Salmos 11 - Biblia Dc en Mixe de Quetzaltepec

Salmo 11 Ko yë Wintsën tu'ukyë ntukjotkujk'ajtmëty

¹ Ëjts jamës n'ixta'ay yë kuwa'anën ma Wintsënën. Oyës pën xyjya'ënëëmë: Kä'äk, nëjkx jam kopkëjxm tä joonën.

² Ix yë ëxëëkja'aytyëjk; wi'ix yë tyi'px two'onë'ëktë mëti'ipë yu'utsy ti'pxë'ktëpën ets tyaj'ooka'antë yë ja'ay mëti'ipë mëtëy juukyajtpën.

³ Ko yë naax kajpn yë'ë nyätyuk'ëne'emyë yë ëxëëk jot ëxëëk winma'any, ¿tii nyatunëp yë ja'ay mëti'ipë oyjyot oywyinma'any myëët'ajtypyën?

⁴ Yë Wintsën xëmë jam yajpaaty ma tsyajptëjkën. Yë Wintsën jam yë kyutujktakn tmëët'aty tsajpjotm ets kë'ëm t'ijx'ity yë naaxwiinyëtë ja'ay.

⁵ Yë Wintsën nyija'ap pën oyjyä'äy ka'oyjyä'äy ets ëxëëk t'ixy yë ëxëëkja'aytyëjk.

⁶ Yë'ë yajtu'ujäämpy jëënpajk jëënyä'änk ma ëxëëkja'aytyëjkën ets tyajmina'any yë jëënpoj mëti'ipë winë yajtëtsta'ajäämpyën. Yë Wintsën yë'ë tukumëtowanëtëp nyëë pyokyëty.

⁷ Yë Wintsën oy tii tnipaye'ey, ets tsyojkpy ja mëtëypyë ja nipaye'eyën; paaty yë ja'ay mëti'ipë oy juukyajtpën y'ixantëp yë Dios wiinxë jëjpxë.