Salmos 104 - Biblia Dc en Mixe de Quetzaltepec

Salmo 104 Ma yajkuuy'iyën ja Kojpë Mä'kxpë.

¹ Nkënu'kxyjyawëjäämpyës yë Wintsën winë aaw winëjot. Mëj'äämpy m'ity, mijts Wintsën mëti'ipës n'ëwtajtypyën. Mëjwiin këjää yë mmëj'ajt m'oyajtën;

² yë mtë'kxën mjajën këjääpaat tukjajëtyä'äy winë. Jëtu'un yë tsajp të xypyëjktä'äky tä ja'ay wit tyä'ptëyën.

³ Mijts të xypyëjktä'äky yë nyixeny yë mjëën mtëjk nëëwiinkëjxy, mëti'ipë jam tsajpjotm mtuktsëna'ayëpën. Ko muum mnëjkxy pojjoty yootsjoty mjëtity.

⁴ Yë poj yoots yë'ë mtukmëjëtijtyp yë m'aaw m'ayuk, ets jëën yë'ë mmëtuunëp.

⁵ Ojts yë naaxwiinyëtë xyajta'tspëky këtiipë nijëna'a yu'kxëty.

⁶ Ja nëëkom yë'ë ijty yajnituky'ijtyp yë naaxwiinyëtë jëtu'un tä jeexyë yë'ë twit'atyën; Aak nituky ijty y'ijta'ay yë tun kopk.

⁷ E mijts ojts xymyëkäjpxy yë nëë mëët yë mmëkajtën ets ojts ja nëë ye'eymyujkta'atë, ojts ja nëë poj'am nyëjkxta'atë ko tmëtoowtë ja m'ayuk jëtu'un tä ënääwën.

⁸ Jëtu'un ojts wyimpät jyëjpta'aktë tunkëjxy kopkëjxy ets panëë pawok, jyajtë jam ma ënety të xytyuknipëjktaakën y'itëty.

⁹ Jam ma ja tsëpa'anën ma xytyuk'ënëmaayën ko ka'ap tninaxëty, këtiipë jatëkok jëna'a t'ëkyajnikoompäjnëty ja naaxwiinyëtë.

¹⁰ Mijts myajye'eywyä'kxyp yë nëë ko xyajtsoony ma myuutyën ma mëjnëëjën mëti'ipë najxpën tunjoty kopkjoty.

¹¹ Jamts yë aayjëyujk ujtsjëyujk nyëë uuktë, yë jëyujk tsajpkaa jam yë tyëëtsë tyajmontë mëti'ipë aayjoty ujtsjoty jëtijtëpën.

¹² Ma nëëpa'ajën jam yë joon jëyujk pyä'än t'oytyuntë, jam kepy'akujk y'ëwtë ya'axtë.

¹³ Mijts myajxo'kpy yë tun kopk, jam këjxm yë nëë tuu tsyoony ma mjëën mtëjkën, mëët yë mëknëëkom xyajtsamë yë naaxwiinyëtë.

¹⁴ Mijts myajyoompy myajji'tsyp yë aay ujts mëti'ipë jëyujk tsajpkaa jyë'kxtëp pyëjktëpën, ets mëti'ipë näjyëtu'un yë naaxwiinyëtë ja'ay kyäytyëp y'uuktëpën winjëpom,

¹⁵ yë ka'ayën ukën mëti'ipë mëjaaw moopyën, ets tsatym nyëë mëti'ipë yajjotkujktakpën, ets wyiin jyëjp yaj'ixy tim o'oyëtyääpy yowë.

¹⁶ Näyjyëtu'un yë aay kepy wa'ats xyo'kta'atë, tä yë ajë kepyën mëti'ipë Dios kyojën jam Líbano.

¹⁷ Ma joon jëyujk yë pyä'än tkëxpëktën mutskjatypë, ma näjyëtu'un yë wojny jyuuky'atën tsiinkëjxm.

¹⁸ Ma këjxmëtypë kopkën yë'ë jam jë'kxypyatëp yë tsajppax, e jap tsaajoty jap nyäyu'utsëtë ju'k.

¹⁹ Ojts yë po'o xyajkojy ets yë'ë yajtukmëtsyowëty yë xëëw jëmëjt, yë xëëw nyija'ap jëna'a kyëta'akëtyën.

²⁰ Mijts myajtsu'ujëp ets kyootsë, jää yë jëyujk pyëtsëëmta'atë jënu'un yuukjoty tsyëënëtën.

²¹ Yë kaa je'eyë myu'uy ets tnikäjpxy pën myatsäämpy, yë Dios y'amëtoowtëp ets myo'ojëtëty yë jyi'kxy pyikyëty.

²² Ko xyiinyë, tääts nyëjkxta'atë jatëkok ma y'aankëtyën maapë po'kxpë.

²³ Täänëm yë naaxwiinyëtë ja'ay tsyoony ets nyijkxy ma kyam tyu'ujën, tyuny jam tsuupaat koonëm jyajmony ets jyä'ty jatëkok ma tyëjkën.

²⁴ Mëj këjää winë të xytyuny, Wintsën. Winma'anymyëët winë të xyajkojy; yë naaxwiinyëtë ujts yajpaaty mëët mëti'ipë të xyajkojy të xypyëjktä'äkyën.

²⁵ Ix tää yë juukymyejy, mëjwiin ets këjää, jap nëëjoty kanaakpëky jap yë jëyujk mëjpë mutskpë;

²⁶ ma kepy nëëwinye'epyë ye'eytyën, ma yajpaatyën ja mëj jëyujk mëti'ipë tyijtëpën Leviatán, ja mëj jëyujk mëti'ipë myajkojën ets mëët m'ëyë'ëkëty mkëyätëty.

²⁷ Tëkokyë yë'ëjëty aakmijts mtuk'ijxpäjtëp, t'a'ix tjëjp'ixtë jëna'a xyajjë'kxy xyajpëky, koonëm xytyukpaaty ja nyixëëw nyipo'o.

²⁸ Mijts mmoopy, tääts tpëjkë'ëk tuunë'ëktë, ko mkë'ë xyajwä'kxy tääts kyu'uxëtë;

²⁹ Pën mnäyu'tsëp tu'ktsojkyë ma yë'ëjëtyën, ënätyë tsyë'këtya'aktë; pën mijts myajxejytyujkpy, poj'am y'o'kta'atë ets jatëkok naaxway y'awinpitë.

³⁰ E ko mijts xykyexy yë juukpyoj mëti'ipë yajjuuky'ajtpën, ënät winë jyuuky'ajtpëky ets y'ajämë yë naaxwiinyëtë yë y'ijxën.

³¹ Yë Wintsën yë myëj'ajt y'oyajtën xëmë y'ity. Tyukxoontäkpy yë Wintsën ko winë të tyajkojy.

³² Ko t'ixy yë naaxwiinyëtë, ënätyë yu'kxpëky; jëënjok ënätyë tim napëtsëëmp tunkëjxm kopkëjxm ko tmëyu'kxë.

³³ Mapaatës njaakjuuky'ätyën ntukwin'ëwäämpyës yë Wintsën yë ëy yä'äxy.

³⁴ Jääpëk yë Dios t'oyjyawë yë njot nwinma'anyës, jä'ä ko ma yë'ëjën, jamës yë nxoontakën tsyoony.

³⁵ Wä'än tkutëkoytyë yë pokyjä'äytyëjk naaxwiiny. Ka'ap mëpaat jyuuky'atë yë ëxëëkja'aytyëjk. Nkënu'kxyjyawëjäämpyës yë Wintsën winë aaw winëjot. Tukxoontä'äky mëjjawë yë Dios yë xyëëw nyaxëty.