Proverbios 28 - Biblia Dc en Mixe de Quetzaltepec

¹ Yë ëxëëk ja'ay nëkooyë jyänty kye'eky jyänty pyuty oy pën kyapapo'oyë; yë wa'ats ja'aytyëjk akujk jotkujk tyimnäjyawëtë jëtu'un tä kaajën.

² Ko naax kajpn ka'ap oy nyë'ëye'ey tyu'uye'ey, aak ënä'ämantëp jää ja'ay, e mëti'ipë tyukjajtypyën wi'ix tu'uwinwowëtyën yë nyaax kyajpn, nyija'ap wi'ix winë oy tyaj'itëtyën.

³ Yë ëxëëk ja'ay mëti'ipë o'ktëy tyuunpyën yë ëyoopëja'ay, jëtu'un nyäxy tä kyomtu'uyën ets tyajma'ta'ay ja pëjktä'äky.

⁴ Mëti'ipë y'ëxmajtstëpën ja ënä'ämën tëyajtën, yë'ë y'oyjya'awëtyëp ëxëëkja'aytyëjk; e mëti'ipë pyatuuntëpën ja ënä'ämën tëyajtën wyiink'ijxtëp ja jëtu'unpë.

⁵ Yë ëxëëkja'aytyëjk ka'ap nijënu'un twinjawëtë tii ja'ay tyijpy tu'knaxajtën ets ja oypyë ja nänyipaye'eyë; e mëti'ipë y'ijxtaaytyëpën yë jot winma'any ma Tiosën, wa'ats twinjawëtë.

⁶ Nikë oy'ajtp ni'ik ko ja'ay y'ëyoy ets oyjya'awëyëp oypyënëty, ets këtii ko ja'ay kyumeenyëty ets ëxëëk jyä'äy'äty.

⁷ Mëti'ipë pyatuumpyën yë Dios yë y'ënä'ämën tyiyajtën, wijy jëtu'unpë u'unk ëna'k; e mëti'ipë yi'iyë pyajëtijtypyën kaxtëjk je'eyë tyeety tyajtsëtyuny.

⁸ Mëti'ipë ja'ay may yë meeny nyipëjkpejtypyën ko tyäky ënu'kxy, yë meeny y'u'unk yë'ë nëjkx tjä'ä'aty mëti'ipë jyiiky myëku'uk pya'ëyoopyën.

⁹ Pën jää pën mëti'ipë ka'ap tja'akyukëja'anyën yë Dios yë y'ënä'ämën tyiyajtën, Dios ka'ap nëjkx kyupëkyë ko tjamëkajpxëty.

¹⁰ Mëti'ipë ja'ay yë myëku'uk wyoownëjkxypyën ma ëxëëk tu'ujën, kë'ëm ëxëëk jyata'any kyëpäta'any; e mëti'ipë ka'ap tii tëko'oyën tunyën, oypyë y'ëxajëjantëp.

¹¹ Yë kumeenyjyä'äy janty ixpëky nyäjyawëty, je'eyëp ko yë ëyoopëja'ay mëti'ipë wijyën tsojk tsyuu'ixëtëty.

¹² Ko yë wa'ats ja'aytyëjk myëta'aktë, xoontaktëp ja ja'ayëty; ko yë ëxëëkja'aytyëjk myëta'aktë, näyu'tstaayëp yë ja'ay.

¹³ Mëti'ipë ja'ay kyuyu'tsypyën yë pyoky, ka'ap oy jyuuky'ata'any; e mëti'ipë nyikäjpxypën ko tyuuntëkoy nëjkxëp yajpokymye'kxy.

¹⁴ Janty jotkujk yë ja'ay yajpaaty mëti'ipë wyinkutsë'këpën yë Dios; e ja'ay mëti'ipë ka'ap jyä'äkyukën, ëxëëk jyata'any kyëpäta'any.

¹⁵ Jëtu'un tä tu'uk yë kaajën myu'uy nyiitsyën, jëtu'un tä tu'uk yë osë yä'äxy jyokyën, jëtu'un yë ëxëëk ja'ay mëti'ipë y'ëne'empyën yë naax kajpn ma ëyoopëja'aytyëjk tsyëënëtën.

¹⁶ Ko tsuuja'ay yë'ë yajkutuky ma tu'uk yë naax kajpnën ni'ikyë kyëjääjë ëyo'on jotmay; e yë ja'ay mëti'ipë ka'ap tii t'atsokyën, pyatäämpy yenyjyuukyajtën.

¹⁷ Yë ja'ay mëti'ipë të yaja'ay'ookyën, xëmë je'eyë kyä'äka'any koonëm y'ookëty. Wä'än tnëjkx, ka'ap pën t'ëtukëty.

¹⁸ Yë ja'ay mëti'ipë oy winë tyuunpyën, nëjkxëp yajmo'oy ja nitsokën; e mëti'ipë ëxëëk ja jyot wyinma'any, jam kya'aja'any ëyo'ontum.

¹⁹ Mëti'ipë ja'ay yuup tuunpën kyamjotm tyu'ujotm, ka'ap tii y'ëmaaytya'aka'anxëty; e mëti'ipë ja'ay yi'iyë pyajëtijtypyën nuuxtëjk, nëjkxëp y'ëyoy jyotëkoy.

²⁰ Mëti'ipë ja'ay tëy tëtä'äky ja'ay'ajtpën, aak oyjya'awëyëp ja'ay; mëti'ipë yi'iyë myëmääpy myëtäjpyën wi'ix kyumeeny'atëtyën, nëjkxëp tkumëtoy.

²¹ Ka'ap y'oyëty ko win'ixy wiinkexy ja'ay yajtsoky, yë'ëpaat ja'ay yajtëkoyë tu'ktukpyë tsajpkääky.

²² Mëti'ipë ja'ay tyäty atsojkpën, poj'am ja wit meeny tjapaata'any ets ka'ap tnijawë ko niminanëp ja ëyo'on.

²³ Jëna'ajëty ni'ik yaj'oyjyawë mëti'ipë nimëtyakpën ko tii oy kyayajtuny, këtiinëm ja ja'ay janty oypyë nyimëtyä'äkyën.

²⁴ Jëëky mëku'uk nyäxy yë ja'ay ma yajja'ay'o'kpën mëti'ipë ja tyaak tyeety tyoompy mye'tsypyën ets ënät y'ënä'äny ko ka'ap tii poky tuny.

²⁵ Mëti'ipë ja'ay je'eyë atsojkpën, tsip ixtääpy je'eyë, e mëti'ipë yë Dios tyuk'ijxpejtypyën, jotkujk jyuuky'ata'any.

²⁶ Yi'iyë tsuuja'ay ënaanp ko oy myäy tyäjy; mëti'ipë ja'ay niwijy winë tyuunpyën, ëwaatsëtum nyäyaj'ita'anyë.

²⁷ Mëti'ipë ja'ay pyutëjkëpën yë ëyoopëja'ay, ka'ap tii tyëkoy'ata'anxëty; e mëti'ipë ja'ay winë tyukwintuk'o'kpyën ma ëyoopëja'ayën, nëjkxëp yajpoky.

²⁸ Ko ëxëëkja'aytyëjk myëta'aktë, näyu'tstaayëtëp ja'ay; ko y'ooktë tyëkoytyë wa'ats ja'aytyëjk jää mëtaktëp.