Salmos 115 - Biblia Dc en Mixe de Quetzaltepec

Salmo 115 Yë Tios jam yajpaaty tsajpjotm

¹ Wintsën, ja oyajtën ets ja mëj'ajtën mijts yë mpatëp, ets ka'ap y'ëëts'atë. Ja oyajtën ets ja mëj'ajtën mijts mpatëp mëët ko xymyëët'aty ja tsojkën ja'awën ets ja tëyajtën.

² ¿Wi'ix ko ënät tyajtëwtëty yë ja'ayëty mëti'ipë wiink tios y'ëwtajtëpën, maa ja nTios'ajtëmë?

³ Yë Dios jam yajpaaty tsajpjotm; yë'ë winë të tyajkojy të tpëjktä'äky ijxtëm yë'ë të tsojkën'atyën.

⁴ Yë awinax, pu'ts pujxn ets poop pujxn mëët y'oytyunyëty, mëti'ipë ja'ay y'ëwtajtëpën ka'apë Dios tmëpëktën, ja'ay kë'ëm yajkojpy mëët yë kyë'ë y'aaw.

⁵ Jyamëët'ajtëp yë y'aaw ets ka'ap kyajpxtë; jyamëët'ajtëp yë wyiinëty ets ka'ap y'ixtë;

⁶ jyamëët'ajtëp yë tyatskëty ets ka'ap myëtowtë; jyamëët'ajtëp yë jyëjp ets ka'ap tii txuuk'atë;

⁷ jyamëët'ajtëp yë kyë'ëjëty ets ka'ap xyajë'ëktë; jyamëët'ajtëp yë tyekyëty ets ka'ap ye'eytyë; nitii mëto'owën yo'knjoty kyayajmëtoy.

⁸ Jëtu'un tä tääpë awinaxën, näjyëtu'un ja nyija'ay jyä'äy'äty mëti'ipë jëtu'unpë yajkojtëpën ets tëkokyë ninu'un tmëpëktën.

⁹ Miitsëty Israel ja'ayëty, yi'iyë Wintsën tuk'ijxpätë. Yë'ë xypyutëjkëmëp ets xykyuwa'anmëp.

¹⁰ Miits teetytyëjkëty, yi'iyë Wintsën tuk'ijxpätë. Yë'ë xypyutëjkëmëp ets xykyuwa'anmëp.

¹¹ Miitsëty ninu'un yë Wintsën xywyintsë'ëkëtën, yi'iyë Wintsën tuk'ijxpätë. Yë'ë xypyutëjkëmëp ets xykyuwa'anmëp.

¹² Yë Wintsën tëë jatëkok xyjyä'ämyäjtsëmë, tyam xykyënu'kxmëp ënät. Kyënu'kxäämpy yë Israel kajpn ets kyënu'kxäämpy yë teetytyëjkëty.

¹³ Kyënu'kxäämpy mëti'ipë wiinkutsë'këyëpën, wä'än yë'ëjëty mëjpë mutskpë.

¹⁴ Wä'än yë Wintsën tyajmëj tyajkëjääjë yë m'u'unkëty m'ëna'këty ma miitsëtyën ets näjyëtu'un ma ja m'u'unk m'okëtyën.

¹⁵ Wä'än yë Wintsën mëti'ipë yë tsajp ets naax yajkojën, tyajkëtä'äky yë kyënu'kxën ma miitsëtyën.

¹⁶ Yë tsajp, Dios yë kyë'ë'am'ajtyp, ets naaxwiinyëtë ja'ay ojts yajtukë'ëtëkë.

¹⁷ Tëkokyë mëti'ipë jap të nyëjkxnëtën naaxpa'tkë'p, ets mëti'ipë të y'ooktën, ka'ap niwi'ixtsow t'ëkjëkyäjpnëtë wi'ix yë Wintsën tmëjpëjkta'aktëtyën.

¹⁸ E ëëtsajtëm yë'ë nmëjpëjkta'aka'anëmë, tyam ets xëmëkyëjxm. Tukxoontä'äky mëjjawë Dios yë xyëëw nyaxëty.