Salmos 118 - Biblia Dc en Mixe de Quetzaltepec

Salmo 118 Yë Wintsën yë myëj'ajtën kyutujkën mëj këjää yë oy

¹ Kukajpxëtë ja'awëkyëta'aktë yë Wintsën, ko yë'ë y'oyëty, ets ko yë tsyojkën jya'awën winë xëëw winë jëmëjt yë y'ity.

² Wä'än t'ëna'antë yë Israel ja'ayëty: Yë Wintsën yë tsyojkën jya'awën winë xëëw winë jëmëjt yë y'ity.

³ Yë teetytyëjkëty ninu'un tyuntën ma Dios yë jyëën tyëjkën, wä'än t'ëna'antë: Yë Wintsën yë tsyojkën jya'awën winë xëëw winë jëmëjt yë y'ity.

⁴ Tëkokyë ja'ayëty jënu'un yë Wintsën tmëjpëjkta'aktën ets twinkutsë'ëkëtën, wä'än t'ëna'antë: Yë Wintsën yë tsyojkën jya'awën winë xëëw winë jëmëjt yë y'ity.

⁵ Maas ënety mon tuk nyajpaatyën, jääjës ojts yë Wintsën nmëkäjpxy; yë'ë ojts tjantymyëtoy ja ntsajpkäjpxyës etsës ojts xymyo'oy ja ëwaatsë'ajtën.

⁶ Yë Wintsën yë'ëjës xymyëët'ajtp, paatyës ka'ap ntsë'ëkë njawë. ¿Wi'ixës yë naaxwiinyëtë ja'ay xynyatunëty?

⁷ Yë Dios yë'ëjës mëët n'ity, ets yë'ëjës xypyutëjk xypyupäjtp. N'ixäämpyës yë ja'ayëty ko ënety ka'ap myëta'aktë jam tsipjotm ja mëti'ipës xymyëtsip'ajtëpën.

⁸ Jaak'oy ni'ik ko yë Wintsën ntuk'ijxpäjtmëty, ets ka'ap ko yë naaxwiinyëtë ja'ay ntuk'ijxpäjtmëty.

⁹ Jaak'oy ni'ik ko yë Wintsën ntuk'ijxpäjtmëty, ets ka'ap ko yë naaxwiinyëtë ja'ay mëj'äämpyë ntuk'ijxpäjtmëty.

¹⁰ Tëkokyë yë mëjëtypë naax kajpn ojtsës xynya'ëwtitë, e ëjts mëët yë Wintsën yë myëk'ajtën tëës nmëmëtakta'atë.

¹¹ Xii yaajës muum të xyjyana'ëwtitë, e ëjts mëët yë Wintsën yë myëk'ajtën tëës nmëmëtakta'atë.

¹² Jëtu'unës të xynyapikëtë xëmiinkyën, e ja tsyip y'äkëty jëtu'unyë të kyupi'itsë tä äpny nyitoyën, Mëët yë Wintsën yë xyëëw tëë nmëmëtakta'ayës tëkokyë yë nmëtsiptëjkës.

¹³ Mëët yë joot'an'ajtën të xynyipëtë'ëktës, ets të tjatsoktë jeexyë ëxëëk njaty nkëpetyës, e yë Wintsën tëë myiny etsës të xypyutëkë.

¹⁴ Ëjts ntukxoontäkpyës yë Wintsën, jä'ä ko yë'ë të xymyëjaawmo'oyës. Yë'ëjës nnitsokpë'ajtyp.

¹⁵ Ma wa'ats ja'aytyëjk ja jyëën tyëjkëtyën ëëwtëp xoontaktëp jap, jä'ä ko të myëta'aktë:: Yë Wintsën yë myëk'ajtën yë'ë të myëtä'äky.

¹⁶ Yë Wintsën yë myëk'ajtën ni'ik myëj kyëjääjëty. Yë Wintsën yë myëk'ajtën yë'ë të myëtä'äky.

¹⁷ Ëjts ka'apës tsojk n'ooka'any, jekyës njuuky'ata'any etsës nikajpxa'any nimëtya'aka'any mëti'ipë Wintsën të tunyën.

¹⁸ Tëës yë Wintsën mëk xytyiytyuny, e ka'apës të xytyimyaj'ooky.

¹⁹ Yaj'ëwa'atstë yë tsajptëjk, japës ntëkëja'any, kukkajpxën ja'awëkyëtakkën nyajnaxäämpyës.

²⁰ Yaa yajnitëkë Dios yë jyëën tyëjk, yaa tyëkëja'antë ja'ayëty mëti'ipë oy mëtuunëpën.

²¹ Tyamës nyajnaxy yë kukkajpxën ja'awëkyëtakkën Wintsën, mëët koos mijts të xy'ëtsoowinpity ets koos mijts näjyëtu'un të xyajnitso'oky.

²² Ja tsaa mëti'ipë ojts ja tëjk kojpë ka'ap tsoktën, yë'ë të y'awinpity tsaakopk mëti'ipë ja tëjk myëtënääpyën.

²³ Ya'atë Wintsën të tuny, mëti'ipë ëëtsajtëm n'ijxëmën mëjwiin këjää.

²⁴ Ya'atë jëtu'un ja xëëw ma ja Wintsën winë të tunyën, Tsojk jotkujk näjya'awëmë ets tsojk ntukxoontakëmë.

²⁵ Wintsën, tun yë mëyajtën, yajtsoktëkës. Tun yë mëyajtën, Wintsën, mijts myajkutukëp etsës akujk jotkujk njuuky'atëty.

²⁶ Kënu'kxy mëjjawë yë ja'ay y'ity mëti'ipë miinpën mëët ja Wintsën ja xyëëw. Tyam miitsëty nkunu'kxta'aktë maas yam nyajpaatën ma Wintsën tsyajptëjkën.

²⁷ Yë Wintsën yë'ë Tios'ajtp; yë'ë xykyutë'kx xykyujajëm. Wä'än tso'ontä'äky ja xëëw, mënëjkxtë ja aay xye'enty kepyxye'enty, jam pëjkta'aktë ma ja wintsë'këntyakn ja wyajën.

²⁸ Tyam nmo'oy ja kukkajpxën ja'awëkyëtakkën ets ntukxoontäkpyës mijts yë mmëjajtën, jä'ä ko mijts jëtu'un nTios'ajtyp.

²⁹ Kukajpxëtë ja'awëkyëta'aktë yë Wintsën, jä'ä ko yë'ë janty'oy yë jot winma'any tmëëtëty, ets tsyojkën jya'awën winë xëëw winë jëmëjt y'ity.