Salmos 105 - Biblia Dc en Mixe de Quetzaltepec

Salmo 105 Wi'ix ja Tios winë tunyën ma Israel kajpnën

¹ Kukajpxëtë yë Dios. Tukyaax tukjokëtë yë xyëëw ets nikajpx nimëtya'aktë ma kajpnën wi'ix winë oy tuny tkäjpxyën.

² Ëwtë oyëtypë ëy ets yë'ë yajtukmëjjawëty. Nikajpx nimëtya'aktë ko winë mëj këjää të tuny të tkäjpxy.

³ Mëj këjxm näjyawëtë, mëët ko xyëëw wya'atsëty ets kyënu'kxëty. Akujk jotkujk itë tu'kë'ëyë miitsëty jënu'un xy'ixta'atën yë Wintsën.

⁴ Yë'ë mëjwa'kpätë yë Wintsën ets myëk'ajtën, mëjwa'kpätë yë Wintsën oy tyimjëna'ajëty.

⁵ Yë'ë ja'amyätstë wi'ix winë mëj këjää të tuny të tkäjpxyën ets ja y'aaw y'ayuk mëti'ipë të tmëtyä'äkyën;

⁶ miitsëty ninu'un yë Abraham m'u'unk'at m'ok'atëtën, mëti'ipë Dios myëtuunën, miitsëty ninu'un yë Jacob m'u'unk'at m'ok'atëtën, ets ninu'un win'ixy m'itën.

⁷ Yë Wintsën, yë'ë nTios'ajtëm; yë'ë y'ënä'ämtääpy tëkokyë naaxwiinyëtë mapaat y'ëwtityën.

⁸ Oy kanaak jëmëjt nyaxëty ets jyuuky'atëty jëtu'un yë naaxwiinyëtë ja'ay, yë'ë ka'ap tja'atyëkoy mëti'ipë të twaantä'äkyën, ko ojts ja käjpxytyu'unën tuny.

⁹ Ja käjpxytyu'unën mëti'ipë mëët tyuunën ja Abraham ja waantakën mëti'ipë tyukmëtoowën ja Isaac,

¹⁰ ets ojts tyajwë'ëmy tä tu'uk yë ënä'ämënën ma Jacob, tä tu'uk käjpxytyu'unën xëmëpë y'ityën ma Israel ja'ayëtyën,

¹¹ ko y'ënäny: Tyam nmo'ojëty yë it naaxwiinyëtë mëti'ipë jamën Canaán, jëtu'un tä yë näkyumayën mëti'ipë mpatëpën.

¹² Oyxyëp ënety y'ëkniwäänë'atë ets yajpaatë tä jaaypyaat jaaypyo'kxyën naaxwiiny naaxkëjxy

¹³ ets winnaax wiinkajpxn jyëtitë, maajaty yë kutujktaknën,

¹⁴ Dios ka'ap tyajkutujky ets pën ëxaty tyunëtëty. Ojts yë Dios t'ënëëmë ja yajkutujkpëtëjk:

¹⁵ Këtii nëkoo ëxaty xynyatun xynya'ënëëmëtëty ya'atë ja'ayëty mëti'ipës të nwin'ixyën, ets ijxkëm nëkoo ëxaty xytyuntë xy'ënëëmëtë yë nkäjpxynyajxpëtëjkës.

¹⁶ Ojts tyaj'ity yë yuu xëëw ma tääpë it naaxwiinyëtën, ets tjëpëjktaay tëkokyë yë jë'kxy pëky.

¹⁷ Je'eyëp ko ojts tkexy yë José ets yë'ë tyu'uwinye'eyëtëty mëti'ipë ënety të tooktën tä tu'uk yë mëtuunpën.

¹⁸ Ojts tyajtsëtyut tyajwintëkoytyë yë kyë'ë tyeky mëët yë pujxtä'äky ko tsuumtë txojtstë; janty ta'tspëky ojts tsumtë twëëntë mëët yë pujxntejpxy.

¹⁹ Ojts ja Dios ja y'aaw y'ayuk, wyinkëxë'ëky ma ja José ja jyuuky'ajtënën, koonëm y'atëëy mëti'ipë ënety ja José të tnikäjpxyën.

²⁰ Ja yajkutujkpë mëti'ipë ja mayjyä'äy y'ëne'empyën, ojts tni'ënä'ämë ets yajmo'ojëty ja José ja ëwaatsëtuuy'ajtën;

²¹ tä ojts tpëjktä'äky Wintsën ets tkëwent'atëty ja jëën tëjk ets tniwintsën'atëty tëkokyë jënu'un winë tmëët'atyën,

²² ets tyaj'ijxpëkëty ja kopktëjkëty ets ja mëjja'aytyëjkëty ets wijjyä'äy'atëty.

²³ Ënet ojts ok myiny ja Israel jap Egiptë, mëti'ipë yajtijpën Jacob, ets jap jyuuky'äjty jaaypyo'kxyën, ma ja Cam ja y'itjotmën.

²⁴ Dios ojts yë nyaax kyajpn tyajmëj tyajkëjääjë ets aak jotmëk jyä'äy'ajtë këtiinëm jyëtu'unëty ja Egiptë ja'ayëty.

²⁵ E yë'ë ojts näjyëtu'un kë'ëm tyajkutuky ets ja Egiptë ja'ayëty tmëtsiptsoontëty ja Dios ja nyaax kyajpn ets twin'ëëntëty ja tyuunpëtëjk.

²⁶ Ënet yë Dios tkejxy yë tyuunpë Moisés ets Aarón, mëti'ipë ënety të twin'ixyën,

²⁷ ets tyaj'ijxëtë ja Dios ja myëk'ajtën jam wintë'ëtstum. Mëj këjää yë mëj'ajtën ojts jam yaj'ixy ma ja Cam ja y'itjotmën.

²⁸ Ojts yë Dios najtskäxë yë kootsajtën ets naaxwiinyëtë wyintujktaay, e yë Egiptë ja'ayëty ka'ap ojts tmëjpëjkta'aktë ja Dios ja y'aaw y'ayuk.

²⁹ Ojts tyaj'awinpity ne'pyny yë mëjnëë ets tyaj'o'ktaay tëkokyë yë nëë jëyujk;

³⁰ ojts tyajwintuky yë naax kajpn mëët yë maynyooty, ets jyä'äjty jampaat ma ja yajkutujkpë ja y'ijtaknën.

³¹ Je'eyë ojts yë Dios kyäjpxy ets myäypyëtsiimy yë aktsa'ak ets tsukts, wa'ats tyajtuktujktaaytyë Egiptë itjot.

³² Ojts näjyëtu'un tkexy yë tëtsn tuu mëjatyëtypë ets ja naax kajpn tsyooypyijky.

³³ Ojts tëjta'ay twäjxta'ay yë tsatsymyon ets tsajpmok yon mëti'ipë ënety tkojtën, wa'ats tëjtaay twäjxtaay yë aay kepy jap Egiptë.

³⁴ Je'eyë ojts yë Dios kyäjpxy ets myiintë yë maymyu'u, nimay ënety yajxonëty ka'ap t'ëkjëkyäjpnë yajmëtyowëty.

³⁵ Yë'ë ojts tyajkëxtë ja aay ujts kamjotypë tu'ujotypë ets tëkokyë jënu'un yë aay ujts yajpaatyën naaxkëjxy.

³⁶ Yaj'o'ktaay jap Egiptë tëkokyë kä'äxkopktëjk ma ja Egiptë ja'ayëtyën.

³⁷ Ënet ojts yë Dios tyajpëtsëmy yë nyaax kyajpn jap Egiptë, nitsëm nitëkäk jap tsyo'ontë mëët ja pu'ts pujxn ets poop pujxn, nitu'uk ojts yë Israel ja'ay wi'ix kyajaty kyakëpety.

³⁸ Yë Egiptë ja'ayëty janty'oy ojts nyäjya'awëtë ko t'ijxtë tsyo'onëtë ja Israel ja'ayëty, jä'ä ko tëë ënety y'ënu'kxënyëtë mëët ja tsë'ëkë.

³⁹ Dios ojts tkexy yë yoots nëma'a këtiipë yë Israel ja'ay nyi'antëty, ets ko kyoots'ajty jëën ojts mëët tu'uwinye'ey.

⁴⁰ Ko ja naax kajpn tpëjktsooy ja ka'ayën ukën, ojts yajtuknikäxtë muuxy, ets tsajpkääky ets ojts ku'uxyë wyë'ëmtë.

⁴¹ Ojts tyajpu'uwä'kxy yë tsaa ets nëë jap tyajpëtsëëmy mëti'ipë tyukye'eyëtyääyën ja të'ëts'itjot tä tu'uk mëjnëëjën.

⁴² Jä'ä ko jyä'ämyäjts ja wyaantakën wa'atspë, mëti'ipë mëët tuunyën ja Abraham, mëti'ipë tyuunpë'ajtypyën.

⁴³ Jëtu'un ojts ja Dios tyajpëtsëmy ja nyaax kyajpn akujk jotkujk,

⁴⁴ ets myooyëtë ja naaxwiinyëtë mëti'ipë wiink kajpn jyä'ä'ajtypyën, ets ja jë'kxy pëky mëti'ipë wiink ja'ay nyitu'unëyën,

⁴⁵ jëtu'un tmëët'atëty ja wintsë'kën ets tpatuntëty ja ënä'äm tëyajtën, mëti'ipë ja Dios ënety të tyuk'ijxpëkëtën. Tukxoontä'äky yë Dios yë xyëëw nyaxëty.