Salmos 120 - Biblia Dc en Mixe de Quetzaltepec

Salmo 120 Tsajpkäjpxy ko pën ëtsë'ëkëtuuy yajpaaty

¹ Koos nnäjyawëty nmony ntuky pojënës yë Wintsën nmëkäjpxy, e yë'ë ënetyës xy'ëtsoy.

² Wintsën, këtii xy'ëwa'atsëty etsës nkajpxëty ja mëti'ipë ka'ap tyiyajtënëtyën, ka'apës mëpaat ja ëxëëkpë aaw ayuk nyajpëtsëmy.

³ ¿Tii mnapaatëp mijts aaw yä'än ko je'eyë m'anta'akëty?

⁴ Jëtu'un je'eyë mjatëty tä jeexyë tsiptuunpë ja'ay kyu'umën myajtukkumyën, ëkë jëtu'un tä jeexyë jëënpajk myajtuktsa'ayën.

⁵ Janty mon janty tukës nyajpaaty, koos jaaypyaat jaaypyo'kxyënës nyajpaaty ma Mésec y'itjotmën, jamës të ntsënaaytyaknpëky Cedar.

⁶ Jekyës yajxon të njuuky'äty ma ja'ayëtyën mëti'ipë ka'ap tsoktën ets jyää'atëty ja akujkajtën jotkujk'ajtën.

⁷ Koos njakäjpxy njamëtyä'äky ets jyää'atëty ja nämyë'oy'atë, yë'ëjëty tsiptuunk je'eyë y'akajpxtëp.