Proverbios 8 - Biblia Dc en Mixe de Quetzaltepec

Ma yajnimëtyä'äkyën ja wijyajtën

¹ Yë ixpëkyajtën mëk yä'äxy jyoky, ets wijyajtën yajmëtoowëp yë y'aaw y'ayuk.

² Jam kyuwa'akë tunkëjxm kopkëjxm, ets muum wya'ak'oyë ma tu'u ye'eywyä'kxyën,

³ yaxp jojkp ma tëjk'aawën, ets ma kajpn yajnitëkën.

⁴ Mëët miitskyëjxmëty naaxwiinyëtë ja'ayëty, tyamës ya'atë aaw ayuk nkajpxa'any.

⁵ Miitsëty ëna'ktëjkëty ninu'un tsuu mja'ay'atën ma ka'ap tii xynyijawëtën, jatë wi'ixtsow mja'ay'atëtyën ets wi'ixtsow winë xyjyä'äkyukëtëty.

⁶ Ja'aykyukëtë ya'atë, tyam ntukmëmëtya'aka'antë tu'uk ja winma'any, mëti'ipë ka'ap tjëkyepyën pën tjëjpmëkajpxëty.

⁷ Mëti'ipës yam nikajpxäämpyën yë'ë mëti'ipë jaantyën; ëjts ka'apës nwinjawë n'anta'akëty.

⁸ Tu'kë'ëyë yë n'aaw n'ayuk aakyë'ë mëti'ipë tëyajtënën. Ka'apës yë'ë nkäjpxy mëti'ipë ka'ap tyiyëtyën.

⁹ Yë ja'ay mëti'ipë wijyën ets mëti'ipë ja'akyujkëpën, wyinja'ap yë n'aaw n'ayukës.

¹⁰ Yë'ë wijyajtën jëtu'un jawëtë, tä yë pu'ts pujxn ets poop pujxn.

¹¹ Ni'ik yë wijyajtën tsyowpaaty këtiinëm jyëtu'unëty yë tsaa oyëtypë mëti'ipë tsowën, nitii mëët tkajëkyepy yaj'ijxkijpxëty mëti'ipë mëyajtpën.

¹² Ëjts, maas nxëëwatyën wijyajtën jamës nyajpaaty ma tii oy yajtunyën, nnija'apës wi'ix ja ijxpëjkën ets jot winma'any yajxon yajpaatëty.

¹³ Ko Dios yë'ë yajmëjpëjktä'äky, yë ëxëëkpë yaj'ëxëëk'ijxp. Ëjts ëxëëkës n'ixy yë nämyëjjawë näjyääntyjyawë, ets ëxëëkës n'ixy näjyëtu'un yë ëxëëk në'ë ëxëëk tu'u ets ja win'ë'ënën antakën.

¹⁴ Ma ëjtsën yam yajpaaty yë winma'any ko tii yajtuknipëjktaakë ets oy wyimpëtsëmy jyëjpëtsëmy, ëjts wijy'ajtën'ajtp, ëjts mëjaaw'ajtp.

¹⁵ Ëjts nyaj'ijtyp yë yajkutujkpëtëjk, ënä'ämpëtëjk ets mëti'ipë nyipaye'eytyëpën yë nëë poky.

¹⁶ Yë'ëkyëjxm koos njääjëty paaty yë yajkutujkpëtëjk oy yë nyaax kyajpn t'ënä'ämtë, ets kutuunktëjk oy tnipaye'eytyë ja nëë poky.

¹⁷ Ëjts ntsojkpyës mëti'ipës näjyëtu'un xytsyojkpën, mëti'ipës xy'ixtääpyën xypyatpës.

¹⁸ Ëjts nyäjkpyës yë näyajmëjnaxë, yë wit meeny, yë jotkujk'ajtën ets xoontakën;,

¹⁹ Mëti'ipës nyäjkpyën, ni'ik y'oyëty këtiinëm jyëtu'unëty yë wa'ats pu'ts pujxn. Mëti'ipës nnikäjpxypën oy ni'ik këtiinëm jyëtu'unëty yë wa'ats poop pujxn.

²⁰ Ëjts yë'ëjës yë në'ë tu'u tëypyë nkuuynyijkxyp, ja tëypyë ja najxtakn.

²¹ Mëti'ipës xytsyojkpën, nmoopyës winë ijxtëm pyaat'atyën: nyaj'ujtsëpës yë jyëën tyëjk mëët yë jotkujk'ajtën.

²² Ëjts yë Dios ojts më''ëka'any xyajkojy ma ënety ka'ap nitii kyojynyëmën, ma ënety ka'ap tii tsyo'ontä'äkynyëmën ets t'oytyunyëmën.

²³ Tëëyëpës xyajkojnë, më''ëka'any ma ënety ka'ap ja naaxwiinyëtë kyojynyëmën.

²⁴ Jääjës ojts xymyä'kxy ma ënety ka'ap ja mëjnëëmejy kyojnyëmën, ets ma ënety ka'anëm ja nëë myuutynyëmën.

²⁵ Ka'anëm ënety ja tun kopk yajpëjkta'aktënëm koos ja Wintsën ojts xymyä'kxy.

²⁶ Ka'anëm ënety ja naaxwiinyëtë tyajkojnyëm ets ja kam tu'u, ka'anëm ënety ja naax näjyëtu'un kyojnyëm mëti'ipë yë naaxwiinyëtë mëët y'oytyunyëtyën.

²⁷ Ko ojts tyajkojy ja tsajp ja nyiwits nyijuux, mëti'ipë yajpatpën nëëwiinkëjxy, ëjts tam'ajtpës ënety.

²⁸ Ko ojts tpëjktä'äky yë yoots nëëma'a jam tsajpkëjxm, ets ko ojts t'oytyuny yë nëëkopk jap mejyjoty, ëjts tam'ajtpës ënety.

²⁹ Ko ojts t'ëne'emy ja nëë këtiipë pyëtsëmëty ma jap y'ityën, ets ko tpëjktäky ja naaxwiinyëtë ma yajpaatëtyën,

³⁰ ëjts tam'ajtpës ënety, mëtoopë käjpxykyupëjkpës ënety näpyëjktä'äkyë ma yë'ëjën. Mëët ëjtskyëjxm janty jotkujk ënety yajpaaty, janaam jatsojkës ijty nwin'ëyi'iky nwinkëyetsy.

³¹ Janty xoontakpës ënety jam nyajpaaty ma ja'ay tsyëënëtën, jotkujkës ënety jam nnäjyawëty ma ja naaxwiinyëtë ja'ayëtyën.

³² E tyam, u'unkëty maayëty, mëtoow'ijtëkës. Jëtu'un winë xytyuntëty ijxtëm ëjts winë ntunyën, ënät jotkujk myajpaatëty.

³³ Ijxkuk ja'akyukëtë ja oypyë nätyu'uwinwow nätyu'uwinwitsë. Këtii xyjyëjpmëkajpxëtëty ja wijyajtën.

³⁴ Janty jotkujk yë ja'ay yajpaaty mëti'ipës xymyëtoow'ijtpën, ets winjëpom yajpaaty ijx'ijtp këwent'ajtpë maas yë njëën aaw ntëjk'aawën.

³⁵ Jä'ä koos ëjts pën xypyääty, jëtu'un tä pën tpaatyën yë juukyajtën, ets Dios janty'oy jyawëty;

³⁶ e koos pën xy'ëxmatsy, jëtu'un tä jeexyë atsë'ëkëtuuy nyäpyëjktä'äkyën; pënës xy'ëxëëk'ijxp, o'kën tsyojkën'ajtyp.