Salmos 10 - Biblia Dc en Mixe de Quetzaltepec

Salmo 10 Tsajpkäjpxy ma Tios näypyutëkë yaj'amëtoyën

¹ Wintsën, ¿wi'ix ko jëkäm myajpaaty? ¿Tii ko jää mnäyu'utsyë ma ëyo'on jotmay y'ityën?

² Yë ëxëëk ja'ay mëj këjxm nyäjyawëty ko t'ixjëtity tpajëtity yë ëyoopëja'ay; kë'ëm nyäyajkuka'anaxa'anyë ma ja o'ktaknën yu'utsypë mëti'ipë të t'oytyunyën.

³ Yë ëxëëk ja'ay oy tnimëtyä'äky kë'ëm mëti'ipë tsyojkpyën; ja'ay mëti'ipë atsojkpën pyojkpy ets y'ixtijpy yë Dios.

⁴ Yë ëxëëk ja'ay amëj akëjxm yë wyiin jyëjp tsajptijy ets y'ënä'äny: ko ka'ap ma Dios, pën xy'ëkyajtëwëpës tiis ntuunpy nkäjpxypën. Yi'iyë myääpy tyäjpy.

⁵ Xëmë nyänyikäjpxyë winë oy wyimpëtsë'ëmxëty mëti'ipë tyuunpyën. Mëët yë'ë jëkäm yajpaaty ja mnipaye'eyën, jëkäm yajxon, ka'ap t'ixy. Je'eyë nëxi'iky tukxi'iky ja myëtsip,

⁶ ets ënät myäy tyäjy ko ni pën kyamayëtëty, ets nijëna'a tkapaata'any yë ëyo'on jotmay.

⁷ Ko kyäjpxy oy yajpojknë y'ënä'äny, aakyë'ë ka'apë myëtëyëtyën ets ëtsu'uxyaxp; ujts yajpaaty ja jyot wyinma'any mëët ja ëxëëkajtën.

⁸ Ko muum nyijkxy yë'ë y'ijx'ijtyp pya'ijxyp ja ja'ay mëti'ipë oy juukyajtpën, ets yë'ë myëmääpy myëtäjpy wi'ix t'ëkyajpokytyëkëtyën ets tyaj'ooka'any.

⁹ Jëtu'un tä yë kaajën jap y'aankjoty, jap yu'utsy tpa'ixy tpawoony yë ëyoopëja'ay, t'ëwxity jëna'a t'ëk matsy, e ko tmatsy tääts twinpajëtuty mëët yë tyejpxy.

¹⁰ Je'eyë wyintä'äky ets nyäyu'utsyë, ets jam kyë'ëkëjxm kyëxka'atë ja ka'apë nyäkyuwa'anëtën.

¹¹ Yë ëxëëk ja'ay jëtu'un myäy tyäjy ko Dios jyä'äytyëkoopy winë, ko je'eyë nyäwyinkumatsëty tääts ka'ap tii t'ixy.

¹² Pëtë'ëk Wintsën, xajë'ëk yë mkë'ë. Këtii xyjyä'äytyëkoyëty mëti'ipë jëëpy yaxpën.

¹³ Dios, mëti'ipës nTios'ajtypyën, ¿wi'ix ko ëxëëkja'aytyëjk nyëxi'ik tyukxi'iktë, ets myäytyë tyajtë ko mijts ka'ap xyajtëwa'any mëti'ipë tyuuntëkooytyëpën?

¹⁴ Tëë mijts kë'ëm xy'ixy wi'ix ëxëëk y'ëtë'ëtstën y'ëna'antën. Tëë kë'ëm xy'ixy ets mijts ënät mpatëp wi'ix xytyukkumëtoy. Jam ma mijtsën myintë ka'apë tjëkyepy nyäkyuwa'anëtëtyën; mijts mputëjkëp yë ku'ooky u'unk.

¹⁵ Tëjwa'kxë yë kyë'ë yë ëxëëkja'aytyëjk. Nipaye'ey yë y'ëxëëktu'un y'ëxëëk kajpxënëty. Ka'ap nitu'uk xyajninaxëty.

¹⁶ Yë Wintsën yë'ë tu'uk mëj ënä'ämpë xëmëkyëjxmëpë. Yë ja'ayëty mëti'ipë ka'ap myëjjawëtyën yajkäjxpëtsëmantëp kyajpnjoty.

¹⁷ Wintsën, mijts mëtoow'ijtyp yë ja'ay ko mëkäjpxyë mëti'ipë näypyutëkë yajmëyäjtypyën, ets xyajjotkujktä'äky ets xypyutëkë.

¹⁸ Nipaye'ey yë ku'ooky u'unk ets mëti'ipë ëxëëk yajtuunp yaj'ënëmääpyën: Yë naaxwiinyëtë ja'ay mëti'ipë naaxën, ka'ap mëpaat y'atsë'ëk y'ajawë.