Salmos 12 - Biblia Dc en Mixe de Quetzaltepec

Salmo 12 Tsajpkäjpxy ma Tios yaj'amëtoyën näypyutëkë

¹ Wintsën, yajtsoktëkës. Jä'ä ko ka'ap ma pën ja'aynyë mëti'ipë oy mëpëjktëpën; ka'ap ma pën mëti'ipë mëtëy winë kyajpxtëpën.

² Aak näwyin'ë'ënëtëp nixim niyam; ko tii tnimëtya'aktë aak je'eyë y'etykyajpxtë.

³ Wintsën, wijxë'ëk mëët yë tyikts, mëti'ipë wiinkë'ëy akë'ëy tii nyimëtyäkpyën, ets je'eyë tii tyajmëtoyë,

⁴ mëti'ipë maaytyëp tajtëpën: Yi'iyë ko wiin aaw yajmëëtëty, yë'ë yajtukmëtakp, yë yä'än yë'ë kuwaanp. ¿Pën xy'ëk'ënä'ämëp?

⁵ Yë Wintsën jëtu'un të y'ënä'äny: Yë ëyoopëja'aytyëjk ets paki'ixtëjk; o'ktëypyë jyatën kyëpätën, mëti'ipë jëëytyëp yaxtëpën. Yë'ëjës yam mputëkëjantëp etsës nkuwa'ana'antë, ijxtëm yë'ë tsojkën'atën.

⁶ Mëti'ipë yë Wintsën wyinwa'anëpën wa'ats yë'ë; jëtu'un yë tyi'kxy tä yë poop pujxnën ni'ik wa'atspë mëti'ipë të wyintooywyä'ätsyën wëxtujk'ok jëënjoty.

⁷ Wintsën, mijtsës xykyëwent'atantëp; xëmës xykyuwa'ana'antë ma tääpë ëxëëkja'aytyëjkën.

⁸ Yë ëxëëkja'aytyëjkëty xiitsow yaatsow yajpaatë, ets tëkokyë ja'ay aakyë'ë y'oyjya'awëtyëp ëxëëktu'un ëxëëk kajpxën.