmo 122 Ma yajkuuy'iyën yë Jerusalén

¹ Wi'ixpëmës janty jotkujk nnäjyawëty koos xy'ënëëmëtë: Ja'amtë ma Wintsën yë jyëën tyëjkën.

² Jerusalén, tëës nja'të ma mkajpn yajnitëkën.

³ Jerusalén, ja kajpn mëti'ipë ojts yajtuknikojën ets ja ja'ay jam nimay myuktëty.

⁴ Ma yë'ëjën jam yë Wintsën yë jyä'äy myintë ets tmëjpëjkta'aktë Wintsën yë xyëëw jëtu'un tä ojts tuk'ëne'emyën ja Israel kajpn.

⁵ Ma yë'ëjën jam yajpaaty ja kutujktakn ma ja tuuntëko'oy kajpxtëko'oyën yajnipaye'eyën, ets ma ja David ja kyutujktakn yajpaatyën.

⁶ Amuumtu'ukjot nikajpxtë: Wä'än tjam'aty ja jotkujk'ajtën Jerusalén; ets wä'än tjuuky'atë jotkujk mëti'ipë mtsojkëyëp mja'awëpën.

⁷ Wä'än tjam'aty yë jotkujk'ajtën ma naax kajpnën; ets wä'än tjam'aty yë jotkujk'ajtën ma ja mkutujktaknën.

⁸ Tyam yë'ëjës n'ënëëmëjäämpy yë njëëky nmëku'ukës, ets mëti'ipës oy mëët nnäjyawëtyën ko wä'än tjam'aty yë akujkajtën jotkujk'ajtën ma mijtsën.

⁹ Mëëtkyëjxm yë Wintsën yë tsyajptëjk, yë'ëjës xëmë ntunäämpy mëti'ipë m'oyjya'apën.