Proverbios 27 - Biblia Dc en Mixe de Quetzaltepec

¹ Këtii xynyikajpx xynyimëtya'akëty tii jëpom mtunäämpyën, jä'ä ko ka'ap xynyijawë tii jëpom tunan jatanëp.

² Ixmats ets wiink ja'ay oy mnimëtya'akëtëty; ka'ap y'oyëty ko kë'ëm oy mnänyimëtyä'äkyë.

³ Yë tsaa ets jin je'emtyëty yë'ë, e yë ëwa'an'ajtën ni'ik jye'emtyëty këtiinëm yë tsaa ets jin.

⁴ Yë äkë toyë oy myëkëty, ets joot'an yaj'atëkoopy winë, e yë joot'an'ajtën tsip yë ja'ay tkumä'kxëty.

⁵ Ni'ik y'oypyëtsimy ko ja'ay ënätyë myëku'uk tukmëkäjpxy mëti'ipë oy kyatuumpyën, ets këtii ko wiinkë'ëy akë'ëy je'eyëm t'oyjyawë.

⁶ Ni'ik oy ko jëëky mëku'uk ntuk'ijxpäjtmëty mëti'ipë ënätyë tukmëkajpxpën ko tii oy kyayajtuny, ets këtii ko tu'uk yë mëtsip tsyu'kxy.

⁷ Mëti'ipë ja'ay ku'uxyën, yë'ëpaat uuxpa'ak ka'ap txu'kxjawë; mëti'ipë ja'ay yuu'o'këpën, yë'ëpaat yë ta'ampë pa'ak tjawë.

⁸ Jëtu'un tä tu'uk yë joonën mëti'ipë myëjëkämkekpyën yë pyä'än, jëtu'un ja ja'ay mëti'ipë myëjëkämkekpyën ja nyaax kyajpn ma ojts myëxu'unk'atyën.

⁹ Yë jot winma'any yë'ë mëët jyotkujkë oyëtypë tsooy mëti'ipë pa'akxu'kpën; Näyjyëtu'un ja oypyë ja ëëwwij kajpxwijën yajjotkujktäkpy ja jëëky mëku'uk.

¹⁰ Kajëna'a ja mjëëky mmëku'uk xykyaja'atyëkoyëty, ni yë'ë ja mteety ja jyiiky myëku'uk mëti'ipë mëët të nyämyäyën. Nijëna'a jam xykyamënëjkxëty ja m'amay mjotmay ma jyëën tyëjkën yë mmëkä'äx.

¹¹ U'unk maay, wijy mja'ay'atëty, ets jëtu'unës ëjts jotkujk nnäjyawëtëty, jëtu'un tjëkyäpëty n'ëtsowëtyës ja mëti'ipës xyajjoot'anpëjktëpën.

¹² Mëti'ipë ja'ay këpetyën, y'ijxyp ma kyutsë'ëkëtyën ets ka'ap jam nyäxy, e mëti'ipë ka'ap kyëpetyëtyën, ni'ikyë tyu'uye'ey'ëti'ity ets ëxëëk jyäty kyëpety.

¹³ Pën tii yäjkpy nu'kxtsoy ma ja'ayën mëti'ipë ka'ap t'ixy'ätyën, pëjkë wyit ets oytyiijëty mëti'ipë jyä'ä'ajtypyën, ets yë'ë wyë'ëmëty ijxpäjtën ko ënety tkëpäta'any.

¹⁴ Ko jopyëp janty tsojk nmëku'uk'ajtëm nkajpxpo'kxmëty, jëtu'un tjawë tä jeexyë ëxëëkjaty yaj'ënëëmën.

¹⁵ Jëtu'un yë to'oxytyëjk nyäxy mëti'ipë je'eyë tyäty pi'tskajpxpën tä tu'uk nëëtsunën mëti'ipë ka'atëëpën ko tyu'uy.

¹⁶ Ko nja'ëtuka'anmëty wi'ëxmës xytyuny, jëtu'un tä pojën wi'ëxmës xy'ëk'ëtuky, ets on wi'ëxmës xy'ëkmatsy.

¹⁷ Yë juunpujxn jam yajme'ey ma juunpujxnën, ko ja'ay y'oyëja'anëty, myënaaxwiinyëtë ja'ay yaj'oyëtëp.

¹⁸ Mëti'ipë kyëwent'ajtypyën, yë y'ääytyëëm y'ujtstëëm kë'ëm tjë'kxy tpëky; pën kyëwent'ajtyp yë wyintsën, kumay nyäxy.

¹⁹ Jëtu'un ijxtëm yë wiin jëjp y'akëxë'ëkën nëëjoty, jëtu'un yë ja'ay yë jyot wyinma'any tyajwinkëxë'ëky.

²⁰ Yë o'kën tëko'oyën, yë o'kpë jut, ets ko yë naaxwiinyëtë ja'ay ka'ap kyu'uxyë, jëtu'un mëti'ipë ka'ap nijëna'a kyixy nyäxyën.

²¹ Yë pu'ts pujxn ets poop pujxn jap yaj'ixy jëënjotypyën janty yë'ë, e ja'ay yë'ë mëët yajtuk'ixy wi'ix jyä'äy'ätyën ko oy yajnimëtyä'äky.

²² Yë tsuuja'ay ka'ap nyiwa'atsyë yë tsyuu'at oy jënu'un yanimä'ä yajnijëtsëty.

²³ Mëk xykyëwent'atëty yë mkupixyny ets mtsajppax, yë'ë mëmay mëtajëp.

²⁴ Jä'ä ko wit meeny ka'ap xëmëkyëjxm nmëët'ajtmëty, ets ni yë'ë xëmëkyëjxm kyayajmëët'aty yë ënä'ämën kuttujkën.

²⁵ Ko mëëy pyëtsëmëty ets tsuxk ujts myuxëty, ets yajpëjkmukëty yë ujts jam tunkëjxm,

²⁶ mpatäämpy yë mwit mtujkxy ma ja mkupixynyën, ets mwit mmeeny ma mtsajppaxën,

²⁷ ets tsi'tsknëë mëti'ipë mëët xy'uukëty yë m'u'unk m'ëna'k ets mtuunpëtëjk.