Proverbios 7 - Biblia Dc en Mixe de Quetzaltepec

Wi'ix ja wyinma'anyën ja to'oxytyëjk mëti'ipë wiink ye'etyëjk mëët jyëtityën

¹ U'unk maay, patun yë n'aaw n'ayukës, ets pëjkë'ëk tuunë'ëk ma mjot mwinma'anyën yë n'ënä'ämën ntëyajtënës.

² Patun yë n'ënä'ämën ntëyajtënës ets n'ijxpëjkënës. Jëtu'un këwent'at tä yë mwiin santë xykyëwent'atyën, ets mjuuky'atëty.

³ Këxtsumpyën xymyëët'atëty ma mkë'ëwa'axyën, akëpäjky xymyëët'atëty.

⁴ Jëtu'un yë wijyajtën xyjyawëty tä mtsë'ëjën, ets ijxpëjkën xyjyawëty tä to'oxy ëna'kën mëti'ipë oy mëët mnäjyëkyepyën.

⁵ Yë'ë mtuk'awoowtu'utëtëp ja to'oxytyëjk mëti'ipë wiink ye'etyëjk y'ijxypyën ets tam nyiye'etyëjk, mëti'ipë janty'oy yajmëtoopën kyäjpxy myëtyä'äky.

⁶ Jëtu'un tëkok n'ijxyës jamës ënety n'ijxwoony ma tëjk nyi'ëwa'atsëtyën,

⁷ jam ja ëna'ktëjkëty tyänëtë, ets tu'uk të n'ixyës mëti'ipë ka'ap wyijyëtyën,

⁸ ko nyijkxy ma tyëjkën, jam nyäxy tu'u'am, ma ja to'oxytyëjk tsyëënën,

⁹ e jää, tsuu jajmony, ma yajxon të kyootsënyën,

¹⁰ tëë nyipëtsëmyë tu'uk ja to'oxytyëjk akootstuuy, yajxon të nyäy'oytyunyë jëtu'un tä to'oxytyëjkën mëti'ipë jyot nyini'kx tyo'ktëpën,

¹¹ mëti'ipë ye'eynyajxpën ets je'eyë wyiin y'aaw tmëtë'ëty, ka'apë twinjawën tu'k'ityë y'u'unyëty jyëënjoty tyëkoty.

¹² Tu'kkajpnjoty je'eyë jyëtity, xii yaa muum tyänë në'ëjoty tu'ujoty, t'a'ixy tjëjp'ixy pën y'ëkmajtsyp.

¹³ Ënet ja to'oxytyëjk të tmatsy ja yä'äy'ëna'k ets të tsu'kxy, ets ka'ap tsyëtyuny ets t'ënëëmë:

¹⁴ Ëjts tëëjës tu'uk yë waantakën mpëjktä'äky, wintsë'kën nyakäämpyës, maas ja nay'ëëw'oy näykyajpx'oyë ntuna'anyën, e tyam të tpaaty maas ja jëtu'unpë ntunëtyën,

¹⁵ Paaty të nipëtsëmy; mijts ënety n'ixäämpy, e tëë njantypyääty.

¹⁶ Maas yë nmaapäjnën tëëjës ntukwinye'epy tu'uk yë wit janty oypyë mëti'ipë jap kojpën Egiptë,

¹⁷ etsës të ntukjaaxy tu'uk yë tsooy mëti'ipë pa'akxu'kpën, yë'ë mëët y'oytyunyëty, mirra, áloe ets canelë.

¹⁸ Min wä'än nimäjtsk nyajtukwatsëmë ja a'ukën mëët ja nätsyok näjyawë; tsojk tyam yajxon jotkujk näjya'awëmë ko tu'knax nmëët'ajtëmë ja tsojkën ja'awën, koonëm xyiinytya'akëty.

¹⁹ Ja nye'etyëjkës ka'ap jam tyam ma tëjkën: jeky'am të tsyoony.

²⁰ Tu'k xuumy ja meeny të tmënëjkxy, ka'ap tsojk wyimpita'any, jäänëm wyimpitëty ko ënety ja po'o pyi'k'aty.

²¹ Mëët yë'ë ko yajmëtoy janty'oy kyäjpxy myëtyä'äky ets ko jyänty wyoy jyänty wyity, ojts ja yä'äy ëna'k tukupëky.

²² Nitii ojts tka'ëkajpxnë ja yä'äy ëna'k, je'eyë tu'ktëyë tpanëjkxnë ja to'oxytyëjk. Jëtu'un tä tu'uk yë tsajpkaa yajwoownëjkxyën ma y'o'ktaknën, ëkë jëtu'un tä tu'uk yë jëtyu'u muum y'akääkën o'ktaknjoty,

²³ ets ok ja jyuukyjot yajtukuumnaxy, jëtu'un tä tu'uk yë joon kyukääkën xuumyjoty ka'apë tnijawë y'ooka'any.

²⁴ Paaty tyam u'unk maay, mëtoow'ijtkës yë n'aaw n'ayuk ets mëtoow'it yë nmëtyä'äkyës.

²⁵ Këtii yë mjot mwinma'any xyajtëkoyëty mëët jëtu'unpë to'oxytyëjk, këtii mnäyajtu'utëkoyëtëty, këtii xypyanëjkxëty,

²⁶ jä'ä ko jëtu'unpë to'oxytyëjk kanaak yë ja'ay të tyaj'ooky; yë y'o'kpë nimay nyäpyäätyë.

²⁷ Ko jam pën nyijkxy ma tyëjkën, jëtu'un tä jeexyë pën nyijkxyën o'kpë.