Rut 2 - Biblia Dc en Mixe de Quetzaltepec

Yajpaaty yë Rut jam ma Booz yë kyamën

¹ Jam ijty yë Noemi tmëëtëty tu'uk yë myëku'uk, Booz xyëëwajtyp, paaty tmëku'uk'aty jä'ä ko yë nyiye'etyëjk Elimélec yë'ë ijty mëët tim winkon nyämyëku'uk'atyë; jotkujk ja'ay ijty yë Booz ets mëj'äämpy yë ja'ay jyëkyepyë.

² Ënet yë Rut jatëkok t'ënëmaay yë Noemi: Nanë, ëwatskës yë ntu'u, wä'änës nëjkx n'ixta'ay yë tsajpmok, kooxyëp muum npaatëtyës yë ja'ay mëti'ipë oyjyä'äyën ets jam kyamjotm npëjkmukëtyës yë tsajpmok mëti'ipë tu'uka'apën. Nëjkx, u'unk, nëjkx, jëtu'un ja tyaakxyäkxy y'ëtsoowë.

³ Tä ja Rut ojts nyijkxy kamjotm ma ja ja'ay jam tyajmuktën ja tsajpmok; tam ënety ja tuunpëtëjk tyuntë, jä'ä pyaye'eyë'k, ix'am ye'ey ets tpëjkmuky ja tsajpmok mëti'ipë ja tuunpëtëjk kë'ëka'atutëpën. Ojts tuk'oyë, jä'ä ko ya'atë kam Booz ja jyä'ä, mëti'ipë Elimélec myëku'uk'ajtypyën.

⁴ Tam ënety tyuntë ja ja'ayëty ko ja Booz jyä'äjty ets tkajpxpo'kxtaay ja tyuunpëtëjk. Wi'ix jyäty kyëpety mëku'uktëjkëty, Dios mkënu'kxëtëp. Näyjyëtu'un mijts, Dios mkënu'kxëtëp. Jëtu'un y'ëtsoowtë ja tuunpëtëjkëty.

⁵ Tä ja Booz tyajtëëy ja tuunpëwintsën: ¿E ximpë to'oxytyëjk tyunyën, pën yë myëku'uk?

⁶ Tä ja tuunpëwintsën y'ëtsooy: Moab ja'ay yë'ë, jä'ä ja to'oxytyëjk mëti'ipë mëët yë Noemi të jyä'tyën.

⁷ Tëës jëyëjp xyajtëy pën mëpaat tpaye'ey yë tuunpëtëjk, jä'ä ko yë'ëjëk pyëjkmukäämpy yë tsajpmok mëti'ipë naskin naska'ajëpën, jopyëp të tyëkë tuunpë; tyam, tam wäänë wyimpo'kxnaxy.

⁸ Tä ja Booz t'ënëmaay ja Rut: U'unk maay këtii maa wiinktsow mnëjkxëty, yaa mtunëty; tää yaa tsajpmok jyätyë, yajmuk jënu'un mmëtä'äky. Jää tun mëët yë tuunpëtëjkëty.

⁹ Pën maa nyëjkxtë, jam mnëjkxëty. Ëjts tëëjës n'ënëëmëtë ko këtii nëkoo m'ënaxëtëty. Pën mtëtsëp jam nëjkx mnëë'uuky ma tyaj'itën yë nyëë'apëjkënëty.

¹⁰ Tä ja Rut tkukajpxëy ets wyintäky nyaaxkooy mëët ja wintsë'kën ets t'ënëmaay ja Booz: ¿Wintsën, tiijës ko xy'oyjawë, janty'oy mjot mwinma'any xyajkëxë'ëky mëët ëjts, oyës njëpyaat njëpyo'kxëty?

¹¹ Tä ja Booz y'ëtsooy: Ëjts wa'atsës nijawë wi'ix janty'oy xymyëët'aty yë mtaak mxäkxy ets wi'ix mëk xywinkutsë'ëkën oy tëë ja mniye'etyëjk y'o'knë. Näy tëëjës nijawë ko mijts tëë yë mnaax nkajpn xy'ëxmatsy ets mteety mtaak tääts yaa të miny ma ëëtsëtyën oyës nwiinkja'ay'atë.

¹² Dios yë'ë nëjkx jëna'a mëjuyë. Ets Wintsën mëti'ipë y'ëwtajtëpën yë Israel ja'ayëty ma të xy'ixta'ayën yë näypyutëkë, yë'ë mkumayanëp mëjwiin këjää mëët ja m'oyjot m'oywyinma'any mëti'ipë të xyajnikëxë'ëkyën.

¹³ Ënet ja Rut y'ëtsooy: Mijts janty'oy mja'ay'äty mëët ëjts, yë m'aaw m'ayuk janty jotkujkës xyajnäjyawëty. Mëët ja aaw ayuk oypyë të xymyëkäjpxyës, oyës nkajëtu'unëty tä nitu'ukën yë mtuunpë.

¹⁴ Ko ja akujkxyëëw tpaty, tä ja Booz ojts tmëkäjpxy ja Rut ets t'ënëmaay: Min mkay, tyaa mtsajpkääky, kay uuk, xii tukpatijkoj yë tojkx. Tä ja Rut nyaaxwe'tsy ma ja tuunpëtëjk jamëtyën ets ja Booz tmooy ëpëky ja tsajpmoktë'ëts. Ku'uxyë ja Rut kyääy ets ëpëky ojts jyaak natëkë ja kyääytyuk ets tpëjkë'ky.

¹⁵ Ko ja Rut ojts jatëkok nyijkxy tuunpë ma tyajmukyën ja tsajpmok. Ënet ja Booz ojts tuk'ëne'emy ja tyuunpëtëjk ets t'ënëmaay: Mna'ixtëp tääpë to'oxytyëjk, wä'än tyajmuky yë tsajpmok mëti'ipë atsuumtä'äkyëtyën. Këtii wi'ix xy'ënëëmëtëty.

¹⁶ Ets tsokynyijot muum xyajka'atëty yë tsajpmok ets tpëjkmukëty. Ni pën tääpë to'oxytyëjk kya'ënaxëtëty.

¹⁷ Ja Rut tu'kxëëwpaaty ojts tyuny ma ja Booz ja kyamën koonëm tyajtsu'ujëy. Ko tyajpajk'ajty ja mëti'ipë ënety të tpëjkmukyën ets ojts tkijpxy, i'px tsim ojts pyëtsimy.

¹⁸ Tä ojts wyimpijnë ma ja kajpnën, tam tpatsëmy ja tsyajpmok ets tuk'ijxy ja xyäkxy Noemi. Ok tyajpëtsëëmy ja kyääytyuk ets tuk'akaaytyujky ja Noemi.

¹⁹ ¿U'unk maay maaxën tyam të mtuny të mkupëky? Jëtu'un ja Noemi tyajtëëy ja Rut. ¿Maatën ya'atë tsajpmokpajk të xy'ëkmaypyëjknë? Dios jaakmo'o jaakkäxëtëp yë ja'ay mëti'ipë ya'atë näypyëtëkë të tyäkyën. Rut wa'ats tukmëmëtyaktaay ja tyaakxyäkxy pën ënety mëët të tyunyën: Yë ja'ay maas ojts të ntunyën jä'ä xyëëwajtyp Booz. Jëtu'un t'ënëmaay.

²⁰ Ets ja Noemi y'ëtsoowë: Wintsën Dios kënu'kxëtëp mëjwiin këjää. Mëët ko xy'oyjya'aw xytsyuja'awëmë, yë'ë jëtu'unyëm yë y'oyjyä'äyëty, jëtu'un ijty jyä'äy'äty mëët ja mëti'ipë të y'o'knëtën. Tääpë ja'ay nmëku'uk ëëts yë'ëjëty, paaty patëp ets xypyutëjkëmëty.

²¹ Tääts ja Rut jyaak'ënany: Nen tëëjës xy'ënëëmë koos njaaknëjkxkojëty tuunpë mëët tu'knax ja tyuunpëtëjk, koonëm pyëtë'kta'ajëty ja pyëjktä'äky.

²² Tä ja Noemi t'ëtsooy ja y'u'unk xyäkxy: U'unk maay nikë oy ko jam mtuny ma Booz yë tyuunpëtëjk jam tyuntën, nëkoopë muum wiinktsow mnëjkxpëty, këtiipë pën m'ënaxëtëty.

²³ Jëtu'un'äämpy yë Rut ojts jam wyi'imy tuunpë ma ja Booz ja kyamën mëët ja tyuunpëtëjk, koonëm ja tsajpmok ojts pyëtë'kta'ay. Yë'ë ënety mëët tsyëënë ja tyaakxyäkxy Noemi.