Proverbios 3 - Biblia Dc en Mixe de Quetzaltepec

Ja nyiwinma'any wi'ix mëpaat yajpaatyën ja wijyajtën

¹ U'unk maay, këtii xyjyä'äytyëkoyëty yë n'ijxpëjkënës. Pëjkë'ëk ma mjot mwinma'anyën yë n'ënä'ämënës,

² jëtu'un jeky mjuuky'atëty ets myajpaatëty xëmë jotkujk.

³ Këtii nijëna'a xymyajtstu'utëty yë nätsyok näjyawë ets tëyajtën, jëtu'un xymyëët'atëty tä nantsëmën, yajwë'ëm akëpäjky ma mjot mwinma'anyën,

⁴ jëtu'unts mtukxoonta'akëtëty ets m'oyjyawëtëty yë Dios ets naaxwiinyëtë ja'ay.

⁵ Tuk'ijxpät yi'iyë Dios winë aaw winëjot ets këtii yi'iyë xytyukjotkujk'atëty ko tii xyjäty xynyijawë.

⁶ Dios yë'ë mtimjyotnakon'atëp oy tii xytyimtunëty, ets yë'ë myajnëjkxëtëp ma ja tu'ujën mëtëypyë.

⁷ Këtii janty wijy mnäyajnaxëtëty. Winkutsë'ëkë yë Dios ets näjyëpëkët ma ja ëxëëkpën.

⁸ Yë'ë jëtu'un tu'uk mëk tsooy ets ja mjot mnini'kx tuk'oy'atëty.

⁹ Mëtun Dios mëët yë mwit mmeeny ets mjë'kxy mpëky; mëët yë m'aay m'ujts mëti'ipë mkamwinm mtu'uwinm myajpëtë'kpyën,

¹⁰ jëtu'un'äämpy xëmë ujts y'itëty ja mjëën mtëjk mëët ja mjë'kxy mpëky.

¹¹ U'unk maay, këtii xywyiinkjawëty ko yë Dios mtukmëkajpxëtëty ma ënety tii oy xykya'tunyën, ets këtii xy'ëxëëkjawëty ko mmëkmëkajpxëtëty.

¹² Dios y'awijtsëkpy yë ja'ay mëti'ipë tsyojkpy jya'apën, jëtu'un ijxtëm tu'uk yë u'unkteetyën tyukumëtoopy yë myaank ko tii tuuntëkoy, jä'ä ko tsyojkpy jya'ap.

¹³ Janty jotkujk ja ja'ay mëti'ipë të tpaatyën ja wijyajtën, ets mëti'ipë pyätypyën ja këpetyajtën.

¹⁴ Jä'ä ko ni'ik tsyowpaaty këtiinëm jyëtu'unëty yë poop pujxn, ets ni'ik yajjotkujktä'äky këtiinëm jyëtu'unëty yë pu'ts pujxn.

¹⁵ Yë wijyajtën ni'ik yë tsyowpaaty këtiinëm jyëtu'unëty tsaa tsowpë. Nitii jëtu'un kya'oyëty ijxtëm yë wijy'ajtënën.

¹⁶ Ja wijyjyä'äy pyätyp ja juukyajtën mëj këjää, ets näjyëtu'un ja wijyjyä'äy pyätyp ja wit meeny mëj këjää.

¹⁷ Ko yë'ë mpanëjkxmëty janty'oy wyimpëtsëmy jyëjpëtsëmy. Ets ko jam njuuky'ajtmëty ma jëtu'unpë ja në'ë aaw tu'u'aawën janty akujk jotkujk nyajpatmëty.

¹⁸ Yë ja'ay mëti'ipë wijyën, ets mëti'ipë winë nyija'apën, mëj këjää yë juukyajtën tpaaty t'ixy, janty jotkujk ja ja'ay yajpaaty mëti'ipë tyukjajtypyën wi'ix jëtu'unpë tyajwë'ëmëtyën jyootjoty kyëpajkjoty.

¹⁹ Mëët ja wijyajtën ets ja nija'awën ojts tyajkojy yë Dios yë tsajp ets naaxwiinyëtë.

²⁰ Yë'ë mëët yë wijyajtën ojts tyajnäywyä'kxyë yë mëjnëë, ets näjyëtu'un tyajtso'ony yë maanik yootsjotm.

²¹ U'unk maay, wijy kujk xëmë mjuuky'atëty ets këtii nijëna'a xyjyä'äytyëkoyëty yë këpetyajtën.

²² Yë'ë nëjkx myajjuuky'ätyë ets oy myajkëxë'ëka'anyë, jëtu'un tä yë ja'ay oy yajkëxë'ëkyën yë wit tujkxy.

²³ Akujk jotkujk mtimjyëtitëty në'ë'aay tu'u'aay, ets ka'ap maa mkunäp mkukoxëty.

²⁴ Ko mpo'kxëty, ka'ap tii xytsyë'ëkëty xyjyawëty; ko mnäkyo'okëtëty akujk jotkujk mma'a mpo'kxëty.

²⁵ Ka'ap mtsë'ëkëja'any oy atsë'ëk ajawë myin wyinkonëty, ets ni jää mkatsë'ëkëja'any ko ënety ëxëëk jyatë kyëpätë ja ëxëëkja'aytyëjkëty,

²⁶ jä'ä ko yë Dios yë'ë mmo'ojanëp yë akujk'ajt jotkujk'ajtën, ets yë'ë ka'ap tyajkutuka'any ets muum mka'ajëty o'këntum.

²⁷ Këtii xytyukwintuk'ookëty yë mëyajtën ko pën m'amëtowëtëty, pën jyëkyejpy xytyunëty.

²⁸ Këtii komjëpom xytyuna'anëty ja mëyajtën mëti'ipë jyëkyejpyën tyam xytyunëty.

²⁹ Këtii ëxëëkjaty yë mjëëky mmëku'uk xynyimay xynyitajëty mëti'ipë m'oyjya'aw mtsujja'awëyëpën.

³⁰ Këtii nëkoo oy pën mëët mtsiptun mtsipkajpxëty pën ka'ap pën wi'ix mtunyë.

³¹ Këtii yë ja'ay xy'ëxëëk'ixëty mëti'ipë ka'ap yë wyinma'anyën, ni xykyatunëty jëtu'un winë ijxtëm yë'ë winë tunyën;

³² jä'ä ko yë Dios nijënu'un tkatimtsyoky yë ëxëëkja'aytyëjk, e ja ja'ay mëti'ipë oyjyä'äy'ajtpën yajxon tjantytsyoky tjaantyjyawë.

³³ Yë Dios pyojkpy yë ëxëëk ja'ay yë jyëën tyëjk, ets kyënu'kxyp yë oyjyä'äy yë jyëën tyëjk.

³⁴ Yë Dios nyëxikpy tyukxikpy yë ja'ay mëti'ipë je'eyë nëxik tukxiktëpën, e mëti'ipë yu'unk naxym juukyajtpën janty'oy tsoky tjawë.

³⁵ Ja näykyumayë ets ja nämyëjpëjkta'akë, yë'ë kyuma'ayën'ajtyp yë wijyjyä'äy, e ja tsuuja'ay yë'ë tyukmëjpëtsëëmpy ko ka'ap pën y'oyjyawëty.