Rut 4 - Biblia Dc en Mixe de Quetzaltepec

Ma ja Booz pyikyën mëët ja Rut

¹ Ënet ojts ja Booz nyijkxy ma ja naax kajpn yajnitëkën, jam ijty ja ja'ay tyu'ukmuktë. E jamts ënety pyo'kxy pyiky ko ajotkumonë t'ijxpaty nyäxy ja ja'ay mëti'ipë ja Rut winkon myëku'uk'ajtypyën. Tä ja Booz ojts tmëkäjpxy ets t'ënëmaay: Mëku'uk. Min mpo'kxy. Tääts myiiny ja myëku'uk ets nyaaxwe'tsy.

² Ënet ja Booz ojts ëpëky nimajk tmëkäjpxy ja mëjja'aytyëjk ets t'ënëmaay ets y'u'unyëtëty. Ko nyaaxwä'tstë,

³ tä ja Booz t'ënëmaay ja myëku'uk: Yë Noemi mëti'ipë jatëkok të wyimpityën yaa, jampë jeky të tsyëënën Moab y'itjotm, jëtu'un y'ënä'äny ko tookanë yë naax mëti'ipë ijty jyä'ä'ajtypyën ja nmëku'uk'ajtëmë Elimélec.

⁴ E paaty yam ntuk'ëwaanë ets xynyijawëty, pën mjuyäämpy nikajpx ma ya'atë mëjja'aytyëjkëtyën mëti'ipë y'ixtëp nyijawëtëp ma ya'atë naax kajpnën. E komë mijts mëët winkon yë Elimélec mnämyëku'uk'atyë, mpatëp ets mijts xykyujuyëty yë nyaax kyam. E pën kajts xyjyuyä'äny, xytyuk'ëwaanëpës. Jä'ä ko mijts xykyajuyëty ëjts xypyatp njuyëtyës, jä'ä koos nän nmëku'ukës yë Elimélec, je'eyëp ko najëkäm. Ënet y'ëtsooy ja tu'uk: Tyamës ëjts nkujuyëty.

⁵ Ënet ojts ja Booz tkajpxtë'kxy: Je'eyëp ko yë'ë mnijawëp yajxon, pën mjuupy yë Noemi yë nyaax kyam, kopkpëky ko xypyëkëty yë Rut, yë Moab ja'ay, jëtu'un ka'ap tyëkoyëty ja xyëëw ja nyiye'etyëjk mëti'ipë të y'o'knën.

⁶ Ko jëtu'un tmëtooy, tä ja myëku'uk y'ëtsooy: Pën jëtu'un, ka'ap tjëkyepy njuyëtyës. Jä'ä ko tsojk jyotmaykyojëty maas ja nkuma'ayënën. E pën mijts mjuyäämpy, oy xyjyuyëty. Tyam mijts nmo'ojëty mëti'ipë ënety ëjts xyjyapatpën.

⁷ Jam Israel jä'ä ijty jam tuntë, ko pën tyajknaxy ja mëti'ipë ja patëpën ëkë ko pën tooky ja kyuma'ayën; mëti'ipë to'kpën ëkë mëti'ipë kyë'ëyäjkpyën jyeempy ja kyë'ëk ets tmo'oy ja wiinkpë. E komë jëtu'un ja ja'ay tuunk'atën.

⁸ Ja Booz ja myëku'uk ojts tjeny ja kyë'ëk ets ja Booz yajmooy ets yaj'ënëmaay: Mijts juy.

⁹ Tä ja Booz t'ënëmaay ja mëjja'aytyëjk ets ja ja'ayëty jampë ënety yajpaatën: Tëkokyë miitsëty mëjja'aytyëjkëty ets miitsëty a'ijx amëtoowpëty, tyam xy'ixtë koos yam njuy yë nyaax kyam yë Noemi mëti'ipë yë nyiye'etyëjk Elimélec ijty jyä'ä'ajtypyën ets myaank Quelión ets Mahlón.

¹⁰ Tyam näjyëtu'un xy'ixtë ko yam mpëkyës yë Rut, yë Moab ja'ay mëti'ipë të kyu'ookyën, mëti'ipë ijty yë Mahlón tyo'oxytyëjk'ajtypyën. Jëtu'un yë Mahlón ka'ap yë xyëëw y'atëkoyëty ma nyaax kyajpnën. Miits yam m'ijxtëp mnija'awëtyëp.

¹¹ Tä y'ëtsoowtë ja mëjja'aytyëjk ets ja mëti'ipë ënety jam yajpatëpën: Jëtu'un, tyam ëëts njanty'ixtë. Dios yë'ë yajkutukëp ets to'oxytyëjk mëti'ipë tyam tëkëjaanpën ma mjëën mtëjkën jëtu'un yajpaatëty tä yë Raquelën ets Lea mëti'ipë ntaak'ajt ntsi'tsk'ajtëmën. E mijts nän mëj'äämpy mnaxëty ma Efrata ets Belén nyaaxwiinyëtën.

¹² Dios yë'ë yajkutukëp ets may yë u'unk maay xypyaatëty. Ets myäyëty yë m'u'unk m'ëna'këty, jëtu'un tä yë Fares, yë Judá ets Tamar y'u'unk y'ëna'k nyimayajtën.

¹³ Jëtu'un ja Booz mëët pyijky ja Rut. Ko mëët tsyënaayi'ky yë Wintsën ojts tyajkutuky ets Rut u'unk mëët wyë'ëmëty.

¹⁴ Tä ja to'oxytyëjkëty t'ënëmaaytyë ja Noemi: Mëj'äämpy yë Wintsën nyäxy ko tyam të mo'oyë tu'uk yë m'ok'u'unk mëti'ipë mkëwent'atanëpën. Jääpëk yë m'ok'u'unk mëj'äämpy nyäxy ma Israel kajpnën.

¹⁵ Yë'ë nëjkx myajjotkujktä'äkyë ets mwinwitsëtëty ko ënety mëj ja'ayënë mëët jä'äkyëjxm ko yë'ë t'u'unk'aty yë mxäkxy Noemi, mëti'ipë mëk mtsojkëpën mja'awëyëpën, mëti'ipë jëtu'un mëët'ajtypyën tä jeexyë niwëxtujk yë u'unk maay xymyëëtëtyën.

¹⁶ Noemi yë'ë ojts tseeny tkony ja u'unk maay ets yë'ë yajyä'k.

¹⁷ Jëtu'un ja myëjëën myëtëjk y'ënantë ko t'ijxtë: Yë Noemi tëë tu'uk yë u'unk maay tyajminy tyaja'ty naaxwiinyëtë. Ets tyajxëëwpäjtë Obed, mëti'ipë tyeety'ajtën yë Jesé, yë tyatwelë yë David.

Yë David yë y'aptëjk

¹⁸ Yaa yë xyëëw myintë kuja'ay mëti'ipë y'u'unk'ajt y'ok'ajtën yë Fares: Fares xyëëwajt yë tyeety yë Hesrón.

¹⁹ Hesrón xyëëwajt yë tyeety yë Ram. Ram xyëëwajt yë tyeety yë Aminadab.

²⁰ Aminadab xyëëwajt yë tyeety yë Nahasón, Nahasón xyëëwajt yë tyeety yë Salmón.

²¹ Salmón xyëëwajt yë tyeety yë Booz, Booz xyëëwajt yë tyeety yë Obed,

²² Obed xyëëwajt yë tyeety yë Jesé, Jesé xyëëwajt yë tyeety yë David.