Proverbios 30 - Biblia Dc en Mixe de Quetzaltepec

Ya'atë ojts tkäjpxy tmëtyä'äky yë Agur

¹ Ya'atë jëtu'un ojts tkäjpxy tmëtyä'äky yë Agur, myaank yë Jaqué, mëti'ipë jam kukajpn'ajtën Masá ets ojts yë Agur t'ënëëmë yë Itiel ets Ucal.

² Ëjts jëtu'un yajxon kujuun ma ja nmëye'etyëjktëjkënës, ëjts ninu'unës tii nkaja'akyukë.

³ Ka'apës ja wijyajtën nëkooyë nnijawë, ets ka'apës nnijawë pën Tios'ajtp mëti'ipë wa'atsën, ka'apë pyokymyëëtëtyën.

⁴ ¿Pën jam të y'ëknëjkxpë tsajpjotm ets pën jam të y'ëktso'onpë? ¿Pën ëkmayëtëp tmatsëty yë poj ets tmajts'itëty kyë'ëjootjoty? ¿Pën yë nëëmejy të t'ëkwinpijtpë witjoty? ¿Pën të tpëjktä'äky ja nyitsëpa'an mapaat ja naaxwiinyëtë y'ëwtitëtyën? Këtiis ënät mijts xy'ënëmääpyëty ko mnija'ap ja xyëëw ets ja y'u'unk xëëw.

⁵ Dios kyuwäämpy yë ja'ay mëti'ipë tuk'ijxpäjtëpën. Tëkokyë mëti'ipë yë'ë të twinwanën, kopkpëky ko nëjkx n'ëxajëmë.

⁶ Nijënu'un xykyayajni'ikëty ja ayuk mëti'ipë yë'ë të tnikäjpxyën; jä'ä ko jëtu'un xytyunëty, tsojk ëxëëk mtunëtëty ets nëjkx mtijyë win'ë'ëmpë.

⁷ Mäjtsk je'eyë mëti'ipë n'amëtoopyën, mijts Dios. Xymyo'ojëpës maanëmës ënety ka'ap n'ookynyëm ntëkoynyëmën.

⁸ Jëpëk jëtun ma ëjtsën tëkatsypë jot winma'any ets ja win'ë'ënën antakën, këtiis nëkooyë xyajkumeenytya'akëty, ets këtiis nëkooyë xyaj'ëyowëty. Jëtu'unës winë xymyo'ojëty tääjës naje'eyë ntukjuuky'atëtyën.

⁹ Jä'ä koos nëkooyë mëj këjää winë nmëët'atëty, tsojk mijts nja'atyëkoya'anëty ets n'ënanëtyës ko ka'ap n'ixy'äty; e koos ntim'ëyoowni'ikëty tsojkës ntëjkënëty mä'tspë ets jëtu'un nyajtëkooynyëtyës ja wintsë'kën ma mkënu'kxyxyëëwën.

¹⁰ Këtii xynyi'ojëty yë mëtuunpë kupëjkpë ma wyintsënën, jä'ä ko tsojk mpokëtëty ets nëjkx o'ktëy m'ëk jajt m'ëk këpäjnë.

¹¹ Tää ja'ay mëti'ipë pyojkpyën yë tyeety, ets tyaak ka'ap oy t'ëkmëkajpxnë.

¹² Tää ja'ay mëti'ipë wa'ats näyajnajxëpën, ets ka'ap jyot wyinma'any y'oyëty.

¹³ Tää ja'ayëty mëti'ipë mëj'äämpy näyajnajxëtëpën, ets ja jyiiky myëku'uk nijënu'un mëj tka'ixy.

¹⁴ Tää yë ja'ay mëti'ipë jëtu'un yë y'aaw tyëts jya'apën mëtyäätën; ets tää mëti'ipë y'oknak jya'apën tsujknën, jä'ä tjatsoktë tim këjxtaaytyëp jeexyë yë ëyoopëja'aytyëjk ma naax kajpnën.

¹⁵ Jëtu'un tä jëyujkën mëti'ipë ne'pny ukpën, jëtu'un nyäxy ja ja'ay mëti'ipë je'eyë tyäty kyaxën ets ënaan'ëtëtsp: Yak. Yak,

¹⁶ yë o'kpë jut, yë to'oxytyëjk mëti'ipë ka'ap y'u'unkën, yë it naaxwiinyëtë anë'ëk tëëtsë'ëkpë, ets jëën mëti'ipë ka'ap pyi'itsyën.

¹⁷ Mëti'ipë ja'ay ja tyeety y'ëxëëk'ijxypyën ets je'eyë ja tyaak tnëxi'iky tukxi'iky ko myëjja'ayënë, tääpë jëtu'unpë ja'ay nitëjkëyëp ets lut tsyu'tspëtsë'ëmxëtëty yë wyiin ets witsn y'awoon y'apotëtëty.

¹⁸ Jää tëkëëk nax, taxk nax mëti'ipë tsipën mëti'ipës ka'ap nja'akyukën wi'ix ko jyëtu'unëty.

¹⁹ Ja në'ë tu'u mëti'ipë pyaye'epyën yë witsn ko kyääkjëtity tsajpkëjxm, yë në'ë tu'u mëti'ipë yë tsa'any ye'epyën tsaajoty, yë në'ë tu'u mëti'ipë pyanëjkxypyën tu'uk yë kepy nyëë winye'epyë nëëwiinkëjxy ets ja në'ë tu'u mëti'ipë ja naaxwiinyëtë ja'ay ye'epyën ko tninëjkxy ja to'oxytyëjk.

²⁰ Ja to'oxytyëjk mëti'ipë ka'ap twintsë'ëkën ja nyiye'etyëjk, jëtu'un winë tuny: kyäy pyiky je'eyë, tääts y'apujy kyë'ëpujy yajxon ets ënät y'ënä'äny ko ka'ap ma tii tuuntëkoy.

²¹ Jää tëkëëk nax yë ja'ay ëkë taxk nax jëtää mëti'ipë ka'ap nijënu'un myëmëtaknëtyën ets ëxëëk yë naax kajpn tyajjaty:

²² yë mëtuunpë mëti'ipë yajkutujkpën, ets tsuuja'ay mëti'ipë ka'ap yë kyä'äyën y'ukën tyaj'ëmaaytyä'äkyën,

²³ ja to'oxytyëjk mëti'ipë ka'ap pën tsyokyën ets ja nyiye'etyëjk tpaaty, ets ja to'oxytyëjk mëti'ipë mëtuunpën, nyäjxy jëtu'un tä jeexyë yë'ë wyintajëtyën.

²⁴ Jää taxk nax yë jëyujk tsyëënëtë naaxwiinyëtë mëti'ipë wijyëtyën këtiinëm jyëtu'un'atë wijyjyä'äytyëjkëty.

²⁵ Yë nuj, nimay je'eyë, ka'ap nëkooyë jot mëjaaw tmëët'atë, jää ja jyi'kxy tnipëjkpätë ma pyojë'ëkyën.

²⁶ Näyjyëtu'un yë tsik, ka'ap nëkooyë nyimay'atë ets jap jyuuky'atë tsaajoty.

²⁷ Yë mu'u ënätëty janty kijpxy xëmë ye'eytyë ets ka'ap tmëët'atë pën ënä'ämëtëpën.

²⁸ Yë mutsk tik, mutsk yë'ë, jëtu'unyë tyëkoy kë'ëjootjoty, ets ja'ajtp jampaat ma yajkutujkpë y'ëne'emyën.

²⁹ Jää tëkëëk jotmëktëjk ets jëna'ajëty taxkpaat, ëwa'an ëwa'an ye'eytyë:

³⁰ yë kaa, mëti'ipë aak tsë'këyëpën oypyënëty, ka'ap kye'eky ets nitii tkakuke'eky;

³¹ yë këtseynyë'aaw, yë tsajppax yä'äypyë ets yajkutujkpë mëti'ipë jëyëjp nëjkxpën ma ja tsyiptuunpëtëjkën.

³² Pën nanitsuu nanipoj mëj këjxm të mnäypyëjktä'äkyë ets ajotkumonë tii ëxëëk të xynyimay të xynyitajë, mëmay mëtaj yajxon.

³³ Pën mka'apëtijtyp yë tsi'tsknëë, mantequillë y'awinpita'any, pën amëjaaw xyi'ity yë mjëjp, taxaanp yë'ë; näjyëtu'un ko ja mmëku'uk xy'ënaxëty, je'eyë mëët m'ëk'tsiptuunëty.