Rut 3 - Biblia Dc en Mixe de Quetzaltepec

Ja Booz ja y'oyjyot y'oywyinma'any

¹ Tëkok ojts ja Noemi t'ënëëmë ja Rut: U'unk maay, ëjts xypyatpës ets tu'uk yë mniye'etyëjk n'ixtä'ämyëty mëti'ipë jotkujk mmëët'atëtëpën.

² Ëk'ix, yë nmëku'uk'ajtëmë Booz mëti'ipë yë tyuunpë mëët të mtuunmukyën, nëjkxaanp jam tyam kyamjotm ets tyajpajk'ata'any yë tsyajpmok.

³ E tyam yë'ë mtunëp mëti'ipë yam ntuk'ënëëmëjäämpyën; tsi'iw xëts yajxon, näpyerfumë kuutsët ets pëjkta'ak ja oypyë ja mwit ets jam kamjotm mnëjkxëty. Je'eyëp ko këtii mnätyuk'ixëtëty yë Booz ma ënety ka'ap kyääytyä'äy y'ukta'aynyëmën.

⁴ Yajxon xytyim'ixëty maa nyäkyo'okyë. Jamts mnëjkxëty ko ënety të kyootsë ets jam mnäkyo'okëtëty tyeky'ix'am. Yë'ë ënät kë'ëm m'ënë'ëmxëtëp tii mëpaat xytyuny.

⁵ Tä ja Rut y'ëtsooy: Oy'atëp, ntunäämpyës ijxtëm yam të xynyikäjpxyën.

⁶ Ja Rut ojts jam nyijkxy ma ja Booz ja kyamën ets jëtu'un tuuny tä ja tyaakxyäkxy ënety të y'ënë'ëmxëtyën.

⁷ Booz ku'uxyë ojts kyäy y'uuky ets janty jotkujk nyäpyëjktakë. Jam nyäkyo'kë ma ja tsajpmok nyipetyën. Kom ok ja Rut myiiny ame'tsyë ets tnipä'äntuty ja Booz ja tyeky ets jam nyäkyo'kë.

⁸ Kujk tsu'um ojts yë Booz wyijy ets je'eyë kyi'itwinpijty ets tja'awëy ko tamtëm tu'uk to'oxytyëjk kyo'knë tyeky'ix'am.

⁹ Tääts tyajtëëy: ¿Mpën mijts? Ets ja Rut y'ëtsooy: Rutës ëjts. Ëjts ni'ija'apës ko mijts nmëku'uk'aty ets mpatëp etsës xykyuwa'anëty. Ntsojkpyës ets ëtsajtëm mpëjkmëty.

¹⁰ Tääts ja Booz y'ëtsooy: Dios mkënu'kxëtëp. Tyamës nja'akyukë ko mijts mwinkutsë'këp yë mye'etyëjk oy të y'o'knë, paatyës ëjts xytsyojkën'aty; nu'unxëp mkamayë jeexyë mëët mpëky tu'uk yë ye'etyëjk mëti'ipë jaak'ëna'kën, kumeenypë ëkë mëti'ipë ëyoopën. E ka'ap jëtu'un të xytyuny.

¹¹ Këtii mtimtyë'ëkëty u'unk maay, ma ya'atë naax kajpnën nyija'awëtyëp yë ja'ay ko mijts oyjyot oywyinma'any xymyëëtëty ets oy winë xytyuny. Paatyës tyamës nkupëky ets mpëjkmëty ijxtëm të xy'amëtoyën.

¹² E oy jyëtu'unëty koos winkon mijts xymyëku'uk'aty, mijts tam wiinkpë mmëku'uk jaakwinkonpë këtiinëm ëjts.

¹³ Tyam, yaa ëkwë'ëmnëm, jopynyëm yajnijawëty wi'ix ya'atë winma'any wyi'imy, pën yë'ë tyunäämpy ma mijtsën mëti'ipë yë'ë patëpën, oy'atëp. E pën kajts tuna'any, Dios wintuuyës yam nyikäjpxy koos jëjp'ixyës nyajpaaty etsës ntunëty mëti'ipës xypyatpën. Tyam yaa ma'a po'kx, jopynyëm mnëjkxëty.

¹⁴ Jam yë Rut myääy Booz tyeky'ix'am jä'ä tsu'um. Komjëpom ka'anëm ënety xyiinyë ko ojts pyëtë'kojy, tëë ënety ja Booz y'ënë'ëmxëty ko nipën mëpaat tkanijawë ko ënety jam të myä'äy kamjotm.

¹⁵ Tä ja Booz t'ënëmaay: Yajënak yë mkumots ets xywyijtstëwëty, mëk xymyajts'itëty. Tä ja Booz t'ako'owëy jap motsjoty wëxtyikxy tsim ja tsajpmok ets tukkejkywyijtsëy ja Rut ets ojts wyimpity jatëkok ma kyajpnën.

¹⁶ Ko ja Rut jyä'äjty ma ja tyaak xyäkyën, tä yajtëëwë: ¿U'unk maay, wi'ix të mjaty të mkëpety? Tääts ja Rut tyukmëmëtyaktaayë tii ënety ja Booz të tunyën mëët yë'ë,

¹⁷ ets ojts tuk'ëwaanë: Tu'kë'ëyë ya'atë tsajpmok yë'ëjës të xymyo'oy, etsës të xy'ënëëmë: Mijts ka'ap mëpaat jëtu'unyë kë'ëwa'ats mwinpity ma ja mtaak mxäkxyën.

¹⁸ Ënet ja Noemi y'ënäny: U'unk maay tyam je'eyë n'ëwxijtmëty tii tuunëp jajtëp, tääpë ye'etyëjk nija'apës wa'ats ko tyam ka'ap pyo'kxa'any koonëm tyajwintu'upëkëty ya'atë jotmay.