Salmos 102 - Biblia Dc en Mixe de Quetzaltepec

Salmo 102 Tsajpkäjpxy ko pën myony tyuky

¹ Wintsën, mëtoow'it yë ntsajpkäjpxyës, mijts myajkutukëp ets jya'tëty yë një'ëyënës nyaxënës ma mijtsën.

² Këtii yë mwiin mjëjp xyu'utsy mëët ëjts maas tyam nyajpaatyën mon tuk; tun yë mëyajtën mëtoow'ijtkës. Ëtsoowkës tsojkyë ko nmëkajpxëty.

³ Yë njuukyajtënës jëtu'unës njawë pyojtëkoy tä jëënjokën, ets nwaay npajkës jëtu'unës njawë tyoy jyemy tä jëënpajkën;

⁴ yë njot nwinma'anyës ëmaay amutskës njawë, jëtu'un tä aay ujtsën mëti'ipë tëë xyo'tsnën; ets yuu ka'apës xy'ëkpatnë.

⁵ Yë nini'kxës je'eyë myëjtëtspäjnë npajkwiinyës koos xëmë një'ëy nyä'äxy.

⁶ Jëtu'unës ëjts tyamnë tä ju'kën të'ëts'itum, tä ju'kën muum tsaajoty ëkë ma muum xit ko'ow yajpaatyën.

⁷ Ka'apës oy nma'ay npo'kxy, atu'ukës nyajpaaty tä joon y'u'unyën tëjkëjxy.

⁸ Yë nmëtsiptëjkës janaam jatsojkës ëxëëkjaty xy'ënëëmëtë ets ëëpäjn kajpxpäjnës yë nxëëw twa'antë ko pën tpoktë.

⁹ Kuuyjyaamës një'kxyp, jëtu'un ijxtëm jeexyë tsajpkääky nkayënës; ets maas yë n'uukyën, yë'ë mëët xyëpinyëty yë nwiinnëëjës,

¹⁰ mëët ko të m'ëwa'antä'äky ets ko të mjoot'anpëky, je'eyës tu'ktsojkyë të xyajwinpety etsës jatëkok të xyajkujënajkojnëpë.

¹¹ Yë nxëëw njëmëjtës jëtu'un poj'am nyäxy tä äpkën, ets jëtu'unës të ntëtskëtaknë tä aay ujtsën.

¹² E mijts, Wintsën, jä'ä m'ëne'emy kë'ëyxyëëw kë'ëyjyëmëjt; yë mxëëw ja'amyetsy xëmë y'ita'any.

¹³ Pëtë'ëk ets pa'ëyow yë ja'ay mëti'ipë jam tsënaaytyëpën ma Jerusalén kajpnën, tëë yë xëëw jëmëjt kya'pxnë; tëë xëëw tpatnë ets xypyokymyä'kxëty.

¹⁴ Yë mtuunpëtëjk janty'oy nyäyjyawëtë ko t'ixtë ja tsaapotsy, e tyam je'eyë tjaakpa'ëyowtë ko t'ijxnëtë kujy ka'atsy ja tsaanë.

¹⁵ Tëkokyë yë naax kajpn ets tëkokyë yë ënä'ämpëtëjk naaxwiinypë y'itën yajpaatën, nëjkxëp twintsë'ëk tmëjjawëtë yë Wintsën yë myëjxëëw,

¹⁶ ko ënety jatëkok tkoj'oyë yë Sión ets jap yajpaatëty ma ja myëj'ajt y'oyajtënën,

¹⁷ ko ënety tmëtoy ja wyaantso'ow pyëjktso'owën ja tëëpë yajnas'ijxënën ets ka'ap nyayajkumëtoownaxëty ja pyëjktso'owën.

¹⁸ Wä'än ya'atë këxja'ay twë'ëmy, ets nijawëtëty yë ja'ay mëti'ipë juuky'atantëpnëm, ets jëtu'un tyajmëjnaxtëty yë Wintsën mëti'ipë mëxu'unk'atantëpnëm.

¹⁹ Yë Wintsën wa'ats jam tsajpjotm tku'ijxnaxy yë naaxwiinyëtë, jam tsajpjotm ma xëmë wa'ats y'ityën,

²⁰ ets tmëtoowkukëja'any yë jyi'iyënëty yaxënëty ja tsumjyä'äytyëjk, ets tyajtso'oka'any ja ja'ay mëti'ipë yi'iyë y'ëwxijnëp ja o'kën;

²¹ ets jam ma Sión kopkën, ma Jerusalén kajpnën, yajnikajpxëty ets yajmëjpëjkta'akëty yë Wintsën yë xyëëw

²² ko ënety tëkokyë ja ja'ayëty naaxwiinyëtë apëtsëmy nyämyujkta'ajëtë ets t'ëwtata'antë yë Dios.

²³ Yë'ëjës të xypyëjkë yë njot nmëjaawës në'ë'aay tu'u'aay; ets të tkuwitsy yë njuukyajtënës.

²⁴ Täätsës n'ënëëmë: Dios, mëti'ipës nTios'ajtypyën, këtiis je'eyë kujkwä'kxy xyajjuuky'atëty. Yë mxëëw mjëmëjt ka'ap kyixy.

²⁵ Mijts ojts xyajkojy tëëyëp yë naaxwiinyëtë, ets mijts ojts näjyëtu'un kë'ëm xyajkojy yë tsajp.

²⁶ Tu'kë'ëyë winë nëjkxëp jëna'a kyutëkooytyä'äy, e mijts kë'ëyxyëëw kë'ëyjyëmëjt m'ity. Tu'kë'ëyë winë jëtu'un tyujktaja'any tä witën; mijts nëjkx kë'ëm xyajtëkatsy, jëtu'un tä ja'ay wyit tjääntëkatsyën.

²⁷ E mijts je'eyëm myajpaaty; yë mxëëw mjëmëjt ka'ap nijëna'a kyukëxëja'any.

²⁸ Mmo'ojäämpy yë jotkujk'ajtën yë y'u'unkëty y'okëty mëti'ipë oy mmëtuunëpën, ets jam mwintum kë'ëm xytyimyaj'ita'any.