Proverbios 25 - Biblia Dc en Mixe de Quetzaltepec

Ja mëkoxk nipëtë'ëkpë ja Salomón ja y'aaw y'ayuk

¹ Näyjyëtu'un ya'atë aaw ayuk yë'ë ojts yë Salomón tkäjpxy, ojts tjaaynyajxta'atë yë ja'ayëty mëti'ipë ënety jam tuuntëpën ma Ezequías yajkutukyën, jam Judá.

² Dios mëj'äämpy najxp, ko ja'ay tukjaty wi'ix tii yu'utsy tmëët'atëtyën, mëj'äämpy yë yajkutujkpë nyäxy ko twinjawë.

³ Tsip ets yajnijawëty jënu'un kyëjxmëtyën yë tsajp, jënu'un kyëkëty yë naaxwiinyëtë, ets wi'ix ja jyot wyinma'anyën yë ja'ay mëti'ipë ënä'ämpën yajkutujkpën.

⁴ Yajwa'ats yë poop pujxn, ets poop pujxn ka'tspë t'oytyunëty tu'uk yë a'ukën.

⁵ Jëkäx yë ëxëëk ja'ay ma yajkutujkpën, ets mëtëy tunëty ja nipaye'eyën.

⁶ Këtii janty mëj mnäyajnaxëtëty ma tu'uk yë yajkutujkpën, ets këtii jam mnaaxwäätsëty ma kopktëjk y'u'unyëtën.

⁷ Nikë oypyëtsëmëp ko pën m'ënë'ëmxëtëty min, yam u'unyë, ets këtii ko myajtsëtyunëtëty ja kopktëjkëty. Mëti'ipë të xy'ixyën

⁸ këtii ënätyë xynyikajpxëty ma ja yajkutujkpëtëjkën, jä'ä ko tsojk wiinkpë ja'ay myinëty mëti'ipë tii të t'ixyën ets myaj'ënëëka'ajëtëty ets ka'ap xy'ëknija'awënëty wi'ix m'ëna'anëtyën.

⁹ Mnäkyukajpxëtëp yajxon ko pën tii poky mtuknipëkëtëty, je'eyëp ko këtii xyajnitë'kxëty mëti'ipë ënety yu'utsy mnija'apën,

¹⁰ jä'ä ko wä'änxyëp ënety jam pën tmëtoow'ity ets nëjkx myajtsëtyu'unpaatyë, e mijts ëxëëk nëjkx mwë'ëmy ets ka'ap nëjkx t'ëkjëkyäjpnë wi'ix mnäyajtso'okëtëty.

¹¹ Ko ja'ay jää tii tnikäjpxy ma ja aaw ayuk myëyätyën, jëtu'un nyäxy tä ujts tëëmën mëti'ipë aak pu'ts pujxnën ets mëët y'ijxëntëkë ja poop pujxn.

¹² Jëtu'un tä kë'ëjiitsën ets nantsëmën mëti'ipë wa'ats pu'ts pujxn myëët'ajtypyën, jëtu'un nyäxy ko tii nyajtukmëkajpxmëty ets nyajtuk'ënëmä'ämyëty, ets oy nkupëjkmëty.

¹³ Ja ja'ay mëti'ipë oy käjpxyyajkpën jotkujk tpëjktä'äky ja mëti'ipë käjxëpën, jä'ä ko jëtu'un nyäjyawëty tä jeexyë tip kyä'äyën ma myëk'anyën.

¹⁴ Jëtu'un tä je'eyë wyintukyën ets pyojyën ets ka'ap maa tuu, jëtu'un ja ja'ay nyäxy mëti'ipë je'eyë winë y'ëwa'anëpën ets ka'ap tii tyäky.

¹⁵ Ko ja'ay y'ëwxity myä'kxtuky yajxe'empy yë äkë. Ko ja'ay oy tsuj xyony y'ity yajjotujkpy ja'ay mëti'ipë kujuunën.

¹⁶ Ko uuxpa'ak xypyaatëty këtii xyjyë'kxni'ikëty, këtiipë myaj'ëëtsëtëty ko nëkooyë xyjyë'kxëty.

¹⁷ Ko mmëku'uk xykyu'ixëty ma jyëën tyëjkën, këtii janty xëmë jam mnëjkxëty, këtiipë jëna'a mmëtsipkä'äxëtëty ets je'eyë m'ëk jaak'ëxëëk'ijxënëty.

¹⁸ Jëtu'un tä tëypyujxnën ets ti'pxnkepyën janty jëjpxu'unypë, jëtu'un ja ja'ay nyäxy mëti'ipë ja jyiiky myëku'uk nyi'ë'ënëpën wiinkjaty.

¹⁹ Ko ja ja'ay ntuk'ijxpäjtmëty mëti'ipë ka'ap wyintëy wyinkujkëtyën jää jotmayjoty, jëtu'un tpaaty tä jeexyë tekytyu'uk pën ye'eyën jä'ä ko tekytyëj, ëkë tä jeexyë tyëts tukkayën mëti'ipë të kyutëjtu'utyën.

²⁰ Ko tu'uk ja'ay yajwin'ëy mëti'ipë mon tuk yajpatpën jëtu'un tjawë pën yowë tsyëtyut tuknima'tsëp yë tsajpox ëkë tä ja'ay yajpëjkën ja nyijän mëti'ipë tëpo'kpën.

²¹ Pën yë mmëtsip yu'o'këp, yajkay yaj'uuk; e pën tëtsëp, yajnëë'uuk;

²² jëtu'un ëxëëk nyäjyawëtëty mëët ja tsëtyu'un, Yë Dios yë'ë kyujuyäämpy mëti'ipë ënety myäjkpyën.

²³ Ko pyojy anëkëjxytsyow tu'ujaanp ënety, ko ja'ay ëxëëkjaty kyäjpxy myëtyä'äky, ëxëëk yë wyiin jyëjp tuny.

²⁴ Jaak'oy'ajtp ni'ik ko jap tëjkkëjxy ja'ay tsyëënë, ets këtii ko mëjtëkoty tsyëënë mëët tu'uk ja to'oxytyëjk mëti'ipë je'eyë yajjoot'anpëjkpën.

²⁵ Jëtu'un tä xeemynyëë ja'ay t'uukyën, jëtu'un yajjawë ja oy aaw oy ayuk mëti'ipë jëkäm tso'onpën.

²⁶ Jëtu'un tä ëxëëk nëë, mo'onts nëëjën, jëtu'un yë ja'ay nyäxy ka'apë pyokymyëëtëtyën mëti'ipë tsë'këpën ma wintsëntëjkën.

²⁷ Ka'ap y'oyëty ko ja'ay kom uuxpa'ak t'uuky, jëtu'un tä ka'ap y'oyëtyën ko ja'ay yi'iyë t'ixta'ay wi'ix mëj'äämpy y'itëtyën ets wi'ix kumay nyaxëtyën.

²⁸ Jëtu'un tä tu'uk yë kajpnën mëti'ipë ka'ap nyapotsyëtyën ets kutsë'ëkë y'ity, jëtu'un yë ja'ay nyäxy mëti'ipë ka'ap nyäy'akuwitsëtyën.