Romanos 4 - Biblia Dc en Mixe de Quetzaltepec

Ja Abraham myëpëjkën, tu'uk ja ijxpäjtën

¹ ¿Wi'ix n'ëna'anmëty, tii ojts tpaaty ja nteety'ajt n'ap'ajtëmë Abraham?

² Ko jeexyë ja Abraham ojts oy wyi'im mëët ja Dios mëët ko winë oy të tuny, jyëkyejpy jeexyë nyämyëjjawëty, oy kyajamëty Dios wyintum.

³ Jëtu'un ja Dios ja y'aaw y'ayuk y'ënä'äny këxja'ay: Abraham ojts ja Dios tmëpëky, paaty ojts wa'ats yajnaxyë.

⁴ E jëtu'un, ko pën tyuny, yajmëjuupy yë'ë, ka'ap ja meeny yajnamo'oy, yë'ë yajmoopy mëti'ipë paat'ajtëpën.

⁵ E ko tu'uk yë ja'ay tmëpëky ja Dios, mëti'ipë wa'ats yajnajxypyën ja pokyjyä'äy, Dios myëjpëjktäkpy ja ja'ay ja myëpëjkën ets wa'ats tyajnaxy, oy tii tkatuny oy mëti'ipë tsoowpatpën.

⁶ Näyjyëtu'un ja David ojts tnimëtyä'äky ko jotkujk ja ja'ay yajpaaty mëti'ipë ja Dios wa'ats yajnajxëpën ets ka'ap ja pyoky yajmëjpëjktä'äky.

⁷ Jëtu'un ja David y'ënäny: Jotkujk ja ja'ay yajpaaty mëti'ipë ja Dios ja pyoky të nyime'kxyën, ets ka'ap ja pyoky yajmëjpëjktä'äky.

⁸ Jotkujk ja ja'ay mëti'ipë ja Wintsën ka'ap myëjpëjktakxëtyën ja pyoky.

⁹ ¿Ko jëtu'un ja David y'ënäny, wä'än jëtää yi'iyë pyaat'atëtë ja jotkujk'ajtën mëti'ipë tëë yajnatsujk'ëwtitën ja ye'etyëjkajtën, ëkë paat'ajtëtëp näjyëtu'un mëti'ipë ka'apënë? Tëë n'ëna'anëm ko yë Abraham oy ojts wyi'im mëët ja Dios jä'äkyëjxm ko myëpëjky.

¹⁰ ¿E jëna'a jëtää ojts oy wyi'im mëët ja Dios, ko ja Abraham ojts yajnatsujk'ëwtity ja ye'etyëjkajtën, ëkë ko ënety ka'anëm yajnatsujk'ëwtityë? ka'anëm ënety yajnatsujk'ëwtity ja ye'etyëjkajtën ko ojts oy wyi'im mëët ja Dios.

¹¹ Ja ijxwë'ëmën mëti'ipë ojts yajpëjktä'äkyën ko yajnatsujk'ëwtijty ja ye'etyëjkajtën, jä'ä yë'ë ets nyikëxë'ëkëty ko yë'ë oy të wyi'im mëët ja Dios ko tmëët'aty ja mëpëjkën. Jëtu'unts ja ja'ay mëti'ipë ja Dios myëpëjktëpën, oy kyanatsujk'ëwtityëty yë ye'etyëjkajtën, Abraham yë'ë y'ap'ajtëp y'ok'ajtëp ets oy wyë'ëmtë mëët ja Dios.

¹² Näy Abraham y'ap'ajt y'ok'ajtëp ja jutiis ja'ayëty mëti'ipë tsukyëtyën ets tmëpëktë ja Dios ijxtëm ja Abraham myëpëjkyën ko ënety ka'anëm yajnatsujk'ëwtity ja ye'etyëjkajtën.

Mëpëjkënkyëjxm ja waantä'äky y'atëy

¹³ Dios ojts tukwinwanë ja Abraham ets ja y'u'unk y'ok tukumayä'äny ja naaxwiinyëtë; ka'ap yë'ëkyëjxmëty ko ja ënä'ämën tpatuntëty, yë'ëkyëjxm ets oy ets mëtëy ja paye'eyën jyää'atëty ko myëpëjky.

¹⁴ Ko jeexyë yë'ë'atë ja kuma'ayën t'ëxajëja'antë mëti'ipë ja Dios ja y'ënä'ämën pyatuuntëpën, ka'ap jeexyë tyuny ko Dios yajmëpëky ets ni kyatuny jeexyë ja Dios ja wyaantä'äky.

¹⁵ Jä'ä ko ja ënä'ämën tukpatp ja tsëtyu'un ko ka'ap yajpatuny, e ma ja ënä'ämën kya'ityën ka'ap jam tii yajtuuntëkoy jä'äkyëjxm ko ka'ap ja ënä'ämën jam.

¹⁶ Jëtu'un ja waantakën xëmë tsyoowpaatëty mëti'ipë ja Abraham tyuunën ets tuk'oy'atëty ja y'u'unk y'ëna'k; tyaapë oyajtën namëyajtën ojts tpaatë, yë'ëkyëjxm ko myëpëjktë. Ka'ap yi'iyëty mëti'ipë pyatuuntëpën ja ënä'ämën tëyajtën, näjyëtu'un ja mëti'ipë mëpëjktëpën jëtu'un tä ja Abrahamën. Jëtu'un'äämpy ja Abraham teety nyäjxy ma ëëtsajtëmën.

¹⁷ Ijxtëm ja Dios ja y'aaw y'ayuk y'ënä'änyën: Tëë mijts npëjktä'äky ets ja naaxwiinyëtë ja'ay may xy'u'unk'at xy'ok'atëty. Abraham ëëts nteety'ajtëmë Dios wyintuuy wyinkujk, ja Dios mëti'ipë myoopyën ja juukyajtën ja o'kpë ets tyajkoj'ëtë'ëtsy mëti'ipë kaka'atpnëmën.

¹⁸ Ko ënety ka'ap tii ja Abraham t'ëkjëjp'ijxnë, jää ojts myëpëky ets jatëkok winë tjëjp'ijxy; jëtu'unts ojts nyäxy, teety ma ni'ëmukë ja naax kajpnën, jëtu'un ijxtëm ja Dios ënety të y'ënë'ëmxëtyën: Jëtu'un nëjkx ja m'u'unk m'ok myäyë.

¹⁹ Ka'ap ja Abraham ojts ja myëpëjkën y'amutskë oy ënety ja jyëmëjt myëko'pxëjanë ets nyija'awënëp ko ka'ap tii y'u'unk y'ëk'itanë, jä'ä ko mëjja'ay ni'ikëtynyë näjyëtu'un ja tyo'oxytyëjk Sara.

²⁰ Ka'ap ojts tmëjot'amutskë ja Dios ja wyaantakën, wäänëni'ik jyaak timmyëpëjky. Ojts ja Dios tmëjjawë tjaantyjyawë,

²¹ tëë ënety ja y'aaw jyot tpëjktä'äky ko Dios ja mëk'ajtën tmëëtëty ets tpatun ja wyaantä'äky.

²² Paaty ojts oy wyi'im mëët ja Dios.

²³ Ko ojts yajjaaywyi'imy ko ja Abraham ojts wa'ats nyäxy Dios wintum mëpëjkënkyëjxm, ka'ap yi'iyëty ja Abraham ojts jëtu'un yajnimëtyä'äky,

²⁴ näjyëtu'un ojts ëëtsajtëm nyajnimëtyakëmë. Jä'ä ko ja Dios yajmëjnajxyp näjyëtu'un ëëts ja nmëpëjkën'ajtëmë, ko nmëpëjkëmë mëti'ipë yajjuukpyëjkën ja nWintsën'ajtëm Jesús ko y'ëk'o'ky.

²⁵ Jesús, ojts yajkë'ëyäky ets y'ookëty mëët ko ënety ëëtsajtëm npokymyëët'ajtëmë, e ojts jyuukpyiky ets ëëtsajtëm wa'ts nwë'ëmëty.