Romanos 3 - Biblia Dc en Mixe de Quetzaltepec

¹ Pën jëtu'un, ¿maa yajtuk'oy'äty ko ja ja'ay nyätyijyë jutiis, ëkë ko y'ënä'äny ko tëë yajnatsujk'ëwtity ja ye'etyëjkajtën?

² Tuunp mëk ets kanaakpëky. Mëtu'kpëky ko jam ojts ja Dios ja y'aaw y'ayuk najtskäxë ma jutiis ja'ayëtyën.

³ ¿E tiixën të tyuny të jyätyë? ¿Wä'än jëtää ja Dios tkayajtuna'any mëti'ipë të tnikäjpxyënë?

⁴ Niwi'ix'äämpy. Dios aak mëtëy winë tuny, oy ja ja'ay ni'ëmukë y'anta'aktë. Jëtu'un ja Kënu'kxymyëkajtën y'ënä'äny: Mijts wa'ats mnaxa'any mëët mëti'ipë të xynyikäjpxyën, ets ko ënety myajnipaye'ey mijts mëta'akaanp.

⁵ E pën ëxëëk ëëts winë të ntu'unëmë ets tyajnikëxë'ëky ko mëtëy yë Dios winë tuny, ¿Wi'ix na'ëna'anmëty? ¿Ko Dios ka'ap tii oy tuny ko xytyukkëpäjtëm ja mpoky'ajtëmë? Jëtu'unës yam nkäjpxy ijxtëm ja naaxwiinyëtë ja'ay myäy tyäjyën.

⁶ Niwi'ix'äämpy. Ko jeexyë ja Dios mëtëy kyaTios'aty, ¿wi'ix jeexyë ja naaxwiinyëtë ja'ay tpaye'ey?

⁷ Pën tuunp koos n'antä'äky ets ja Dios ja tyiyajtën jaak'oy yajmëtoy: ¿Wi'ix koos xynyiwaanpätë koos mpokyja'ayëty?

⁸ Pën jëtu'un, ¿Tii ko ni'ikyë ëxëëk winë nkatu'unëmë ets myinëty ja oypyë? Jëtu'un jënaakën ja ja'ay myäytyë tyajtë, mëti'ipë ënantëpën koos yë'ëjës nimëtyäkpy ja ka'apë y'oyëtyën; tääpë ja'ay nitëjkëyëtëp ets nyitukëtëty.

Ni'ëmukë të npokytyu'unëmë

⁹ ¿Wi'ix na'ëna'anmëty? Ko njutiis'ajtëmë, ¿wä'än jëtää ëëts ni'ik n'oyajtëmë ets këtiinëm ja ka'apë jyutiisëtyë? Niwi'ix'äämpy. Jä'ä ko tëë yajnijawë ko pokyjotm ëëts nyajpata'ayëmë wä'än timpyënëty, oy tjutiisëty kyajutiisëty.

¹⁰ Jëtu'un ijxtëm ja Dios ja y'aaw y'ayuk y'ënä'änyën: Ka'ap pën, nitu'ukën mëti'ipë ja'ay wa'atsën.

¹¹ Ka'ap pën jyä'äkyukë, ka'ap pën maa mëti'ipë y'ixtääpyën yë Dios.

¹² Ni'ëmukë të nyëjkxta'atë ma ja ëxëëk tu'ujën, ni'ëmukë tu'knax të wyimpijta'atë ëxëëk. Ka'ap tu'ukën mëti'ipë ja oypyë tyuunpyën, Ka'ap pën, oyxyëp tu'ukën.

¹³ Ëxëëk ja yo'kjutëty ijxtëm o'kpëjutën ko ëwa'ats wyi'imy, je'eyë xëmë wyin'ëëntë, ko kyajpxtë tsääpy no'kpëm yajjawë.

¹⁴ Kajpxpojktëp ets ëxëëkëty y'ëna'antë,

¹⁵ yajja'ay'o'k pëyi'ikyë nyinëjkxtëp,

¹⁶ yajwintëkooytyëp ets yajmaay yajtajtëp ja myëku'ukëty ko maa nyëjkxtë,

¹⁷ ka'ap nijawëtë ja në'ë tu'u mëti'ipë yajjotkujk'ajtpën.

¹⁸ Ka'ap ja Dios tsë'ëkëtë.

¹⁹ Nnija'awëm ko tu'kë'ëyë mëti'ipë nyimëtyäkpyën ja ënä'ämën, yë'ëkyëjxm nimëtyä'äky ets twinmëtowtëty ja ja'ay mëti'ipë ja ënä'ämën yajmëjnajxtëpën ets amonyë y'itëty ni'ëmukë ets tku'ëtsowtëty ja pyokyëty jam Dios wyintum.

²⁰ Ka'ap yë'ëkyëjxmëty ja ja'ay oy wyi'im Dios wyintum ko tpatuny ja ënä'ämën, yë ënä'ämën paaty jyää'aty ets nija'awëmëty tii poky kapoky, ets nija'awëmëty ko npokyjyä'äy'ajtëmë.

Mëët ja mëpëjkën yajpaata'any ja nitsokën

²¹ E tyam, tëë ja Dios xytyuknija'awëmë wi'ix oy nwë'ëmëtyën mëët yë'ë, oy ja ënä'ämën nkanija'awëmë, yë'ë këm jëtu'un nyimëtyäkpy ja ënä'ämën ets ja Dios ja kyäjpxynyajxpëtëjk:

²² mëët ja mëpëjkën jam ma ja Jesukristë, Dios wa'ats tyajnaxy ni'ëmukë ja ja'ay mëti'ipë të myëpëktën. Ka'ap wyin'ixy wyinkexyëty;

²³ ni'ëmukë ja'ay të pyokytyunta'atë paaty tmëjëkäm'atë ja Dios ja myëj'ajt y'oyajtën.

²⁴ E ja Dios, mëët ko tmëët'aty ja tsojkën ja'awën ets ka'ap të yajkujuy nitu'kjënu'un, wa'ats të tyajnajxta'ay ja ja'ay, mëët ko ja Jesukristë të tuny ja yaj'ëwaatsëpëtsë'ëmën.

²⁵ Dios ojts jëtu'un tuknipëjktaakë ko ja Kristë mëët ja nye'pyny yajpaatëty ja pokynyimyä'kxën. Ya'atë pyokynyimä'kxën ënät yajpaaty ko yajmëët'aty ja mëpëjkën. Jëtu'un ja Dios tyajnikëxë'ëky wi'ix xyajnaxa'anëmë wa'ats, ko të tme'kxy ja nëë poky mëti'ipë ënety të ntu'un të nkajpxëmën,

²⁶ jä'ä ko yë'ë mä'kxtujkp yajpaaty. Yë'ë, jëtu'un ënety tyajknikëxë'ëka'any ko pyaye'ey ijxtëm pyaat'atyën ets oy wyi'im mëët ja Dios mëti'ipë myëpëjktëpën ja Jesús.

²⁷ ¿Ko jëtu'un, maa ja ja'ay ja myëj'ajt kyëjxm'ajtën nyatunëty Dios wintum? Tëkooytyääpy jä'ä. ¿E tii ko? Jä'ä ko mëpëjkën mëët ja ja'ay oy wyë'ëmtë Dios wintum ets ka'ap yë'ëkyëjxmëty ko tpatuntë ja ënä'ämën.

²⁸ Jëtu'un yajnijawë ko mëpëjkën mëët ja ja'ay oy wyë'ëmtë mëët ja Dios ets ka'ap yë'ëkyëjxmëty ko ja ja'ay tpatuntë ja ënä'ämën.

²⁹ ¿Wä'än jëtää yë Dios jämyë Tios'aty ma Jutiis ja'ayëtyën? ¿Ka'ap jëtää näjyëtu'un jam Tios'aty ma ka'apë ja'ay jyutiisëtyë? Yajnija'ap ko Tios'ajtääpy ma wiinkëtypë kajpnën,

³⁰ jä'ä ko tu'ukyë je'eyë Dios, mëti'ipë oy yajwë'ëmpyën ja ja'ay ko myëpëktë, wä'än tjutiis kyajutiisëty, pën tsuky katsuky.

³¹ Pën jëtu'un, ¿ka'ap jëtää ja ënä'ämën tii mëk'ajtën t'ëkmëët'ajnë ko yajmëët'aty ja mëpëjkënë? Niwi'ix'äämpy. Ni'ikyë njaaktimyajmëjnajxëmë ja ënä'ämën.