Proverbios 4 - Biblia Dc en Mixe de Quetzaltepec

Ma yajni'ënä'ämën ets yë'ë yajpanëjkxtëkëty ja oypyë në'ë aaw tu'u aaw

¹ U'unkëty maayëty, ja'akyukëtë wi'ix yë mteety m'ëëwij mkajpxwijëtë. Yajxon ja'akyukëtë ets xynyijawëtëty wi'ix winma'anymyëët mjuuky'atëty.

² Tëë mijts tu'uk nmo'otë yë oypyë winma'any mëti'ipë tu'uwinwoop tu'uwinwijtspën. Paaty n'ënëëmëtë ets këtii xyajtëkoytyëty mëti'ipë të ntuk'ijxpëktën.

³ Ëjts tëëjës näjyëtu'un nmutsk'aty, yë ntaakës mëkës ijty xytsyoky xyjyawë,

⁴ yë nteetyës ojtsës näjyëtu'un xyaj'ixpëky. Yajwë'ëm akëpäjky yë n'aaw n'ayukës. Yë'ë jëtu'un mtunëp mëti'ipë yam ntuk'ëne'empyën ets mjuuky'atëty.

⁵ Yë wijyajtën kujk'ajtën yë'ë mjawëp pëk maay. Këtii xyjyä'äytyëkoyëty yë n'aaw n'ayukës.

⁶ Tsok jawë yë wijyajtën ets këtii xy'ëxmatsëty, yë'ë mkuwa'anëtëp.

⁷ Tim mëjëyëjp yë'ë mmëjpëjkta'akëp yë wijyajtën kujk'ajtën.

⁸ Yë'ë jëtu'un mtsokëp mjawëp ets mëj myajnaxëtëty. Yë'ë mats mënän jotkujk ets xoontä'äky myaj'itëtëty.

⁹ Mo'ojanëp tu'uk yë mkujän mëti'ipë janty'oy këxë'kpën, yë'ë mëët y'oytyunyëty yë pëjy ets tpëjkta'aka'any ma mkëpajkën.

¹⁰ U'unk maay, mëtoow'it yë n'aaw n'ayukës, mijts jä'ä'at ets jëtu'un jeky mjuuky'atëty.

¹¹ Ëjts mijts nyajnëjkxëp ma ja wijy'ajt kujk'ajtën, ets nyajye'eyä'äny nyajnaxa'any ma oypyë ja në'ë aaw tu'u aawën,

¹² ma ka'ap tii m'atsipëtëtyën ets ka'ap ma mkunäp mkutä'pxëty oy jënu'un mpëyë'ëkëty.

¹³ Jat nijawë winë ets këtii xyjyä'äytyëkoyëty. Yë'ë patun ets mmo'ojëtëty yë juukyajtën.

¹⁴ Ni ma xykyapanëjkxëty yë ëxëëkja'aytyëjk, ni yë'ë xykyatuun'awinaxëty mëti'ipë tyuuntëp kyajpxtëpën.

¹⁵ Këtii jam mnajts'ye'ey mnajtsnaxëty ma yë'ë nyaxtën tyëkëtën. Tim mëjëkämkä'äk ets ye'ey yë mtu'u,

¹⁶ yë ëxëëkja'aytyëjk ka'ap jotkujk nyäyjyawëtë pën ka'ap tii tuuntëkoy tkajpxtëkoytyë. Yajtëkooytyëp yë tsyuu myä'äyëty ko pën wi'ix muum tuna'antë.

¹⁷ Yë'ë jya'awëtyëp ka'ayën ukënën yë tsiptu'unk ets ëxëëk jot ëxëëk winma'any.

¹⁸ Yë nyë'ë tyu'ujëty yë wa'ats ja'aytyëjk jëtu'un yë'ë tä yë xëëw y'aantä'äkyën komjëpom ko jyopyëp'aty. Ni'ikyë y'aantä'äky ets winë tukjajëtyä'äy.

¹⁹ Yë ëxëëkja'aytyëjk yë nyë'ë tyu'ujëty api'its akoots yajpaaty. Ka'ap tnijawëtë maa të kyunäpëtë ko muum kyëtawtë.

²⁰ U'unk maay, ijxkuk ja'akyukë yë n'aaw n'ayukës ets mëtoow'it yajxon.

²¹ Këtii nijëna'a xyajtëkoyëty, yajwë'ëm jap mwinma'anyjoty.

²² Yë kajpxwijën yäjkpy yë juukyajtën, yäjkpy yë oy'ajt mëk'ajtën ma ja'ayëtyën mëti'ipë pyatëpën.

²³ Yajxon winë oy xymyëmay xymyëtajëty ko tii xytyuna'anëty, jä'ä ko jëtu'un xytyunëty jotkujk mjuuky'atëty.

²⁴ Këtii xykyajpxëty yë aaw ayuk mëti'ipë ka'ap myëtëyëtyën, ets ni mka''anta'akëty.

²⁵ Mëj këjää ja mwinma'any xyajjëtitëty, ets jëtu'un akujk jotkujk mnaxëty mtëkëty.

²⁶ Yajxon xytyim'ixëty ma mnaswa'akën, jëtu'un jotkujk mnë'ëye'ey mtu'uye'eyëty.

²⁷ Këtii nijëna'a mtu'utëkatsëty, ets këtii jam mnëjkxëty ma ëxëëkpë tyu'uye'eyën.