Salmos 119 - Biblia Dc en Mixe de Quetzaltepec

Salmo 119 Ma yajmëjpëjktä'äkyën ja Tios ja y'ënä'ämën tyiyajtën

¹ Janty jotkujk yë ja'ay jyuuky'atë mëti'ipë mëtëy winë tyuuntëpën ets yi'iyë pyanëjkxtëp mëti'ipë yë Wintsën y'ijxpëjkën'ajtypyën.

² Janty jotkujk yë ja'ay jyuuky'atë mëti'ipë jyä'äkyujkëtëpën ja Wintsën ja y'ënä'ämën tyiyajtën,

³ mëti'ipë ka'ap tii tuuntëkoy tkajpxtëkoytyën, mëti'ipë yi'iyë pyanëjkxtëpën ja Wintsën ja nyë'ë aaw tyu'u aaw.

⁴ Mijts Wintsën të xynyikäjpxy ets mtëyajtën yajpatunëty ijxtëm pyäätyën.

⁵ Jääpëkës jeexyë janty mëk xëmë n'ëkyajpaaty etsës jeexyë ja mtëyajtën npatuunta'ay.

⁶ Ka'apës nitii ntsëtyu'unjawëty koos npatunëty ja m'ënä'ämën mtëyajtën.

⁷ Amuumtu'ukjot mijts nmëjpëjkta'aka'any, koos ënety të njaty ja m'ënä'ämën mtëyajtën ja wa'atspë.

⁸ Ëjts npatunäämpyës yë m'ënä'ämën mtëyajtën. Këtiis mijts nijëna'a xy'ëxmats xymyajtstu'utëty.

⁹ ¿Wi'ix tu'uk yë yujkyeeky ëna'k oy tsuj y'ëkjuuky'atëty? Ko jyuuky'atëty ijxtëm yë m'aaw m'ayuk tnikäjpxyën.

¹⁰ Tyam mijts wine'aaw winëjot n'ixta'ay; këtii xyajkutukëty nijëna'a etsës yë mtëyajtën jëpëky jëtuny nyaj'itëty.

¹¹ Tyapës pëjkë'ëk nyaj'ity yë m'aaw m'ayuk maas yë njot nwinma'anyën; këtiipë jëna'a nmëtuuntëkoyëty.

¹² Kënu'kxy mëjjawë mijts m'itëty Wintsën. Tukni''ijxëkës yë m'ënä'ämën mtëyajtën.

¹³ Nnikajpxäämpy nnimëtya'akäämpyës tëkokyë yë m'aaw m'ayuk mëti'ipë mnikäjpxypën.

¹⁴ Ni'ikyës ntukxoonta'aka'any yë m'ënä'ämën mtëyajtën, ets ka'ap jyëtu'unëty yë kumeenyajtën.

¹⁵ Yë'ëjës nmëmayäämpy nmëtajäämpy yë m'ënä'ämën mtëyajtën, etsës yë nwinma'any jam npëjktaka'any ma mnë'ë mtu'ujën.

¹⁶ Janty jotkujkës nnäjyawëja'anyë mëët ko jää xyaj'ity yë m'ënä'ämën mtëyajtën, ka'apës nijëna'a nja'atyëkoyä'äny yë m'aaw m'ayuk.

¹⁷ Mo'o juukyajtën ya'atë mtuunpë. Ëjts mpatunäämpyës yë m'aaw m'ayuk.

¹⁸ Yajwatsëkës yë n'ijxën nko'owën, etsës n'oy'ixëty mëti'ipë mijts m'ijxpëjkën'ajtypyën.

¹⁹ Ëjts jaaypyaat jaaypyo'kxyënës yaa njuuky'äty naaxwiiny naaxkëjxy; këtiis xytyukwinkuyu'utsy yë m'ënä'ämën mtëyajtën.

²⁰ Je'eyës nyajpaaty janaam jatsojk janty määpy janty tajp koos njanijawëja'any mëti'ipë mijts mni'ënä'ämëpën.

²¹ Mijts ënätyë xy'ojy yë ja'ay mëti'ipë ëxëëk ëtëtsp ënaanpën ets mëti'ipë pokyëtyën, mëti'ipë ka'ap tunyën këwentë yë m'ënä'ämën mtëyajtën.

²² Yajjëwa'kës maas je'eyë xy'ojtën xya'axtën ets maas ka'ap xy'oy'ixtën, jä'ä koos nja'akyujkëpës yë m'ënä'ämën mtëyajtën.

²³ Oy yë kumeenyjyä'äytyëjkëty ets jotmëktëjkëty wi'ix xyatuna'antës, ya'atë mtuunpë yi'iyë myëmayäämpy myëtajäämpy yë m'ënä'ämën mtëyajtën.

²⁴ Ëjts janty jotkujkës nnäjyawëty ko jyääjëty yë m'ënä'ämën mtëyajtën; yë'ëjës xy'ëëwij xykyajpxwijtëp.

²⁵ Janty o'kën jëjp'amës nnäjyawëty; mooykyës yë juukyajtën ijxtëm të xywyinwanën.

²⁶ Tëë ntuk'ixy wi'ixës oy winë ntuny nkäjpxyën, ets tëë mijts oy xy'ëëw'ëtsoy xykyajpx'ëtsoyës. Tukni''ijxëkës yë m'ënä'ämën mtëyajtën.

²⁷ Mooykyës yë ijxkujk ja'aykyujkën etsës yajxon npatunëty yë m'aaw m'ayuk, ëjts yi'iyës nmëmayäämpy nmëtajäämpy wi'ix mijts mëj këjää winë xytyunyën.

²⁸ Mon tukës nyajpaaty mëët ja pëjkën ijxën, je'eyës xëmë nmëjë'ëy nmëyä'äxy; mooykyës yë juukyajtën ijxtëm të xywyinwanën.

²⁹ Tukukäkës ja win'ë'ënën antakën, ets yë'ëjës tukmëtsojk yë m'ijxpëjkën.

³⁰ Tëës nwin'ixy ja në'ë tu'u mëti'ipë tëyën, n'oyjya'apës yë m'aaw m'ayuk tëëpë xykyäjpxyën.

³¹ Wintsën, ëjts yë'ëjës të nmëjwa'kpety yë m'ënä'ämën mtëyajtën; këtii xyajkutukëty etsës nwë'ëmëty tsëtyu'unmëët.

³² Ëjts poj'amës njapatuunta'aja'any yë m'ënä'ämën mtëyajtën, jä'ä ko janty jotkujkës nnäjyawëty mijts xyaj'ity yë njot nwinma'anyës.

³³ Wintsën, tukni''ijxëkës wi'ixës mpatunëty yë m'ënä'ämën mtëyajtën, jä'ä ko yë'ëjës npanëjkxäämpy mapaat jyëjpkëxyën.

³⁴ Mooykyës yë wij'ajt kujk'ajtën wi'ixës mpëjkë'ëkëty yë m'ijxpëjkën; yë'ëjës nmëmëtowäämpy ëmuumtu'ukjot.

³⁵ Jamës woownëjkxk ma ja m'ënä'ämën mtëyajtën yajpaatyën, jä'ä ko jotkujkës jam nnäjyawëty.

³⁶ Mijts myajkutukëp etsës yë njot nwinma'any tsojkën'atëty yë m'ënä'ämën mtëyajtën ets këtii yë'ë ja wit meeny mëti'ipë ja win'ë'ënën mëët yajpaatyën.

³⁷ Këtii xy'ëwa'atsëty etsës jam nkëx'ixëty ma ja ka'apë tyiosëtyën; mooykyës yë juukyajtën etsës yë mnë'ë mtu'u npanëjkxëty.

³⁸ Tuk'ëwaanë jatëkok ya'atë mtuunpë ja waantakën mëti'ipë të xytyukwinjawën ja ja'ay mëti'ipë mwinkutsë'këyëpën.

³⁹ Jëpëk ja näy'ojë mëti'ipës ntsë'këpën, jä'ä ko mijts yë m'ënä'ämën oyëty kyäjpxy.

⁴⁰ Ëjts yë'ëjës të ntsojkën'aty mëti'ipë mijts të xynyi'ënä'ämën; mooykyës yë juukyajtën, mijts aak'oy winë xytyuny.

⁴¹ Wintsën, tuk'ijxkës yë mtsojkën mja'awën ets myajnitsokën, jëtu'un ijxtëm të xywyinwanën.

⁴² Jëtu'un tjëkyäpëty n'ëtsowëtyës mëti'ipës xyajjoot'anpëjkpën, jä'ä ko yë'ëjës ntuk'ijxpejtyp yë m'aaw m'ayuk.

⁴³ Këtii xyajjëwa'akëty ja tëyajtënpë maas tii nnikäjpxy nnimëtyä'äkyën, tëës tu'ukyë yë nwinma'any npëjktä'äky ma m'aaw m'ayukën.

⁴⁴ Npatunäämpyës yë m'ijxpëjkën xëmëkyëjxm.

⁴⁵ Jëtu'unës jotkujk njuuky'atëty, jä'ä ko yë'ëjës mpanëjkxyp yë m'ënä'ämën mtëyajtën.

⁴⁶ Nimëtya'akäämpyës yë m'ënä'ämën mtëyajtën ma ënä'ämpëtëjkëtyën, ets ka'apës ntsëtyuna'any,

⁴⁷ jä'ä ko ëjts ntsojkpyës ets n'oyjya'apës yë m'ënä'ämën mtëyajtën, ets jotkujkës nnäjyawëty mëët yë'ë.

⁴⁸ Ntsojkpy nja'apës yë m'ënä'ämën mtëyajtën ets jamës yë nwinma'any kyatsoony ma m'aaw m'ayukën.

⁴⁹ Ja'amyäts ja m'aaw m'ayuk mëti'ipë mmooyën ya'atë mtuunpë; yë'ëjës ojts xyajjotkujkë.

⁵⁰ Yë'ëjës xyajjotkujktakp koos nmony ntuky, ets mëët koos winë xytyukwinwanë, oyës njuuky'äty.

⁵¹ Yë ja'ayëty ëxëëkpë jyot wyinma'anyëtyën janaam jatsojk xyajjoot'anpëktës e ka'apës n'ëxmatsy yë m'ijxpëjkën.

⁵² Wa'atsës nja'amyetsy wi'ix ojts tëëyëp yë m'aaw m'ayuk xyajwë'ëmyën; ma m'aaw m'ayukën, Wintsën, jamës yë njotkujk'ajtën npaaty.

⁵³ Ëxëëkës xyajjoot'anpëktë yë ëxëëkja'aytyëjk mëti'ipë jyëjpwa'ktutëpën yë m'ijxpëjkën.

⁵⁴ Maas ëjts jaaypyaat jaaypyo'kxy nyajpaatyën, yë m'ënä'ämën mtëyajtën yë'ëjës xëmë janty xoontä'äky xyaj'ijtp.

⁵⁵ Wintsën, ko kyoots'aty mijts nja'amyejtsyp; ëjts nkuuytyunäämpyës mijts yë m'ijxpëjkën.

⁵⁶ Ya'atës ëjts xypyatp koos nkuuytyunëty yë m'ënä'ämën mkutujkën.

⁵⁷ Wintsën mijtsyë tu'ukyë nmëët'ajtyp, tëës n'ëna'any koos npatuna'any ja m'aaw m'ayuk.

⁵⁸ Winë aaw winëjotës n'ëna'any koos ntuna'any mëti'ipë m'oyjya'apën; jëtu'unës jotkujk yaj'ijtk ijxtëmës të xytyukwinwanën.

⁵⁹ Ënätës të nmëmay të nmëtajy wi'ixës winë ntunyën, täätsës jatëkok të n'ëna'any ni'ik jaak'oy yowë koos yë m'ënä'ämën mtëyajtën nkuuytyunëty.

⁶⁰ Ëjts janty pe'tymyës të nnäkyojyë, ka'apës nëkoo të npo'oxy etsës të npatuny ja m'ënä'ämën mtëyajtën.

⁶¹ Xii yaa muum yë ëxëëkja'aytyëjk yë n'o'ktaknës yu'utsypë të tjapëjkta'aktë, e ëjts ka'ap nijëna'a të nja'atyëkoyës yë m'ijxpëjkën.

⁶² Ko kyujkytsyu'um'aty, jääjës npëtë'ëky etsës nyajnaxy yë kukkajpxën ja'awëkyëtakkën ma mijtsën, mëët ko ja m'aaw m'ayuk y'oyëty ets tyiyajtënëty.

⁶³ Ëjts xy'oyjya'awëtyëpës yë ja'ayëty nitëkokyë jënu'un oy mmëjjaw mkënu'kxyjyawëtyën ets mëti'ipë pyatuuntëpën yë m'aaw m'ayuk.

⁶⁴ Wintsën, mijts mtsojktääpy mja'awëtyääpy yë naaxwiinyëtë ja'ay; tukni''ijxëkës wi'ixës mëpaat npatunyën yë m'ënä'ämën.

⁶⁵ Wintsën janty'oy të xymyëët'aty ya'atë mtuunpë, jëtu'un ijxtëm ojts xywyinwanën.

⁶⁶ Tukni''ijxëkës wi'ixës mëpaat winma'anymyëët njuuky'ätyën ets jaakmooykyës yë nija'awën, jä'ä ko ëjts yi'iyës ntuk'ijxpejtyp yë m'ënä'ämën mtëyajtën.

⁶⁷ Maanëmës ënety ka'ap ëxëëk njaty nkëpetynyëmën, ojtsës wiinkjaty winë ntuny, e tyam yë'ëjës nmëmëtoopy yë m'aaw m'ayuk.

⁶⁸ Mijts janty'oy mTios'aty ets aakyë'ë mtuumpy yë oypyë; tukni''ijxëkës yë m'ënä'ämën mtëyajtën.

⁶⁹ Yë ëxëëkja'aytyëjkëty ëxëëkjatyës xynyikajpx xynyimëtya'aktë, e ëjts ntukxoontäkpyës yë m'ijxpëjkën.

⁷⁰ Yë'ëjëty tëë yë jyot wyinma'any jyo'ptaaynyëtë, e ëjts ntukxoontäkpyës mëti'ipës mijts xytyukni''ijxëpën.

⁷¹ Nikë tëë tyim'oyë koos ëxëëk të njaty, jëtu'un'äämpyës të nja'akyukë etsës të nnijawë yë m'ënä'ämën mtëyajtën.

⁷² Mëët ëjts, ni'ikës njawë tsyowpaaty yë m'ijxpëjkën mëti'ipë mijts mnikäjpxy mnimëtyäkpyën, këtiinëm jyëtu'unëty mëjpë këjääpë wit meeny, ijxtëm pu'ts pujxn poop pujxnën.

⁷³ Mijts ojts kë'ëm xy'oytyunyës etsës ojts xyajkojy, mooykyës yë wijyajtën etsës njatëty yë m'ënä'ämën mtëyajtën.

⁷⁴ Mëti'ipëjaty oy mëtuunëpën janty jotkujk nyäjyawëja'anëtë koos xy'ixtëty, jä'ä ko ëjts jamës tu'ukyë yë nwinma'any të npëjktä'äky ma m'aaw m'ayukën.

⁷⁵ Wintsën, ëjts wa'atsës nnijawë ko yë m'aaw m'ayuk mëti'ipë të xyajwë'ëmyën, wa'ats yë'ë ets mëtëy; mijts tap ja winma'any xymyëëtëty tiikyëjxm koos xyajmony xyajtuky.

⁷⁶ Wä'änës yë mtsojkën mja'awën xyajjotkujk'aty, jëtu'un ijxtëmës ojts xytyukwinwanën.

⁷⁷ Tuk'ijxkës yë mjot mwinma'any oypyë tsujpë, ets yajjuuky'ajtkës, ëjts janty jotkujkës näjyawëty koos npatuny ja m'ijxpëjkën.

⁷⁸ Wä'än tsëtyu'unmëët twë'ëmtë ja ja'ayëty ëxëëkpë jyot wyinma'anyëtyën mëti'ipëjaty nanëkookyëjxm ëxëëk xytyuuntëpës, ëjts yi'iyës nmëmayäämpy nmëtajäämpy ja m'aaw m'ayuk.

⁷⁹ Wä'än tnämyukëtë mëët ëjts tëkokyë ja ja'ayëty mëti'ipë mwintsë'këtëpën ets mmëjja'awëyëpën, ets mëti'ipë nyija'awëtëpën ja m'ënä'ämën.

⁸⁰ Yi'iyë tu'ukyë nkuuytyunäämpyës yë m'ënä'ämën mtëyajtën winë aaw winëjot, jëtu'un ka'ap tii tsëtyu'un nmëët'atëtyës.

⁸¹ Janty jëtu'unës n'ëwxijnë etsës mijts xyajtso'okëty; jamës tu'ukyë të npëjktä'äky yë nwinma'any ma m'aaw m'ayukën.

⁸² Ënu'kxënëpës yë nwiin ko ntyäty y'ëwxity etsës nmay ntajy: ¿Jëna'ajës xymyo'oja'any ja jotkujk'ajtën?

⁸³ Oyës tëë nmëjja'ayënë, ka'apës nitii n'ëktuunë ets ja'atyëkoyës n'ijnë, ëjts ka'apës nja'atyëkoy ja m'ënä'ämën mtëyajtën.

⁸⁴ ¿Jënaak jëmëjtës n'ëwxitëty? ¿Jëna'ajës xynyipaye'eyä'äny ets xytyukkumëtowëty ja nyëë pyoky ja ja'ayëty mëti'ipës xy'ixjëtijt xypyajëtijtëpën?

⁸⁵ Ja'ay mëti'ipë ëxëëk yë jyot wyinma'any myëët'ajtypyën ka'apë tmëjpëjktä'äkyën yë m'ijxpëjkën.

⁸⁶ Putëjk pupäjtkës, ëjts nanëkoojës yë ja'ay xy'ixjëtity xypyajëtity. Yë m'ënä'ämën aak mëtëy yë'ë.

⁸⁷ Ëjts jawäänës të nkayajjo'otsy naaxwiiny naaxkëjxy, je'eyëp ko ka'apës të n'ëxmatsy yë n'ënä'ämën mtëyajtën.

⁸⁸ Mooykyës yë juukyajtën mëët yë mtsojkën mja'awën, etsës npatunëty ja m'ënä'ämën mëti'ipë të xynyikäjpxyën.

⁸⁹ Wintsën, yë m'aaw m'ayuk winë xëëw winë jëmëjt yë y'ity; ta'tspëky jam y'ity tsajpjotm.

⁹⁰ Yë mwa'atsajtën winë xëëw winë jëmëjt yë y'ity. Mijts ojts xyajta'tspëky yë naaxwiinyëtë, ets jëtu'un ojts wyi'imy.

⁹¹ Aak ta'tspëky winë y'ity, jëtu'un ijxtëm ja m'ënä'ämën mtëyajtën y'ënä'änyën, jä'ä ko yë'ëjëty aakmijts mmëtuunëp.

⁹² Ko jeexyë yë m'ijxpëjkën ka'ap xyajjotkujktä'äkyës, yë monyëtukyë jëna'ajëpës jeexyë xyajkëjxnë.

⁹³ Kajëna'ajës nkaja'atyëkoyëty yë m'ënä'ämën mtëyajtën, jä'ä ko yë'ëkyëjxm të npaatyës yë juukyajtën.

⁹⁴ Yajtsokës, jä'ä ko mijtsës xyjyä'ä'ajtp, ëjts yi'iyës npanëjkxyp yë m'ënä'ämën mtëyajtën.

⁹⁵ Ja ëxëëkja'aytyëjkëty yë'ë y'ëwxijtëp jëna'ajës xy'ëkyajkutëkoytyë, e ëjts yi'iyës nmëmääpy nmëtäjpy mëti'ipë mni'ënä'ämëpën.

⁹⁶ Tëës n'ixy ko tëkokyë jënu'un winë y'ityën, këjxp najxp yë'ë, e yë m'ënä'ämën mtëyajtën ka'ap yë kyixy nyäxy.

⁹⁷ Mëkës ntsojkën'aty yë m'ënä'ämën mtëyajtën. Ko nyäxy yë xëëw po'o yi'iyës nmëmääpy nmëtäjpy.

⁹⁸ Yë m'ënä'ämën mtëyajtën ëjts yë njä'ä'ajtyp xëmë. Jaakwäänë ni'ikës të xyajwijytyä'äky këtiinëm jyëtu'unëty yë nmëtsiptëjkës.

⁹⁹ Wa'atsës ni'ik winë nja'akyukë këtiinëm jyëtu'unëty mëti'ipës xyaj'ijxpëjktëpën, jä'ä ko yi'iyës nmëmääpy nmëtäjpy yë m'ënä'ämën mtëyajtën.

¹⁰⁰ Wa'atsës ni'ik winë nja'akyukë këtiinëm jyëtu'un'atë yë mëjja'aytyëjk, jä'ä ko nmëmëtoopyës yë m'ënä'ämën mtëyajtën.

¹⁰¹ Tëës yë nkë'ë nteky njëpëky ma ja në'ë tu'ujën ëxëëkpë, jä'ä ko yë'ëjës ntunäämpy ijxtëm yë m'aaw m'ayuk y'ënä'änyën.

¹⁰² Ëjts ka'apës nijëna'a të n'ëxmatsy yë m'ënä'ämën mtëyajtën, jä'ä ko mijtsës winë xytyukni''ijxëp.

¹⁰³ Janty pa'akës njawë xy'atëkë yë m'aaw m'ayuk ko tii xynyikäjpxy ka'ap jyëtu'unëty yë uuxpa'ak.

¹⁰⁴ Ma m'ënä'ämën mtëyajtën të nyajpëtsëmyës yë ijxkujk ja'aykyujkën, paaty n'ëxëëk'ixyës ja ëxëëktu'un ëxëëk kajpxën.

¹⁰⁵ Yë m'aaw m'ayuk yë'ëjës xykyutë'kxp maas nnëëye'ey ntu'uye'eyën, ets jëtu'un yë'ë tä tu'uk yë jajën të'kxënën ntu'ujotyës.

¹⁰⁶ Ojts tu'uk yë waantakën ntunyës, ets kopkpëky ko nkuuytyuna'anyës. Ëjts nkuuytyunäämpyës yë m'ënä'ämën mtëyajtën mëtëypyë.

¹⁰⁷ Wintsën, ëjts janty mon janty tukës nnäjyawëty. Mooykyës yë juukyajtën ijxtëm të xywyinwanën.

¹⁰⁸ Wintsën, tyam mijts nmëjjaw njaantyjyawë mëët yë n'aaw n'ayukës, ets nmo'oy ya'atë tä tu'uk wintsë'kënën, tukni''ijxëkës ja m'ënä'ämën mtëyajtën.

¹⁰⁹ Ëjts janty o'kën jëjp'amës xëmë nyajpaaty, je'eyëp ko ka'ap nja'atyëkoyës yë m'ijxpëjkën.

¹¹⁰ Yë ëxëëkja'aytyëjk kanaak yë n'o'ktaknës tjajantynyi'ixëtë etsës xyaj'ooka'antë; e ëjts ninu'unës nkaja'atyëkoy yë m'aaw m'ayuk.

¹¹¹ Ëjts jëtu'unës njawë yë m'ënä'ämën mtëyajtën tä tu'uk yë kuma'ayënën winë xëëw winë jëmëjtpë y'ityën, jä'ä ko yë'ëjëty yajjotkujkëp yë njot nwinma'anyës.

¹¹² Ëjts tëës ntuknipëjktaakë winë aaw win jot koos mpatuna'any yë m'ënä'ämën mtëyajtën, winë xëëw winë jëmëjt mapaatës njuuky'ätyën.

¹¹³ N'ëxëëk'ijxypyës yë ja'ay mëti'ipë wiinkë'ëy akë'ëy ja'ay'ajtpën, yë'ëjës ntsojkpy nja'ap yë m'ijxpëjkën.

¹¹⁴ Mijtsës xypyu'ëw xypyukajpxëp ets mijtsës xykyuwaanp; ma m'aaw m'ayukën, jam yajpaaty mëti'ipës n'a'ijxyp njëjp'ijxypyën.

¹¹⁵ Winwa'ktutëkës miitsëty ëxëëkja'aytyëjkëty, ëjts Tiosës yë y'ënä'ämën tyiyajtën npatunanëp.

¹¹⁶ Mooykyës yë mëjaaw mëk'ajtën jëtu'un ijxtëm të xywyinwanën, etsës njuuky'atëty. Këtiis ëxëëk xyajwë'ëmëty ma mëti'ipës n'ëwxijtypë.

¹¹⁷ Putëjkëkës etsës nitso'okëty; jëtu'un npatunëtyës ja m'ënä'ämën mtëyajtën.

¹¹⁸ Mijts ka'ap xy'oyjawë ja'ay mëti'ipë myëjëkämkekpyën yë m'ënä'ämën mtëyajtën, jä'ä ko jyot wyinma'anyëty nijënu'un oy kyamay kyatajy.

¹¹⁹ Yë ëxëëkja'aytyëjk mëti'ipë naaxwiiny juuky'ajtëpën jëtu'un xyjyawë tä aay pu'uxmën, paatyës yë'ë ni'ik ntsoky yë m'ënä'ämën mtëyajtën.

¹²⁰ Tsëyuupyës yë njot nini'kx mijts mwintuuy mëët yë tsë'ëkë. Ëjts nwinkutsë'këpës yë m'ënä'ämën mtëyajtën.

¹²¹ Nijëna'ajës të nkamajtstu'uty ja oypyë tu'unën kajpxën. Këtiis xykyë'ëyakëty ma ja nmëtsiptëjkës ja kyë'ë y'aawën, mëti'ipë tëytyuuntëpën.

¹²² Mijtsës oy xyaj'itëp; ka'apës mëpaat ëxëëk njaty nkëpety ma ja ëxëëkja'ayëtyën.

¹²³ Tëës yë nwiin nya'ënu'kxënë koos yi'iyë ntsäty'ëwxity jëna'ajës xyajtso'oky, koos ntsäty'ëwxity jëna'ajës xy'ëkyaj'ëwaatsëpëtsëmy, ijxtëm të xywyinwanën.

¹²⁴ Mëët'at ya'atë mtuunpë mëët ja mtsojkën mja'awën; tukni''ijxëkës yë m'ënä'ämën mtëyajtën.

¹²⁵ Ëjtsës mijts xytyuunpë'ajtp. Mooykyës yë ijxkujkën ja'aykyujkën; nnijawëjäämpyës yë m'ënä'ämën mtëyajtën.

¹²⁶ Wintsën, tëë yë xëëw po'o tpaaty ets tii xytyunëty, ma ja ja'ayëtyën mëti'ipë ka'ap tpatuntën ja m'ënä'äm mtëyajtën.

¹²⁷ Paaty ëjts mëkës ntsoky njawë yë m'ënä'ämën mtëyajtën këtiinëm jyëtu'unëty yë wa'ats pu'ts pujxn.

¹²⁸ Paaty yë'ë nnätyuktu'uwinwoyës yë m'ënä'ämën mtëyajtën, n'ëxëëk'ijxypyës yë tu'unën kajpxën ëxëëkpë.

¹²⁹ Yë m'ënä'ämën mtëyajtën janty'oy janty tsuj yë'ë, paatyës nkuuytyuny.

¹³⁰ Ko yë m'aaw m'ayuk yajkäjpxy yajmëtyä'äky, kyutë'kxyp yë jot winma'any, ets yajwijytyäkpy yë ja'ay mëti'ipë yu'unk naxym ja'ay'ajtpën.

¹³¹ Ëwë'ëkës n'ity, jëtu'un tä tii jëyujk tyëëtsën, ko ja m'ënä'ämën mtëyajtën yë'ë ntsojkën'atyës,

¹³² Ni''ijxkëtakës ets mëët'at ja pa'ëyo'owën najts'ëyo'owën mëët ëjts, jëtu'un ijxtëm xypya'ëyoyën yë ja'ay mëti'ipë mtsojkpy mja'apën.

¹³³ Yajtu'uye'eykyës jëtu'un ijxtëm ja m'aaw m'ayuk y'ënä'änyën; këtii xy'ëwa'atsëty ets ja ëxëëkpë xymyëmëta'akëtyës.

¹³⁴ Yajpëtsëëmkës ma ja ja'ay ëxëëk winë tuny tkäjpxyën, ëjts yi'iyës nkuuytyunäämpy ijxtëm ja m'ënä'ämën mtëyajtën y'ënä'änyën.

¹³⁵ Ni''ijxkëta'ak ya'atë mtuunpë, ets tukni''ijxëkës yë m'ënä'ämën mtëyajtën.

¹³⁶ Komkomëty yë nwiinnëëjës pyëtsimy tä yë mëjnëë pyëyi'ikyën mëët ko ja naaxwiinyëtë ja'ay ka'ap tpatuny ja m'ijxpëjkën.

¹³⁷ Wintsën, mwa'ats mijts ets aak tëyajtën winë xytyuny, tëkokyë yë m'aaw m'ayuk aak tim tëyajtën yë'ë.

¹³⁸ Tëkokyë yë m'ënä'ämën mtëyajtën aak wa'ats yë'ë ets aak tëyajtën,

¹³⁹ Yajxonës njantyjyootanpëky koos yë nmëtsip ja'atyëkoy yë m'aaw m'ayuk tyaj'itë.

¹⁴⁰ Yë mwaantakën tëë ëxëëkpë tsaatsypë tmënaxy tyajnaxy, paaty ya'atë mtuunpë tsoky tjawë.

¹⁴¹ Ëjts ëmaay amutskës nja'ay'äty ets ixtijy ëxwa'anyës n'ity; e yë m'aaw m'ayuk ka'apës nijëna'a nja'atyëkoy.

¹⁴² Yë oypyë mnipaye'eyën mëtëy xëmë y'ity, yë m'ijxpëjkën tëyajtën yë'ë.

¹⁴³ Tëës nyajpaaty mon tuk ets tëës nyajpaaty ëyo'onjoty jotmayjoty, e yë m'ënä'ämën mtëyajtën yë'ëjës të xyajjotkujktä'äky.

¹⁴⁴ Yë m'ënä'ämën mtëyajtën aak'oy winë tuny, mooykyës yë wijyajtën kujk'ajtën etsës njuuky'atëty.

¹⁴⁵ Wintsën, mijts nmëkäjpxyp winë aaw winëjot; ëtsoowkës, yë m'ënä'ämën mtëyajtën npatunäämpyës.

¹⁴⁶ Mijts yam nmëkäjpxyp, putëjkëkës, etsës nkuuytyunëty ja m'ënä'ämën mtëyajtën.

¹⁴⁷ Maanëm ka'ap xyiintyä'äkynyëm, jääjës npëtë'ëky ets n'amëtoy npëjktsoyës yë mputëjk mpupäjtën, ëjts n'a'ijxyp njëjp'ijxypyës ja mëti'ipë të xywyinwanën.

¹⁴⁸ Maanëm ka'ap kyootsënëm, jëjp'ixyës nyajpatnë ets nmëmayä'äny nmëtaja'anyës ja mëti'ipë të xywyinwanën.

¹⁴⁹ Wintsën, mëtoow'ijtkës ja n'aaw n'ayuk mëët ja mtsojkën mja'awën oypyë tsujpë, mooykyës ja juukyajtën, ijxtëm ja mtëy'ajtënën.

¹⁵⁰ Janty winkon yajpaatë ma ëjtsën ja ëxëëkja'aytyëjk mëti'ipës xy'ixjëtijt xypyajëtijtëpën, yë'ë myëjëkäm'ajtëp ja m'ijxpëjkën.

¹⁵¹ Mijts Wintsën, winkon myajpaaty, ets tëkokyë yë m'ënä'ämën mtëyajtën aak mëtëy yë'ë.

¹⁵² Tëëyëp tsyo'ontaknë maas nnijawën yë m'ënä'ämën mtëyajtën mëti'ipë ojts kë'ëm xypyëjktä'äkyën ets y'itëty winë xëëw winë jëmëjt.

¹⁵³ Ëk'ix wi'ixës ëxëëk njaty nkëpetyën ets yaj'ëwaatsëpëtsëëmkës; ëjts ka'apës nijëna'a nja'atyëkoy mëti'ipë mijts m'ijxpëjkën'ajtypyën.

¹⁵⁴ Mijtsës xynyikajpxtu'utëp etsës xyajpëtsëmëty jotmayjoty; mooykyës yë juukyajtën jëtu'un ijxtëm të xywyinwanën.

¹⁵⁵ Yë ëxëëkja'aytyëjk myëjëkäm'ajtëp yë mputëjk mpupäjtën, jä'ä ko ka'ap tkuuytyuntë ja m'ënä'ämën mtëyajtën.

¹⁵⁶ Wintsën, mëj këjää yë m'oyjot m'oywyinma'any, mooykyës ja juukyajtën, ijxtëm ja mtëy'ajtënën.

¹⁵⁷ Janty nimay yë nmëtsipës, ets nimay oy mëti'ipës ëxëëk xytyuuntëp xynyëmaaytyëpën, e ëjts ka'apës n'ëxmatsy yë m'ënä'ämën mtëyajtën.

¹⁵⁸ Nkatimy'ixäämpyës yë ja'ay mëti'ipë jyiiky myëku'uk kyë'ëyajktëpën, mëti'ipë ka'ap tpatuntën ja m'ënä'ämën mtëyajtën.

¹⁵⁹ Wintsën, mijts kë'ëm ix tun wi'ixës ntsokyën yë m'ënä'ämën mtëyajtën; mooykyës yë juukyajtën, koos xytsyoky xyjyawë.

¹⁶⁰ Ma ja m'aaw m'ayukën yajpata'ay ja tëyajtën. Winë xëëw winë jëmëjt y'ity tu'kë'ëyë m'ënä'ämën mtëyajtën, mëti'ipë mëtëyën ets wa'atsën.

¹⁶¹ Yë ja'ayëty mëti'ipë ënä'ämtëpën yajkutujktëpën, yë'ëjës xy'ixjëtijt xypyajëtijtëp nanëkoo, ëjts ka'apës ma tii ntuuntëkoy; yë njot nwinma'anyës yë'ë wyinkutsë'këp yë m'aaw m'ayuk.

¹⁶² Ëjts janty jotkujkës nnäjyawëty koos të xytyukwinwanë winë, jëtu'unës nnäjyawëty tääjës jeexyë yë pu'ts pujxn muum may të npaatyën.

¹⁶³ N'ëxëëk'ijxypyës ko pën wyin'ëëny, jëtu'unpë ja'ay ka'apës ntimwyintänëja'any; e ëjts njantytsyojkën'ajtypyës yë m'ijxpëjkën.

¹⁶⁴ Janaam jatsojk mijts ntukxoontä'äky mëët ko ja m'aaw m'ayuk mëti'ipë të xyajwë'ëmyën aakyë'ë tëyajtënpë.

¹⁶⁵ Tëkokyë jënu'un tkuuytyuntën yë m'ënä'ämën mtëyajtën janty jotkujk yajpaatë ets ni pën wi'ix kyatunëtë.

¹⁶⁶ Wintsën, ëjts n'a'ijxyp njëjp'ijxypyës etsës xyajtso'okëty, jä'ä ko ëjts nkuuytyuunpyës yë m'ënä'ämën mtëyajtën.

¹⁶⁷ Ëjts nmëmëtoopyës yë m'ënä'ämën mtëyajtën, ets ntsojkpyës n'oyjya'apës winë aaw winëjot.

¹⁶⁸ Ëjts nmëmëtoopyës yë m'ënä'ämën mtëyajtën ets m'ënä'ämën mkutujkën: Mijts wa'ats xynyijawë wi'ixës tii ntunyën.

¹⁶⁹ Jajtp jam yë mëto'owën ma mijtsën koos nyä'äxy njoky; mooykyës yë wijyajtën kujk'ajtën, jëtu'un ijxtëm yë m'aaw m'ayuk y'ënä'änyën.

¹⁷⁰ Jajtp jam yë nkajpxtakënës ma mijtsën; yajtsokës jëtu'un ijxtëm të xywyinwanën.

¹⁷¹ Mëët yë n'aawës mijts nmëjpëjktä'äky, jä'ä ko tëës xytyukni''ixë yë m'ënä'ämën mtëyajtën.

¹⁷² Nkuuy'iipy nkuuyyäxypyës ja mëti'ipë të xywyinwanën, jä'ä ko tëkokyë yë m'ënä'ämën mtëyajtën aak mëtëy yë'ë.

¹⁷³ Jëjp'ixy mtimy'itëty mëët ja mmëkajtën koos ja näypyutëkë ntsokëty, jä'ä ko kë'ëmës të nwin'ixy koos npatuna'any ja m'ënä'ämën mtëyajtën.

¹⁷⁴ Wintsën, ëjts ntsojkpyës ets mijts xyajnitso'okëtyës. Ëjts janty jotkujkës nnäjyawëty mëët yë m'ijxpëjkën.

¹⁷⁵ Ëjts ntsojkpyës ja juukyajtën jä'ä ko mijts nyajmëjnaxäämpy, yë mëtëypyë mnipaye'eyën yë'ëjës xypyutëkëp.

¹⁷⁶ Jëtu'unës nnäjyawëty të nye'eytyëkoy tä yë kupixyny u'unk muum ye'eytyëkoyën; nimiinkës etsës xy'ixta'ajëty, ëjts ka'apës tu'ukyë ntimjyä'ätyëkoy ja m'ënä'ämën mtëyajtën.