Salmos 1 - Biblia Dc en Mixe de Quetzaltepec

LIBRO I Salmo 1 Ja mëtëypyë jotkujk'ajtën

¹ Jotkujk ets xoontä'äky yë ja'ay yajpaaty mëti'ipë ka'ap tunyën këwentë ja ëxëëkja'aytyëjk ja y'ëëwij kyajpxwijën, ets ka'ap tyo'oy ja në'ë tu'u mëti'ipë ja ëxëëkja'aytyëjk ye'eytyëpën ets ka'ap tmëjwa'kpety ja ja'ay mëti'ipë ja Dios nyëxik tyukxi'ktëpën;

² yë tsyojkën jya'awën jam tpëjktä'äky ma Dios yë y'ënä'ämën tyiyajtën, ets yi'iyë myëmääpy myëtäjpy xëëny koots.

³ Tääpë ja'ay jëtu'un npëjktakmëty ijxtëm tu'uk yë mëj kepyën nëë ëkë'ëypyë tyänën, ko tyëëmpety yë'ënëm yë xëëw po'o tyukpatyp, ets ka'ap nijëna'a y'ääy xyootsy, tu'kë'ëyë mëti'ipë tyuunpyën aak'oy wyimpëtsëmy.

⁴ E yë ëxëëkja'aytyëjkëty ka'ap jyëtu'un'atë, jä'ä ko jëtu'un yë'ëjëty tä aaykyëta'akën mëti'ipë winpapojpën.

⁵ Paaty yë ëxëëkja'aytyëjk nëjkxëp nyitukëtë ko ënety ja Dios tpaye'ey ja nëë poky, ja pokyjyä'äytyëjk ka'ap tmëët'ata'antë ijtakn ma ja wa'ats ja'aytyëjk tu'ukmukyë yajpaatën.

⁶ Yë Dios Kyëwent'ajtyp yë wa'ats ja'aytyëjk yë nyë'ë tyu'u; e ja ëxëëkja'aytyëjk ja nyë'ë tyu'ujëty jam ja nitëyë nyijkxy ëyo'onjotm.